ຮສສ ຫຼວງພະບາງ ມອບເຄື່ອງຕ້ານໄພໜາວ

   ເພື່ອເປັນການສຶບຕໍ່ຈັດສົ່ງມອບເຄື່ອນຸ່ງຫົ່ມຕ້ານໄພໜາວໃຫ້ກັບປະຊາຊົນທີ່ຢູ່ຫ່າງໄກຊອກຫຼີກໄດ້ຮັບເຄື່ອງນຸ່ງຫົ່ມຈາກການຊ່ວຍເຫຼືອອຸປະຖໍາຂອງພາກສ່ວນຕ່າງໆ ທາງການນໍາຂອງແຂວງຈິ່ງໄດ້ຈັດພິທີມອບຕໍ່ໃຫ້ບັນດາເມືອງທີ່ໄດ້ຮັບຜົນກະທົບກັບໄພໜາວໃນທົ່ວແຂວງຄັ້ງນີ້ລວມມູນຄ່າ 180 ລ້ານກີບ.

  ເຄື່ອງນຸ່ງຫົ່ມທີ່ນໍາມາມອບຄັ້ງນີ້ຊຶ່ງປະກອບມີເຄື່ອງນຸ່ງຫົມປະສົມ, ເກີບ, ເພື່ອນຳໄປມອບຕໍ່ໃຫ້ປະຊາຊົນບັນດາເຜົ່າເຂດຫ່າງໄກສອກຫຼີກເປັນຕົ້ນແມ່ນຄອບຄົວທຸກ ຍາກ, ຂາດເຂີນ ແລະເຂດທີ່ໄດ້ຮັບຜົນກະທົບຈາກໄພໜາວຢູ່ 11 ເມືອງ ແລະນະຄອນຫຼວງພະບາງ ເພື່ອຮັບປະກັນ ແລະຊຸກຍູ້ເຮັດໃຫ້ຊີວິດການເປັນຂອງເຂົາເຈົ້າດີຂຶ້ນສະນັ້ນທາງພະແນກແຮງງານ ແລະສະຫວັດດີການສັງຄົມ ແຂວງຫຼວງພະບາງ ຈຶ່ງໄດ້ແຈ້ງໃຫ້ຕົວແທນຕາງໜ້າແຕ່ລະເມືອງເຂົ້າມາຮັບເອົາເຄື່ອງຕ້ານໄພໜາວທີ່ມອບຄັ້ງນີ້ນໍາໄປແຈກຍາຍໃຫ້ກຸ່ມເປົ້າໝາຍຢູ່ບັນດາເມືອງ ແລະບ້ານເປົ້າໝາຍແຕ່ລະບ້ານຂອງເມືອງໃຫ້ທົ່ວເຖິງກັນ.

  ພິທີໄດ້ຈັດຂຶ້ນໃນວັນທີ 12 ກຸມພາ 2021 ຢູ່ສາງເຄື່ອງຂອງພະແນກແຮງງານ ແລະສະຫວັດດີການສັງຄົມແຂວງທີ່ ບ້ານໂພນສະອາດ ນະຄອນຫຼວງພະບາງ ໂດຍເປັນກຽດກ່າວມອບຂອງ ທ່ານ ບຸນເລື່ອມ ມະນີວົງ ຮອງເຈົ້າ ແຂວງໆຫຼວງພະບາງ ແລະຮັບໂດຍແມ່ນຕາງໜ້າບັນດາເມືອງ ແລະນະຄອນ-ຫຼວງພະບາງ, ມີທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະສະຫວັດດີການສັງຄົມແຂວງ, ຕາງໜ້າພະແນກການຂອງແຂວງທີ່ກ່ຽວຂ້ອງພ້ອມດ້ວຍພະນັກງານຈາກຂະແໜງການເຂົ້າຮ່ວມເປັນສັກຂີພິຍານ.

ຂ່າວ: ສີສຸວັນ 

แชร์