ຫຼຸດພົ້ນຄວາມທຸກຍາກຍ້ອນປູກໝາກໄມ້ໃຫ້ໝາກ

 ການສ້າງເສດຖະກິດຄອບຄົວດ້ວຍການຢຶດຖືເອົາອາຊີບປູກຝັງ-ລ້ຽງສັດເປັນອາຊີບສຳຮອງເພື່ອແກ້ໄຂຊີວິດການເປັນຢູ່ໃຫ້ຫຼຸດພົ້ນອອກຈາກຄວາມທຸກຍາກໂດຍຕິດພັນກັບວິຖີການດຳລົງຊີວິດຂອງປະຊາຊົນບັນດາເຜົ່າມາແຕ່ດົນນານຈົນເຖິງປະຈຸບັນ, ນະໂຍບາຍຂອງພັກ-ລັດ ກໍໄດ້ວາງອອກໃນແຕ່ລະໄລຍະຊຸກຍູ້ສົ່ງເສີມຊາວກະສິກອນຊອກຂຸດຄົ້ນທ່າແຮງຕາມເງື່ອນໄຂເພື່ອສ້າງລາຍຮັບຕາມທິດທາງເພິ່ງຕົນເອງ,ກຸ້ມຕົນເອງແລະສ້າງຄວາມເຂັ້ມແຂງດ້ວຍຕົນເອງຕ້ອງໄດ້ອີງໃສ່ເງື່ອນໄຂຂອງແຕ່ລະຄອບ ຄົວຂອງໃຜລາວຄືດັ່ງການສ້າງເສດຖະກິດຄອບຄົວ ທ່ານ ສິດ ວົງສົງຄອນ ອາຍຸ 53 ປີ ປະຈຸບັນຢູ່ບ້ານຄອນທູດ ເມືອງປະທຸມພອນ ແຂວງຈຳປາສັກ.

  ທ່ານ ສິດ ວົງສົງຄອນ ໄດ້ເວົ້າສູ່ຟັງວ່າ: ສະມາຊິກໃນຄອບຄົວມີ 7 ຄົນ, ແຮງງານຕົ້ນຕໍມີ 4 ຄົນ, ແຮງງານສຳຮອງມີ 2 ຄົນ ອາຊີບແຕ່ກ່ອນແມ່ນເຮັດນາປູກເຂົ້າ ແລະໄດ້ລ້ຽງສັດເປັນອາຊີບເສີມສ້າງລາຍຮັບເຂົ້າຄອບຄົວໃນເວລານັ້ນບໍ່ພຽງພໍຕໍ່ກັບຄວາມຕ້ອງການຊີວິດການເປັນຢູ່ຍັງຂາດໆເຂີນໆດັ່ງນັ້ນຈຶ່ງໄດ້ຕັດສິນໃຈຫັນມາເຮັດ ສວນປູກໝາກໄມ້ໃຫ້ໝາກໃນປີ 2005 ຈຶ່ງໄດ້ນຳເອົາເງິນຈາກການສາສົມໄວ້ໃນເມື່ອກ່ອນໄປຊື້ທີ່ດິນໃນເນື້ອທີ່ 1,5 ເຮັກຕາແລ້ວບຸກເບີກເນື້ອທີ່ທຳການຜະລິດຫຼັງ ຈາກນັ້ນ, ໄດ້ນຳເອົາແນວພັນໝາກໄມ້ມາປູກໃສ່ໂດຍມີໝາກເງາະ 70 ຕົ້ນ, ໝາກມັງຄຸດ 25 ຕົ້ນ ໝາກຖົ່ວລຽນ 5 ຕົ້ນ, ແລະ ມີໝາກລອງກອງ 2 ຕົ້ນ, ແນວພັນແມ່ນຊື້ມາ ຈາກປະເທດໄທໃນລາຄາ 25 ພັນ ກີບຕໍ່ 3 ຕົ້ນ, ຫຼັງຈາກ ປູກໄດ້ປະ ມານ 4 ປີຈຶ່ງໄດ້ເກັບໝາກໄມ້ຂາຍສຳລັບຂາຍທຳອິດແມ່ນບໍ່ໄດ້ຮັບດີເທົ່າທີ່ຄວນຕໍ່ຈາກນັ້ນມາແມ່ນເຫັນໄດ້ຢ່າງຈະແຈ້ງວ່າລາຍຮັບຈາກການຂາຍໝາກໄມ້ແມ່ນໄດ້ເພີ່ມຂຶ້ນເລື້ອຍໆ ຊຶ່ງປະຈຸບັນນີ້ສຳລັບລາຄາຂາຍສະເພາະຢູ່ກັບສວນແມ່ນ 10 ພັນກີບຕໍ່ໂລ, ຖ້າຫາກວ່າຂາຍສົ່ງແມ່ນ 8 ພັນກີບຕໍ່ໂລ ສຳລັບຕະຫຼາດຈຳໜ່າຍແມ່ນຕະຫຼາດເມືອງປະທຸມພອນ, ຕະຫຼາດປາກເຊ ແລະແຂວງອັດຕະປືຈາກການຫັນມາເຮັດອາຊີບດັ່ງກ່າວນີ້ສາມາດສ້າງລາຍຮັບເຂົ້າຄອບຄົວ 45 ລ້ານກີບ ນອກຈາກນັ້ນຍັງໄດ້ລ້ຽງງົວອີກ 30 ກວ່າໂຕ ແລະໄດ້ເງິນຈາກການຂາຍງົວ 20 ລ້ານກີບຕໍ່ປີ, ສະເລ່ຍສ້າງລາຍຮັບເຂົ້າຄອບຄົວເປັນເງິນ 60 ລ້ານກີບຕໍ່ປີ, ຊຶ່ງເຫັນໄດ້ວ່າຊີວິດການເປັນຢູ່ຂອງຄອບຄົວຂ້າພະເຈົ້າຖ້າທຽບໃສ່ເມື່ອກ່ອນແມ່ນມີການຫັນປ່ຽນດີຂຶ້ນຄອບຄົວມີລາຍຮັບໝັ້ນຄົງ ແລະ ສາມາດຫຼຸດພົ້ນອອກຈາກຄວາມທຸກຍາກໄດ້ເປັນຄອບຄົວພັດທະນາ ແລະ ເປັນຄອບຄົວແບບຢ່າງໃນການປູກໝາກໄມ້ໃຫ້ໝາກຂາຍຊຶ່ງສະແດງອອກຄື: ມີເຮືອນຢູ່ຖາວອນ 1 ຫຼັງ, ມີລົດໄຖນາເດີນຕາມ 1 ຄັນ, ມີເຄື່ອງໃຊ້ໄຟຟ້າຢູ່ພາຍໃນເຮືອນຄົບຊຸດ, ມີທຶນໝູນວຽນ ແລະທຶນການສຶກສາໃຫ້ລູກ.

 ທ່ານຍັງໄດ້ກ່າວເນັ້ນຕື່ມອີກວ່າ: ແຜນໃນຕໍ່ໜ້າຈະຂະຫຍາຍເນື້ອທີ່ດິນປູກໝາກໄມ້ຕື່ມປະມານ 3 ເຮັກຕາແລະຈະຂະຫຍາຍຕົ້ນໄມ້ຕື່ມຂຶ້ນເພື່ອໃຫ້ຜົນຜະລິດທັນກັບຄວາມຮຽກຮ້ອງຕ້ອງການຂອງຜູ້ບໍລິໂພກ ແລະຈະສູ້ຊົນຂະຫຍາຍການຜະລິດຕິດພັນກັບການຂະຫຍາຍຕະຫຼາດຈຳໜ່າຍໃຫ້ກວ້າງຂວາງກວ່າເກົ່າ.

  ທ່ານ ບຸນໂຮມ ແກ້ວຄຳພັນ ເລຂາພັກບ້ານນາຍບ້ານໆຄອນທູດໄດ້ຢັ້ງຢືນວ່າ: ບ້ານຄອນທູດເປັນບ້ານໜຶ່ງຫ່າງຈາກເທສະບານເມືອງປະທຸມພອນປະມານ 35 ກິໂລ ແມັດ, ມີຈຳນວນພົນທັງໝົດ 1.459 ຄົນ, ມີຍິງ 723 ຄົນ, ມີ 262 ຫຼັງຄາເຮືອນ, ເນື້ອທີ່ທັງໝົດ 547,45 ເຮັກຕາປະຊາຊົນບ້ານຄອນທູດແມ່ນປູກເຂົ້າເປັນ ອາຊີບຕົ້ນຕໍ ແລະ ປູກຝັງ-ລ້ຽງສັດ ຄ້າຂາຍ ແລະ ບໍລິການເປັນສຳຮອງ, ສໍາລັບຄອບຄົວຂອງ ທ່ານ ສິດ ວົງສົງຄອນ ແມ່ນຄອບຄົວໜຶ່ງທີ່ປະສົບຜົນສຳເລັດໃນການປູກໝາກໄມ້ໃຫ້ໝາກເປັນຕົ້ນໝາກເງາະ,ໝາກຖົ່ວລຽນ ແລະໝາກມັງຄຸດແລະເປັນແບບຢ່າງທີ່ດີໃນການເຮັດກະສິກຳປູກຝັງຄວາມສຳເລັດດັ່ງກ່າວຍ້ອນພາຍໃນຄອບຄົວມີຄວາມສາມັກຄີ, ດຸໝັ່ນຂະຫຍັນພຽນ,ກ້າເຮັດ, ກ້າຕັດສິນໃຈ ແລະຮູ້ໝູນໃຊ້ທ່າແຮງບົ່ມຊ້ອນທີ່ຕົນເອງມີສາມາດເຮັດໃຫ້ຄອບຄົວປະສົບຜົນສຳເລັດທັງເປັນແບບຢ່າງທີ່ດີໃຫ້ແກ່ຊ່າວກະສິກອນປະຈຸບັນຜູ້ກ່ຽວສາມາດສ້າງລາຍຮັບເຂົ້າຄອບຄົວໄດ້ປະມານ 50-70 ລ້ານກີບຕໍ່ປີ, ໃນນາມຕາງໜ້າໃຫ້ອໍານາດການປົກຄອງບ້ານຂ້າພະເຈົ້າຂໍຢັ້ງຢືນວ່າທ່ານ ສິດ ເປັນຄອບຄົວຕົວແບບຢູ່ພາຍໃນບ້ານຄອນທູດ ເມືອງປະທຸມພອນ ແຂວງຈຳປາສັກ.

 ໂດຍ: ສິນທະວົງ ນາກກາລະສິນ

แชร์