ເຄິ່ງແລ້ວຂົວຂ້າມຂອງກ້ອນຕື່ນ-ຫ້ວຍແກ້ວ

ໂຄງການກໍ່ສ້າງຂົວຂ້າມແມ່ນໍ້າຂອງກ້ອນຕື່ນ-ຫ້ວຍແກ້ວ ເມືອງປາກທາ ແຂວງບໍ່ແກ້ວ ເປັນໂຄງການທີ່ນອນຢູ່ໃນເສັ້ນທາງຫຼວງຂອງ ແຂວງບໍ່ແກ້ວ ໝາຍເລກ 2243 ສ້າງຂຶ້ນເພື່ອເຊື່ອມຈອດລະຫວ່າງບ້ານກ້ອນຕື່ນ-ຫ້ວຍແອ່ນ ແລະເຊື່ອມຈອດຕິດຊາຍແດນເມືອງຄອບ ແຂວງໄຊຍະບູລີ ຊຶ່ງເປັນເສັ້ນທາງທີ່ມີໄລຍະສັ້ນທີ່ສຸດຈາກແຂວງບໍ່ແກ້ວໄປສູ່ນະຄອນຫຼວງວຽງຈັນໂດຍຜ່ານແຂວງໄຊຍະບູລີມາຮອດປະຈຸບັນການກໍ່ສ້າງແມ່ນເຄິ່ງທາງແລ້ວພາຍຫຼັງດຳເນີນມາເປັນເວລາ 3 ປີ.

    ທ່ານ ສຸຂັງ ບຸນນາວົງ ຮອງຜູ້ອຳນວຍການລັດວິສາຫະກິດກໍ່ສ້າງຄົມມະນາຄົມຜູ້ຈັດການພາກສະໜາມການກໍ່ສ້າງຂົວຂ້າມນໍ້າຂອງກ້ອນຕື່ນ-ຫ້ວຍແກ້ວ ກ່າວວ່າ: ໂຄງການດັ່ງກ່າວແມ່ນໄດ້ເລີ່ມຕົ້ນປະຕິບັດມາແຕ່ 3 ປີຄືນຫຼັງ, ຮອດປະຈຸບັນແມ່ນໄດ້ສຳເລັດພຽງແຕ່ 50 % ຊຶ່ງມີຄວາມຍາວຂອງຂົວທັງໝົດ 503 ແມັດ, ຄວາມກວ້າງທາງລົດແລ່ນປະມານ 8 ແມັດ, ທາງຄົນຍ່າງກວ້າງເບື້ອງລະ 1,8 ແມັດ.

 ພາກສ່ວນເທິງເປັນໂຄງສ້າງນ່າງເຫຼັກລວມມີ 7 ຊ່ວງ, ຊ່ວງໜຶ່ງມີຄວາມຍາວ 65 ແມັດ, ສ່ວນຊ່ວງກາງນໍ້າມີຄວາມຍາວ 110 ແມັດ, ມີໂຄງສ້າງຊຶ່ງອອກແບບເປັນຂົວປະສົມພາກສ່ວນລຸ່ມເປັນເບຕົງເສີມເຫຼັກ, ມີ 8 ເສົາ ໃນນີ້ເສົາກາງ ນໍ້າມີ 6 ເສົາ ແລະຂົວປູດ້ວຍເບຕົງເສີມເຫຼັກ ແລະປູທັບດ້ວຍຢາງຂົວອັດສະຟານໜາ 5 ຊັງຕີ ແມັດ.

 ຜ່ານການປະຕິບັດການກໍ່ສ້າງມາຮອດປະຈຸບັນແມ່ນພວມກໍ່ສ້າງພາກສ່ວນລຸ່ມໄດ້ສຳເລັດແລ້ວເສົາ p1, p2, p3, p6 ແລະສ່ວນເສົາ p4, p5 ແມ່ນກຳລັງກໍ່ສ້າງ, ຄາດວ່າຈະໃຫ້ສຳເລັດພາກສ່ວນລຸ່ມໃນທ້າຍປີນີ້, ສ່ວນໃນລະດູຝົນນີ້ແມ່ນຈະໃຫ້ໄດ້ປະກອບຄານຂົວຢູ່ພາກສ່ວນເທິງ.

 ທ່ານຍັງໃຫ້ຮູ້ຕື່ມວ່າ: ການກໍ່ສ້າງບໍ່ໄດ້ບັນລຸຕາມແຜນທີ່ໄດ້ກຳນົດໄວ້ສາເຫດຫຼັກກໍ່ແມ່ນໂຄງການຕັ້ງຢູ່ຫ່າງໄກຊອກຫຼີກ, ການຂົນສົ່ງວັດສະດຸກໍ່ສ້າງກໍ່ຫຍຸ້ງຍາກ, ລະ ດັບແມ່ນໍ້າຂອງບໍ່ປົກກະຕິ ແລະດ້ານງົບປະມານການກໍ່ສ້າງຍັງບໍ່ທັນຕອບສະໜອງໄດ້ດີເທົ່າທີ່ຄວນ, ສຳລັບມູນຄ່າການກໍ່ສ້າງຂົວທັງໝົດ 180 ກ່ວາຕື້ກີບ ໂດຍແມ່ນການລົງທຶນຂອງລັດຖະບານ ແລະຮັບເໝົາກໍ່ສ້າງໂດຍລັດວິສາຫະກິດກໍ່ສ້າງຄົມມະນາຄົມ.

ຂ່າວ: ພອນສະຫວັນ ມະນີສີ

แชร์