ຜູ້ສະໝັກຮັບເລືອກຕັ້ງ ສສຊ ສືບຕໍ່ລົງຫາສຽງຢູ່ເມືອງວາປີ

   ຜູ້ສະໝັກເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 14 ແຂວງສາລະວັນ ໄດ້ສືບຕໍ່ເຄື່ອນໄຫວໂຄສະນາຫາສຽງຢູ່ເມືອງວາປີເປັນເມືອງທີ 6 ຂອງແຂວງ,ພາຍຫຼັງສໍາເລັດແລ້ວ 5 ເມືອງ ແລະມາໃນວັນທີ 15 ກຸມພາ 2021, ຢູ່ທີ່ສະໂມສອນເມືອງ, ນຳໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງຜູ້ສະໝັກນໍ້າເບີ 1, ຫົວໜ້າຄະນະທີມງານພ້ອມດ້ວຍຄະນະ, ມີ ທ່ານ ຈັນສະໝອນ ພົມມະແສງ ຄະນະປະຈຳພັກແຂວງຫົວໜ້າຄະນະໂຄສະນາອົບຮົມ ແຂວງ, ທ່ານ ສົມໃຈ ອຸ່ນຈິດ ຮອງເຈົ້າແຂວງຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ບຸນຍູ້ ຈັນທະລັງສີ ເຈົ້າເມືອງວາປີ ແລະ ຄະນະປະຈຳພັກແຂວງ, ກໍາມະ ການພັກແຂວງ, ການນໍາຂັ້ນເມືອງ, ພະນັກງານຫຼັກແຫຼ່ງ ແລະອຳນາດການຄອງບ້ານເທສະບານເຂົ້າຮ່ວມ.  

 ການລົງຫາສຽງຄັ້ງນີ້,ບັນດາທ່ານຜູ້ສະໝັກຈຳນວນ 12 ທ່ານ ກໍ່ໄດ້ສະແດງຄວາມຢື້ຢາມຖາມຂ່າວ ແລະສະເໜີໂຕ, ແນະນຳຕົນເອງ, ຊື່-ປະຫວັດການເຄື່ອນໄຫວ, ໜ້າທີ່ຄວາມຮັບຜິດຊອບ, ກ່ອນອື່ນຜູ້ເຂົ້າຮ່ວມກໍ່ໄດ້ຮັບຟັງຈຸດປະສົງ, ຄວາມໝາຍຄວາມສຳຄັນໃນບັ້ນເລືອກຕັ້ງຄັ້ງນີ້ກໍ່ເພື່ອເປັນການປັບປຸງລະບອບປະຊາທິປະໄຕຈາກປະຊາຊົນໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນ, ເປັນພາກສ່ວນໜຶ່ງໃນການປັບປຸງດ້ານບຸກຄະລາກອນຂອງສະພາແຫ່ງຊາດທັງເປັນຄວາມຮັບຜິດຊອບຂອງທົ່ວປວງຊົນຈາກນັ້ນ,ບັນດາທ່ານກໍ່ໄດ້ສະເໜີຈຸດປະສົງ,ເຈດຈຳນົງ ແລະແນວຄວາມຄິດໃນວຽກງານທີ່ຕົນຮັບຜິດຊອບທີ່ຈະສ້າງເງື່ອນໄຂ,ນຳສະເໜີຕໍ່ສະພາແຫ່ງ ຊາດເພື່ອຂົນຂວາຍດຶງດູດໃນການສ້າງສາພັດທະນາວຽກງານດັ່ງກ່າວແລະຊ່ວຍຊຸກຍູ້ຜັກດັນການພັດທະນາແຂວງສາລະວັນກໍ່ຄືເມືອງວາປີຖ້າໄດ້ຮັບເລືອກຕັ້ງເປັນ ສສຊ ຊຸດນີ້.

  ການລົງເຄື່ອນໄຫວຫາສຽງຢູ່ເມືອງວາປີ ແຂວງສາລະວັນ ແມ່ນໄດ້ກຳນົດເອົາ 3 ຈຸດຄື: ຈຸດທີ 1 ແມ່ນຢູ່ເທສະບານເມືອງ, ຈຸດທີ 2 ເຂດບ້ານນາສຽດ ແລະ ເຂດ ບ້ານວາປີ, ເພື່ອພົບປະພະນັກງານ, ທະຫານ, ຕຳຫຼວດ, ພໍ່ແມ່ປະຊາຊົນ ແລະ ຜູ້ມີສິດປ່ອນບັດເລືອກຕັ້ງໄປໃຊ້ສິດປ່ອນບັດເລືອກຕັ້ງເອົາ ສສຊ ຊຸດທີ IX ປະຈຳເຂດເລືອກຕັ້ງທີ 14 ແຂວງສາລະວັນ ໃນວັນທີ 21 ກຸມພາ 2021. ທົ່ວເມືອງຜູ້ມີສິດປ່ອນບັດເລືອກຕັ້ງທັງໝົດ 21.203 ຄົນ, ມີໜ່ວຍປ່ອນບັດທັງໝົດ 26 ໜ່ວຍ.

ຂ່າວ: ວິໄລວອນ ສິດທິໄຊ

แชร์