ຮອງປະທານສະພາ ຊີ້ນຳກະກຽມບັ້ນເລືອກຕັ້ງຢູ່ສັງທອງ

  ໃນວັນທີ 15 ກຸມພາ 2021 ນີ້, ທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ກຳມະການຄະນະກຳມະການເລືອກຕັ້ງລະດັບຊາດ, ຮອງຫົວໜ້າອະນຸກຳມະການໂຄສະນາ ແລະປຸກລະດົມຂະບວນການລົງເຄື່ອນໄຫວຕິດຕາມ-ກວດກາ ແລະຊຸກຍູ້, ພ້ອມທັງຊີ້ນໍາວຽກງານການກະກຽມໃຫ້ແກ່ບັ້ນເລືອກຕັ້ງສະມາຊິກສະ ພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນແຂວງ (ສສຂ) ຊຸດທີ II ຢູ່ເມືອງສັງທອງ ແລະໄດ້ຮັບຟັງການລາຍງາຍຜົນສໍາເລັດໃນການກະກຽມຂອງຄະນະກໍາມະການເລືອກຕັ້ງຂັ້ນເມືອງເປັນຕົ້ນການແຕ່ງຕັ້ງບຸກຄະລາກອນ, ການເຜີຍແຜ່ບັນດາເອກະສານ ແລະນິຕິກຳສຳຄັນຕ່າງໆ, ສະຖິຕິພົນລະເມືອງ ແລະຜູ້ມີສິດເລືອກຕັ້ງ, ລວມທັງການກະກຽມດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ການປ້ອງກັນພະຍາດໂຄວິດ-19 ແລະ ວຽກງານສໍາຄັນອື່ນໆ.

   ທ່ານ ພົງສະຫວັນ ສີລິພັນ ເຈົ້າເມືອງສັງທອງ, ປະທານຄະນະກຳມະການເລືອກຕັ້ງຂັ້ນເມືອງໃຫ້ຮູ້ວ່າ: ໃນໄລຍະຜ່ານມາໄດ້ຈັດຕັ້ງຜັນຂະຫຍາຍວຽກງານຕ່າງໆ ໂດຍໄດ້ເຜີຍແຜ່ບັນດາເອກະສານ ແລະນິຕິກໍາສໍາຄັນຕ່າງໆ 3 ສະບັບ ເພື່ອຮັບໃຊ້ໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະມາຊິກສະພາປະ ຊາຊົນນະຄອນຫຼວງວຽງຈັນຊຸດ ທີ II,ທົ່ວເມືອງໄດ້ຈັດຕັ້ງເຊື່ອມຊຶມເປັນຈຳນວນ 4 ຊຸດ, ມີຜູ້ເຂົ້າຮ່ວມທັງໝົດ 9.777 ຄົນ, ຍິງ 5.191 ຄົນ ເທົ່າກັບ 49,2% ຂອງຈຳນວນຜູ້ມີສິດປ່ອນບັດເລືອກຕັ້ງ. ທົ່ວເມືອງມີພົນລະເມືອງທັງໝົດ 32.990 ຄົນ,ຍິງ 16.532 ຄົນຜູ້ມີສິດປ່ອນບັດເລືອກຕັ້ງ 19.890 ຄົນ,ຍິງ 9.481 ຄົນ, ທົ່ວເມືອງມີໜ່ວຍເລືອກຕັ້ງທັງໝົດ 53 ໜ່ວຍ, ໃນນັ້ນມີໜ່ວຍເຄື່ອນທີ່ 1 ໜ່ວຍ. ສຳລັບຜູ້ສະໝັກຮັບເລືອກຕັ້ງ ສສຊ ຊຸດທີ IX ມີ 23 ທ່ານ, ຍິງ 6 ທ່ານ, ໃນນັ້ນ ເລືອກເອົາ 18 ທ່ານ; ຜູ້ສະໝັກຮັບເລືອກຕັ້ງ ສສຂ ຊຸດທີ II ຈຳນວນ 5 ທ່ານ, ຍິງ 2 ທ່ານ, ໃນນັ້ນເລືອກເອົາ 3 ທ່ານ. ສ່ວນການປ້ອງກັນຄວາມສະຫງົບ ແມ່ນໄດ້ສົມທົບກັບກໍາລັງກອງຫລອນ ແລະ ປກສ ບ້ານຈັດຕັ້ງປ້ອງກັນເວນຍາມເປັນປົກກະຕິຕະຫລອດ 24 ຊົ່ວໂມງ ເພື່ອຮັບປະກັນໃຫ້ແກ່ບັ້ນເລືອກຕັ້ງໃນຄັ້ງນີ້ມີຄວາມສະຫງົບ 100%. ພ້ອມທັງໄດ້ຂຶ້ນແຜນການປ້ອງກັນໜ່ວຍເລືອກຕັ້ງ 53 ໜ່ວຍ ທີ່ຄະນະກຳມະການເລືອກຕັ້ງຂັ້ນເມືອງໄດ້ກຳນົດ, ຊຶ່ງປະກອບມີກຳລັງທະ ຫານ, ຕຳຫຼວດ ແລະກອງຫຼອນ, ປກສ ບ້ານ.

  ໂອກາດນີ້, ທ່ານຮອງປະທານສະພາແຫ່ງຊາດກໍໄດ້ສະແດງຄວາມຊົມເຊີຍຕໍ່ຄະນະນໍາເມືອງສັງທອງທີ່ໄດ້ປະຕິບັດໜ້າທີ່ຊີ້ນໍາ-ນໍາພາໃນການກະກຽມໃຫ້ແກ່ບັ້ນເລືອກຕັ້ງຄັ້ງນີ້ສໍາເລັດຜົນຫຼາຍໜ້າວຽກ, ພ້ອມເນັ້ນໃຫ້ສືບຕໍ່ບາງຈຸດທີ່ຍັງຄົງຄ້າງໂດຍໃຫ້ຖືເອົາບັ້ນເລືອກຕັ້ງຄັ້ງນີ້ເປັນປາງບຸນໃຫຍ່, ຖືເອົາການໃຊ້ສິດໃຊ້ສຽງປ່ອນບັດເລືອກຕັ້ງໃຫ້ມີຄວາມສໍາຄັນທີ່ສຸດເພື່ອເລືອກເອົາຕົວແທນຂອງຕົນເຂົ້າໃນສະພາ; ການປ່ອນບັດໃຫ້ມີຄວາມຖືກຕ້ອງບໍ່ໃຫ້ມີການບັງຄັບໃນການໃຊ້ສິດ,ປຸກລະດົມປະຊາຊົນເປັນເຈົ້າຕົນເອງເປັນເຈົ້າຂອງປະເທດຊາດ, ພ້ອມນີ້ກໍໃຫ້ເອົາໃຈໃສ່ວຽກງານຮັກສາຄວາມສະຫງົບໃຫ້ດີທີ່ສຸດ, ມີສະຕິລະວັງຕົວຕໍ່ກຸ່ມຄົນບ່ໍດີ, ປ່າວຂ່າວ,ພ້ອມທັງເຂັ້ມງວດການປ້ອງກັນພະຍາດໂຄວິດ-19.

  ຈາກນັ້ນ, ທ່ານຮອງປະທານສະພາແຫ່ງຊາດກໍໄດ້ລົງໄປກວດກາເບິ່ງຄວາມພ້ອມຈຸດປ່ອນບັດເລືອກຕັ້ງ ສສຊ ແລະສສຂ ຢູ່ບ້ານເພຍລາດ ແລະບ້ານສະນອດຕື່ມອີກ.

ຂ່າວ-ພາບ: ຂັນໄຊ

แชร์