ສະຖານີທາງລົດໄຟຢູ່ຫຼວງພະບາງຄາດສຳເລັດກ່ອນເດືອນຕຸລາ

   ທ່ານ ເຂັມຄຳ ພົງສະຫວັດ ຫົວໜ້າຫ້ອງການປະສານງານໂຄງການກໍ່ສ້າງທາງລົດໄຟ-ລາວຈີນ ປະຈຳແຂວງຫຼວງພະບາງ ໄດ້ລາຍງານເຖິງຜົນສໍາເລັດເບື້ອງຕົ້ນຂອງການກໍ່ສ້າງອາຄານ, ວຽກງານປະດັບສະຖານີທາງລົດໄຟຢູ່ ບ້ານພິກ ນະຄອນຫຼວງພະບາງ ຕໍ່ທີມຂ່າວພວກເຮົາ 16 ກຸມພານີ້ວ່າ: ຫຼັງຈາກສໍາລັບວຽກງານການວາງລາງທາງລົດໄຟສໍາເລັດແລ້ວຕອນນີ້ໜ້າວຽກຫຼັກທີ່ພວມເລັ່ງຈັດຕັ້ງປະຕິບັດແມ່ນການກໍ່ສ້າງອາຄານສະຖານີລົດໄຟຊຶ່ງການກໍ່ສ້າງມີຄວາມຄືບໜ້າໄປແລ້ວປະມານ 45%, ການກໍ່ສ້າງສະຖານີແປງໄຟຟ້າຮັບໃຊ້ການແລ່ນລົດໄຟຄືບໜ້າປະມານ 35% ແລະເລັ່ງວຽກງານປະດັບປະດາ ແລະປ້ອງກັນເຈື່ອນສະຖານີບວມອໍ້.

  ສ່ວນວຽກຕິດຕັ້ງຕາຂ່າຍໄຟຟ້າຮັບໃຊ້ການແລ່ນລົດໄຟ,ຮັບໃຊ້ສະຖານີ ແລະຈຸດພັກເຊົາຂອງພະນັກງານ,ການລ້ອມຮົ້ວເຂດສະຫງວນທາງລົດໄຟ,ວຽກປູກຫຍ້າ ແລະປະດັບປະດາຕາມ ແລວທາງລົດໄຟ, ລວມເຖິງການປັບປຸງສະພາບແວດລ້ອມອ້ອມຂ້າງຕ່າງໆຕາມແຜນແມ່ນຈະໃຫ້ສໍາເລັດໃນເດືອນກັນຍາ 2021 ນີ້ ແລະໜ້າວຽກທັງໝົດຄາດຈະໃຫ້ສໍາເລັດກ່ອນເດືອນຕຸລາ 2021 ນີ້ ເພາະວ່າຈະເລີ່ມທົດລອງການແລ່ນລົດຕົວຈິງ.

  ເສັ້ນທາງລົດໄຟລາວ-ຈີນ ເສັ້ນນີ້ຫາກສ້າງສໍາເລັດບໍ່ພຽງແຕ່ຈະຊຸກຍູ້ໂດຍກົງໃຫ້ກັບການພັດທະນາເສດຖະກິດ-ສັງຄົມຂອງແຂວງ ແລະເປັນການເພີ່ມວຽກເຮັດງານທຳໃຫ້ປະຊາຊົນພາຍໃນແຂວງຫຼວງພະບາງເວົ້າລວມກໍຄືປະຊາຊົນລາວບັນດາເຜົ່າແຕ່ຍັງມີຄວາມໝາຍທາງປະຫວັດສາດ ແລະຍຸດທະສາດການຮ່ວມມືໃນຂົງເຂດການເຊື່ອມໂຍງກັບອາຊີຕາເວັນອອກອີກດ້ວຍອັນຈະເຮັດໃຫ້ດ້ານເສດຖະກິດ,ວັດທະນະທຳ,ການທ່ອງທ່ຽວລວມເຖິງດ້ານອື່ນໆແມ່ນຈະໄດ້ຮັບການພັດທະນາດີຂຶ້ນໄປພ້ອມໆກັນ, ໂດຍສະເພາະແມ່ນແຜນຍຸດທະສາດ “ໜຶ່ງແລວໜຶ່ງເສັ້ນທາງ” ເຊິ່ງເສັ້ນທາງດັ່ງກ່າວຈະໄດ້ຊ່ວຍໃຫ້ຂອບຕາໜ່າງທາງລົດໄຟໃນອາຊີມີຄວາມສົມບູນໄປອີກຂັ້ນໜຶ່ງລວມເຖິງບົດບາດ ແລະຄຸນຄ່າທີ່ສໍາຄັນໃນການຊ່ວຍດຶງເສດຖະກິດຂອງລາວ ແລະປະເທດອ້ອມຂ້າງໃຫ້ເຕີບໃຫຍ່ເຂັ້ມແຂງຂຶ້ນໄປເທື່ອລະກ້າວ.

ຂ່າວ: ສີສຸວັນ 

แชร์