ທຫລ ເຜີຍແຜ່ດຳລັດປົກປ້ອງຜູ້ຊົມໃຊ້ບໍລິການ

 ໃນວັນທີ 8 ກຸມພາ 2021 ທະນາຄານແຫ່ງ ສປປ ລາວ ທຫລ ໄດ້ຈັດກອງປະຊຸມເຜີຍແຜ່ດຳລັດວ່າດ້ວຍການປົກປ້ອງຜູ້ຊົມໃຊ້ບໍລິການທາງດ້ານການເງິນຢູ່ທີ່ມະຫາວິທະຍາໄລສະຫວັນນະເຂດຊຶ່ງກອງປະຊຸມຄັ້ງນີ້ໄດ້ຮັບກຽດເປັນປະທານໂດຍທ່ານ ເວີນສະຫວັນ ສີວິໄຊ ຮອງຫົວໜ້າກົມນິຕິກຳທະນາຄານແຫ່ງ ສປປ ລາວ,ທ່ານ ປທ ແກ້ວວິໄລ ດົນລະມີ ຮັກສາການຮອງອະທິການບໍດີຄະນະບໍລິຫານທຸລະກິດພ້ອມດ້ວຍນັກສຶກສາເຂົ້າຮ່ວມເປັນຈຳນວນຫຼວງຫຼາຍ.

  ໃນກອງປະຊຸມຄັ້ງນີ້ໄດ້ເຜີຍແຜ່ດຳລັດ ເລກທີ 225/ລມ, ລົງວັນທີ 6 ເມສາ 2020 ວ່າດ້ວຍການປົກປ້ອງຜູ້ຊົມໃຊ້ບໍລິການທາງດ້ານການເງິນຊຶ່ງຈຸດປະສົງຂອງການເຜີຍແຜ່ດຳລັດສະບັບດັ່ງກ່າວນີ້ກໍ່ເພື່ອເປັນການຄຸ້ມຄອງ ແລະ ກວດກາວຽກງານປົກປ້ອງຜູ້ຊົມໃຊ້ບໍລິການທາງດ້ານການເງິນ ແລະ ເຮັດໃຫ້ວຽກດັ່ງກ່າວມີຄຸນະພາບ, ຖືກຕ້ອງ, ໂປ່ງໃສ ແລະຍຸຕິທຳແນໃສ່ສ້າງຄວາມເຊື່ອໝັ້ນໃຫ້ແກ່ລະບົບການເງິນປະກອບເຂົ້າໃນການພັດທະນາເສດຖະກິດ-ສັງຄົມຂອງຊາດ, ພ້ອມນັ້ນ, ການປົກປ້ອງຜູ້ຊົມໃຊ້ບໍລິການທາງດ້ານການເງິນແມ່ນການນຳໃຊ້ມາດຕະການຕ່າງໆເພື່ອປົກປ້ອງຊັບສິນ,ສິດ ແລະຜົນປະໂຫຍດອັນຊອບທຳຂອງຜູ້ຊົມໃຊ້ທີ່ເນື່ອງຈາກ-ຜົນກະທົບຂອງການນຳໃຊ້ການບໍລິການທາງດ້ານການເງິນ.

แชร์