ການນຳພັກ-ລັດ ແລະປະຊາຊົນລາວບັນດາເຜົ່າໃຊ້ສິດເລືອກຕັ້ງ ສສຊ ແລະສສຂ

  ການປ່ອນບັດເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ໄດ້ດຳເນີນຂຶ້ນພ້ອມກັນຂອບເຂດທົ່ວປະເທດໃນວັນທີ 21 ກຸມພາ 2021 ດ້ວຍຄວາມຮັບຜິດຊອບການເມືອງ,ຄວາມເປັນເຈົ້າການ ແລະເຕັມໄປດ້ວຍບັນຍາກາດອັນຟົດຟື້ນໂດຍການນຳພັກ-ລັດ ແລະປະຊາຊົນລາວບັນດາເຜົ່າຕ່າງກໍພາກັນອອກມາໃຊ້ສິດຂອງຕົນເລືອກເອົາ ສສຊ ແລະສສຂ ຜູ້ທີ່ມີຄວາມຮູ້ຄວາມສາມາດເປັນຜູ້ແທນແຫ່ງສິດ ແລະອຳນາດປະຊາຊົນເຂົ້າເຮັດວຽກຢູ່ສະພາແຫ່ງຊາດແລະສະພາປະຊາຊົນຂັ້ນແຂວງ, ນະຄອນຫຼວງ.

  ການນຳພັກ-ລັດ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ໄປໃຊ້ສິດປ່ອນບັດເລືອກຕັ້ງດັ່ງກ່າວຢູ່ໜ່ວຍປ່ອນບັດທີ 20 ບ້ານໜອງບອນ, ເມືອງໄຊເສດຖາ, ນະຄອນຫຼວງວຽງຈັນ; ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ໄປໃຊ້ສິດເລືອກຕັ້ງຢູ່ບ້ານທ່າ ພະລານໄຊ ເມືອງສີສັດຕະນາກ ນະ ຄອນຫຼວງວຽງຈັນ ສ່ວນທ່ານ ພັນຄຳ ວິພາວັນ ຮອງປະທານປະເທດໄດ້ລົງໄປໃຊ້ສິດເລືອກຕັ້ງຢູ່ບ້ານສາຍນໍ້າເງິນ ເມືອງໄຊທານີ ນະຄອນຫຼວງວຽງຈັນ ແລະຜູ້ນຳທ່ານອື່ນກໍອອກມາໃຊ້ສິດເລືອກຕັ້ງເຊັ່ນດຽວກັນ.

 ການເລືອກຕັ້ງ ສສຊ ຊຸດທີ IX ແລະສສຂ ຊຸດທີ II ແມ່ນການ ປະຕິບັດໜ້າທີ່ການເມືອງ ແລະສິດປະຊາທິປະໄຕຂອງພົນລະເມືອງລາວໃນການເລືອກຕັ້ງເອົາບຸກຄົນທີ່ມີມາດຖານເງື່ອນໄຂຄົບຖ້ວນເຂົ້າໃນສະພາແຫ່ງຊາດ ແລະສະພາປະຊາຊົນແຂວງເພື່ອເປັນຕົວແທນປະຕິບັດສິດ,ອຳນາດຂອງປະຊາຊົນລາວບັນດາເຜົ່າການເລືອກຕັ້ງນີ້ມີຄວາມສຳຄັນເປັນຢ່າງຍິ່ງເພາະເປັນການສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນໂດຍສະເພາະແມ່ນການບູລະນະສະພາແຫ່ງຊາດ ແລະ ສະພາປະ ຊາຊົນແຂວງ, ສະນັ້ນມັນເປັນໜ້າທີ່ ແລະຄວາມຮັບຜິດຊອບຂອງທົ່ວພັກ, ທົ່ວລັດ, ທົ່ວກອງທັບ ແລະທົ່ວປວງຊົນລາວທັງຊາດ.

   ການເລືອກຕັ້ງຄັ້ງນີ້ຜູ້ສະໝັກເປັນສະມາຊິກສະພາແຫ່ງຊາດມີ 224 ທ່ານ (ຍິງ 49 ທ່ານ) ເລືອກເອົາ 164 ທ່ານ ແລະສະມາຊິກສະພາປະຊາຊົນຂັ້ນແຂວງມີ 789 ທ່ານ (ຍິງ 227 ທ່ານ) ເລືອກເອົາ 492 ທ່ານ.

 ໃນບັ້ນເລືອກຕັ້ງຄັ້ງນີ້, ຈໍານວນຜູ້ມີສິດປ່ອນບັດເລືອກຕັ້ງແຕ່ລະເຂດເລືອກຕັ້ງໃນທົ່ວປະເທດມີທັງໝົດ 4.279.243 ຄົນ, ຍິງ 2.128.167 ຄົນ, ມີໜ່ວຍປ່ອນບັດເລືອກຕັ້ງທັງໝົດ 7.217 ໜ່ວຍໃນທົ່ວປະເທດ. ໃນນີ້ມີ 40 ໜ່ວຍເລືອກຕັ້ງທີ່ປະຈໍາຢູ່ຕ່າງປະເທດ, ມີພົນລະເມືອງລາວອາໄສຢູ່ຕ່າງປະເທດມີສິດປ່ອນບັດເລືອກຕັ້ງຈຳນວນ 13.404 ຄົນ, ຍິງ 5.493 ຄົນ.

แชร์