1.692 ໂຮງງານອຸດສາຫະກໍາ-ຫັດຖະກໍາຈໍາປາສັກ

  ເຖິງແມ່ນວ່າໃນປີ 2020 ຜ່ານມາ ສປປ ລາວ ເວົ້າສະເພາະແຂວງຈໍາປາສັກຈະໄດ້ຮັບຜົນກະທົບຈາກສະພາວະເສດຖະກິດຫົດຕົວອັນເນື່ອງມາຈາກຜົນກະທົບການແຜ່ລະບາດຂອງເຊື້ອພະຍາດໂຄວິດ-19 ຫຼາຍພໍສົມຄວນແຕ່ຍ້ອນທີ່ຕັ້ງ ແລະພູມສັນຖານທ່າແຮງທາງດ້ານການລົງທຶນໃນຂະແໜງອຸດສາຫະກໍາ ແລະ ຫັດຖະກໍາຍັງຄົງມີສະເໜ່ສູງສະນັ້ນຈຶ່ງເຮັດໃຫ້ບັນຍາກາດການເຂົ້າມາລົງທຶນຂອງນັກທຸລະກິດທັງພາຍໃນ ແລະຕ່າງປະເທດຂ້ອນຂ້າງສູງພໍສົມຄວນ.

  ທ່ານ ປອ. ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າ ແຂວງຈໍາປາສັກ ເປີດເຜີຍໃຫ້ຮູ້ເມື່ອບໍ່ດົນມານີ້ໃຫ້ຮູ້ວ່າ: ໃນປີ 2020 ຜ່ານມາທົ່ວແຂວງຈໍາປາສັກມີໂຮງງານອຸດສາຫະກໍາ ແລະ ຫັດຖະກໍາທັງໝົດ 1.692 ແຫ່ງ, ມີມູນຄ່າການລົງທຶນທັງໝົດ 2 ພັນກວ່າຕື້ກີບ, ມີຈໍານວນແຮງງານທັງໝົດ 7.399 ຄົນ, ແຮງງານຍິງ 2.500 ຄົນ.

ໃນຈໍານວນໂຮງງານທັງໝົດນັ້ນມີໂຮງງານຂະໜາດໃຫຍ່ 56 ແຫ່ງ, ມີມູນຄ່າການລົງທຶນ 1,841 ຕື້ກີບ, ໂຮງງານຂະໜາດກາງ 63 ແຫ່ງ, ມີມູນຄ່າການລົງທຶນ 435 ກວ່າຕື້ກີບ, ໂຮງງານຂະໜາດນ້ອຍ 1,257 ແຫ່ງ, ມີມູນຄ່າການລົງທຶນ 641 ກວ່າຕື້ກີບ ແລະອຸດສາຫະກໍາແບບຄອບຄົວ 316 ແຫ່ງ,ມີມູນຄ່າການລົງທຶນ 43 ກວ່າຕື້ກີບ, ລວມຍອດຜະລິດອຸດສາຫະກໍາ ແລະຫັດຖະກໍາບັນລຸໄດ້ 4,285 ກວ່າຕື້ກີບ.

  ແນວໃດກໍດີເມື່ອທຽບໃສ່ໄລຍະດຽວກັນຂອງປີກ່ອນຫຼຸດລົງ 8%, ທຽບໃສ່ແຜນປີປະຕິບັດໄດ້ 88 ກວ່າ%, ສ່ວນການຈໍາໜ່າຍຜະລິດຕະພັນອຸດສາຫະກໍາ ແລະຫັດຖະກໍາບັນລຸໄດ້ 5,849 ຕື້ກວ່າກີບ, ທຽບໃສ່ໄລຍະດຽວຂອງປີຜ່ານມາແມ່ນຫຼຸດລົງ 6% ແລະທຽບໃສ່ແຜນປີປະຕິບັດໄດ້ 90%.

 ທ່ານຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກໃຫ້ຮູ້ຕື່ມວ່າ: ອຸດສາຫະກໍາທີ່ພົ້ນເດັ່ນຂອງແຂວງຈໍາປາສັກປະກອບມີຄື: ອຸດສາຫະກໍາປຸງແຕ່ງອາ ຫານ, ອຸດສາຫະກໍາແຮ່ທາດທີ່ບໍ່ແມ່ນໂລຫະ, ອຸດສາຫະກໍາປຸງແຕ່ງເຄມີ ແລະ ອຸດສາຫະກໍາອື່ນໆ ຂະນະທີ່ປະຈຸບັນແຂວງຈໍາປາສັກໄດ້ມີໂຮງງານປຸງແຕ່ງໄມ້ຖືກດັດ ສົມເປັນໂຮງງານອຸດສາຫະກໍາປຸງແຕ່ງໄມ້ຕາມທີ່ລັດຖະບານກໍານົດໄວ້ 52 ແຫ່ງໃນທົ່ວແຂວງ.

ໂດຍ:  ໂພທິລາດ

แชร์