ກະຊວງການເງິນເຜີຍແຜ່ວຽກຕ້ານຟອກເງິນ

  ກະຊວງການເງິນເຜີຍແຜ່ວຽກງານຕ້ານການຟອກເງິນ ເເລະການສະໜອງທຶນໃຫ້ເເກ່ການກໍ່ການຮ້າຍ (AML/CFT) ໃນວັນທີ 16 ກຸມພາ 2021 ທີ່ຫ້ອງປະຊຸມກະຊວງການເງິນ, ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ແລະ ທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ (ທຫລ);ພ້ອມນີ້,ກໍ່ມີບັນດາພະນັກງານຂັ້ນນໍາ-ຂັ້ນວິຊາການຈາກກະຊວງດັ່ງກ່າວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ການເຜີຍແຜ່ ແລະ ເຊື່ອມຊຶມວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍໃນຄັ້ງນີ້ເພື່ອເຜີຍແຜ່ວຽກງານ AML/CFT ໂດຍສະ ເພາະກົດໝາຍ, ລະບຽບການທີ່ກ່ຽວຂ້ອງໃຫ້ເຂົ້າໃຈຢ່າງເລິກເຊິ່ງມີຄວາມຮັບຜິດຊອບສູງໃນການປຶກສາຫາລື, ແລກປ່ຽນຄຳເຫັນຢ່າງກົງໄປກົງມາເພື່ອໃຫ້ສາມາດນໍາໄປຈັດຕັ້ງປະຕິບັດຕົວຈິງໄດ້ຢ່າງເໝາະສົມ ແລະມີປະສິດທິພາບສູງພ້ອມທັງມີຜົນສໍາເລັດຢ່າງຈົບງາມໂດຍເນັ້ນໃສ່ພາບລວມການຈັດຕັ້ງປະຕິບັດໃນໄລຍະຜ່ານມາ,ການກະກຽມໃຫ້ແກ່ການປະເມີນຜົນຮອບດ້ານວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ໃນປີ 2020-2021 ຊຶ່ງວຽກດັ່ງກ່າວມີຄວາມສໍາຄັນຕໍ່ສະພາບການດໍາເນີນເສດຖະກິດໃນປະເທດ, ສປປ ລາວ ກໍ່ຄືລັດຖະບານໄດ້ສ້າງຄະນະກໍາມະການລະດັບຊາດໂດຍປະກອບມີຮອງນາຍົກລັດຖະມົນຕີ, ລັດຖະມົນຕີກະຊວງການເງິນເປັນປະທານ;ມີລັດຖະມົນຕີ ແລະຮອງລັດຖະມົນຕີຈາກ 10 ກະຊວງ ແລະທຽບເທົ່າເຂົ້າຮ່ວມໃນຄະນະເພື່ອສຸມໃສ່ຈັດຕັ້ງປະຕິບັດວຽກງານດັ່ງກ່າວບົນພື້ນຖານເງື່ອນໄຂ 40 ຂໍ້ແນະນໍາ ແລະ 11 ປະສິດທິຜົນຂອງອົງການຕ້ານການຟອກເງິນສາກົນທີ່ ສປປ ລາວ ເຂົ້າຮ່ວມເປັນສະມາຊິກ.

 ໃນໄລຍະຜ່ານມາ ສປປ ລາວ ໄດ້ຮັບການປະເມີນຜົນຮອບດ້ານຄັ້ງທໍາອິດໃນປີ 2010 ຊຶ່ງຜົນການປະເມີນໃນຄັ້ງນັ້ນ ສປປ ລາວ ຕົກຢູ່ໃນບັນຊີເທົາເຮັດໃຫ້ ສປປ ລາວ ພົບຄວາມຫຍຸ້ງຍາກຫຼາຍດ້ານ; ແຕ່ຢ່າງໃດກໍດີ, ສປປ ລາວ ໄດ້ສູ້ຊົນ, ປັບປຸງແກ້ໄຂຂໍ້ຄົງຄ້າງຕ່າງໆ ເປັນຕົ້ນໄດ້ອອກບັນດານິຕິກໍາທີ່ຕິດພັນຈໍານວນ 28 ສະບັບ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຕ້ານການຟອກເງິນໃຫ້ສອດຄ່ອງຕາມມາດຖານສາກົນ,ສ້າງກົນໄກ ແລະຂັ້ນຕອນຕ່າງໆປະຕິບັດໃຫ້ເກີດປະສິດທິຜົນຕາມນິຕິກໍາທີ່ວາງອອກໄດ້ຈໍານວນໜຶ່ງ; ມາຮອດປີ 2017 ຈຶ່ງເຮັດໃຫ້ ສປປ ລາວ ສາມາດອອກຈາກບັນຊີເທົາຂອງສາກົນ. ຫຼັງຈາກນັ້ນ, ກໍ່ໄດ້ດໍາເນີນການປະເມີນຄວາມສ່ຽງລະດັບຊາດດ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍສໍາເລັດໃນກາງປີ 2018 ຊຶ່ງສາມາດກໍານົດໄດ້ 8ຂະແໜງການທຸລະກິດທີ່ມີຄວາມສ່ຽງຈະຖືກສວຍໃຊ້ໃນຂະບວນການຟອກເງິນ ແລະກຳນົດໄດ້ 7 ຄວາມຜິດຕົ້ນທີ່ເປັນໄພຂົ່ມຂູ່ ຫຼືມີຄວາມສ່ຽງຕໍ່ການຟອກເງິນ.

  ເພື່ອກະກຽມການປະເມີນຜົນຮອບດ້ານຄັ້ງທີ 2 ໃນສົກປີ 2020-2021, ລັດຖະບານໄດ້ສ້າງຕັ້ງຄະນະສະເພາະກິດຊຶ່ງນໍາໂດຍທ່ານຮອງນາຍົກລັດຖະມົນຕີ ແລະຂັ້ນລັດຖະມົນຕີຈໍານວນ 25 ທ່ານຈາກ 14 ກະຊວງ ປະກອບຢູ່ໃນຄະນະກໍາມະການ ແລະໄດ້ແບ່ງອອກເປັນ 4 ກຸ່ມວຽກ ໃນນີ້ມີວຽກງານເຜີຍແຜ່ ແລະເຊື່ອມຊືມ; ວຽກງານນິຕິກໍາ ແລະ ກົນໄກ; ວຽກງານຄຸ້ມຄອງ ແລະ ວຽກງານການດໍາເນີນຄະດີໂດຍວຽກງານເຜີຍແຜ່ ແລະ ເຊື່ອມຊືມປະກອບມີຮອງຜູ້ວ່າການ ທຫລ; ຮອງລັດຖະມົນຕີກະຊວງການເງິນ ແລະ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີເຊີ່ງມີໜ້າທີ່ ແລະຮັບຜິດຊອບໃນການສ້າງຄວາມເຂົ້າໃຈຕໍ່ກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍເວົ້າສະເພາະຄວາມເຂົ້າໃຈຕໍ່ກັບຄວາມສ່ຽງ, ສ້າງແຜນການຈັດຕັ້ງປະຕິບັດເພື່ອຫຼຸດຜ່ອນຄວາມສ່ຽງທີ່ເຫັນວ່າບໍ່ສອດຄ່ອງກັບມາດຖານສາກົນໂດຍມີສໍານັກງານຂໍ້ມູນຕ້ານການຟອກເງິນເປັນກອງເລຂາເຮັດວຽກໃນການປະສານງານ ແລະສາມາດມີຜົນຄືບໜ້າເປັນກ້າວໆ.

ຂ່າວ: ຣັດສະໝີ ດວງສັດຈະ 

ຮູບພາບ: ໜັງສືພິມເສດຖະກິດ-ສັງຄົມ

แชร์