ລົງທຶນ 23 ຕື້ກວ່າກີບກໍ່ສ້າງນ້ຳປະປາ ແລະສຸຂະພິບານເທສະບານຫຼວງນ້ຳທາ

   ໂຄງການກໍ່ສ້າງນໍ້າປະປາ ແລະສຸຂະພິບານ ໃນເທສະບານແຂວງຫຼວງນໍ້າທາ ໄດ້ເລີ່ມລົງມືກໍ່ສ້າງມາແຕ່ວັນທີ 12 ມີນາ 2018 ໂດຍແມ່ນບໍລິສັດຊົງເມີຍ ວິສາວະກອນກໍ່ສ້າງຈໍາກັດ ສປ ຈີນ ເປັນຜູ້ກໍ່ສ້າງໃນມູນຄ່າ 23,8 ຕື້ກີບ ຫຼືປະ ມານ 2,8 ລ້ານໂດລາ, ໂດຍຮັບທຶນກູ້ຢືມຈາກທະນາຄານພັດທະນາອາຊີ ຫຼື (ADB) ມາຮອດປະຈຸບັນການກໍ່ສ້າງ ສໍາເລັດແລ້ວ 61,83%, ການກໍ່ສ້າງ ລະບົບນໍ້າປະປາແບບຄົບຊຸດໃນເທສະ ບານແຂວງຫຼວງນໍ້າທາຕາມສັນຍາ ຈະໃຊ້ເວລາກໍ່ສ້າງທັງໝົດ 30 ເດືອນ ຮອດທ້າຍເດືອນສິງຫາ 2020 ໃຫ້ສໍາ ເລັດ, ແຕ່ການຈັດຕັ້ງປະຕິບັດຕົວຈິງຜູ້ຮັບເໝົາຄາດວ່າຈະໃຫ້ສໍາເລັດໃນທ້າຍ ເດືອນພຶດສະພາ 2020.

   ໃນວັນທີ 26 ກຸມພາ 2019 ບັນດາຄະນະກໍາມະການຕິດຕາມກວດກາໂຄງການດັ່ງກ່າວ ໄດ້ລົງຕິດຕາມກວດກາຄວາມຄືບໜ້າຂອງໂຄງການກໍ່ສ້າງນໍ້າ ປະປາ ແລະສຸຂະພິບານໃນເທສະບານ ແຂວງຫຼວງນໍ້າທາ, ທີ່ພວມດໍາເນີນການກໍ່ສ້າງບັນດາໜ້າວຽກຕ່າງໆ, ທ່ານ ສິດທິກອນ ພະນາລາຍ ຮອງອໍານວຍການລັດວິສາຫະກິດນໍ້າປະປາແຂວງຫຼວງນໍ້າທາ ທັງເປັນຫົວໜ້າໜ່ວຍງານຈັດຕັ້ງປະຕິບັດໂຄງການໄດ້ໃຫ້ຮູ້ເຖິງໜ້າວຽກຕ່າງໆເຊັ່ນ: ວຽກກໍ່ສ້າງລະບົບນໍ້າປະປາແບບຄົບຊຸດ ໄດ້ກໍ່ສ້າງອ່າງຮັບນໍ້າ 1 ໜ່ວຍ ສໍາເລັດແລ້ວ 100%, ກໍ່ສ້າງອ່າງນໍ້າສູງທີ່ບັນຈຸນໍ້າໄດ້ 480 ແມັດກ້ອນ ສໍາເລັດ 100%, ກໍ່ສ້າງອ່າງ ນໍ້າສະອາດທີ່ບັນຈຸນໍ້າໄດ້ 1.020 ແມັດກ້ອນ ຈໍານວນ 2 ອ່າງ

ສໍາເລັດ 100%, ກໍ່ສ້າງອ່າງນໍ້ານອນ ແລະອ່າງຕອງສໍາເລັດ 5%. ວຽກວາງ ທໍ່ນໍ້າປະປາແຕ່ໂຮງງານຫາ 15 ບ້ານ ພາຍໃນເທສະບານແຂວງປະກອບມີທໍ່ ຟີ 32, ຟີ 63, ຟີ 110, ຟີ 150, ຟີ 200 ແລະທໍ່ຟີ 250 ມີຄວາມຍາວທັງໝົດ 112,2 ກິໂລແມັດ. ວຽກກໍ່ສ້າງຫ້ອງການນໍ້າປະປາເປັນອາຄານ 2 ຊັ້ນ ສໍາເລັດ 95%, ສ້ອມແປງສາງເກັບມ້ຽນເຄື່ອງສໍາເລັດ 85%, ວຽກກໍ່ສ້າງຫ້ອງນໍ້າສາທາລະນະຢູ່ 7 ບ້ານ ລວມມີ 8 ຫຼັງສໍາເລັດ 90% ແລະວຽກກໍ່ສ້າງຫົວງານຫຼືສະຖານີດູດນໍ້າຍັງບໍ່ທັນໄດ້ຈັດຕັ້ງປະຕິບັດ.

ນອກຈາກນັ້ນທາງໂຄງການຍັງໄດ້ໃຫ້ທຶນຊ່ວຍເຫຼືອລ້າຈໍານວນໜື່ງໃນການປັບປຸງສະພາບແວດລ້ອມຂອງ 7 ບ້ານເປົ້າໝາຍໂຄງການໃນນັ້ນADB ຈ່າຍ 71%, ລັດປະກອບ 19% ແລະປະຊາຊົນປະກອບສ່ວນ 10% ຂອງມູນຄ່າການກໍ່ສ້າງ, ທາງໂຄງການຍັງໃຫ້ທຶນຊ່ວຍເຫຼືອລ້າໃນການຈັດຊື້ອຸປະກອນສ້າງຫ້ອງນໍ້າໃຫ້ແກ່ຄອບຄົວທຸກຍາກຈໍານວນ 58 ຄອບຄົວ.

    ໂອກາດນີ້ທ່ານ ສິດທິກອນ ພະນາລາຍ ຮອງອໍານວຍການລັດວິສາຫະກິດນໍ້າປະປາແຂວງຫຼວງນໍ້າທາ ຂໍຝາກເຖິງຊາວຫຼວງນໍ້າທາທີ່ຢູ່ໃນ 15 ບ້ານເປົ້າ ໝາຍໂຄງການເພື່ອເປັນການອໍານວຍຄວາມສະດວກໃນການກໍ່ສ້າງໜ້າວຽກຂອງໂຄງການໃຫ້ສຳເລັດເຊັ່ນ: ການປັກຫຼັກໝາຍແລວວາງນໍ້າປະປາ ແລະ ການຂຸດດິນວາງທໍ່ທີ່ນອນຢູ່ໃນຂອບເຂດ 15 ບ້ານເປົ້າໝາຍໂຄງການຄື: ບ້ານຫາດຍາວ, ທົ່ງໄຈ້ໃຕ້, ທົ່ງໄຈ້ເໜືອ, ວຽງເງິນ, ວຽງທອງ, ໄຊສົມບຸນ, ອຸດົມ ສິນ, ໂພນໄຊ, ວຽງຄໍາ, ນາຫ້ອມ, ນໍ້າ ຈ້າງ, ໜອງບົວວຽງ, ດອນສໍາພັນ, ຫົວຂົວ ແລະບ້ານທົ່ງອົ້ມເພື່ອໃຫ້ສໍາເລັດຕາມແຜນການທີ່ວາງໄວ້.

 

ນສພ ເສດຖະກິດ-ສັງຄົມ

แชร์