ຜູ້ສະໝັກຮັບເລືອກຕັ້ງ ສສຂ ຫຼວງນໍ້າທາ ເຄື່ອນໄຫວໂຄສະນາຫາສຽງ

  ວັນທີ 11 ກຸມພາ 2021 ຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງຊຸດທີ ll ປະຈໍາເຂດເລືອກຕັ້ງທີ 4 ເມືອງ ວຽງພູຄາແຂວງຫຼວງນໍ້າທາ ຈໍານວນ 6 ທ່ານ, ຍິງ 2 ທ່ານໄດ້ລົງເຄື່ອນໄຫວໂຄສະນາຫາສຽງຢູ່ເດີ່ນໂຮງຮຽນປະຖົມບ້ານນໍ້າເງິນ ເມືອງວຽງພູຄາ ແຂວງຫຼວງນໍ້າທາ ໃຫ້ກຽດເຂົ້າຮ່ວມໂດຍ ທ່ານ ນາງ ເຮືອຍ ສົມຫວັງ ຮອງເຈົ້າເມືອງໆວຽງພູຄາມີຄະນະຮັບຜິດຊອບກະກຽມການເລືອກຕັ້ງຂັ້ນເມືອງ, ອົງການຈັດຕັ້ງບ້ານ ແລະປະຊາຊົນພາຍໃນ ບ້ານນໍ້າເງິນ ເຂົ້າຮ່ວມ.

  ການລົງເຄື່ອນໄຫວໂຄສະນາຫາສຽງຂອງຜູ້ຮັບສະໝັກເລືອກຕັ້ງເປັນສະມາຊິກສະພາປະຊາຊົນແຂວງຄັ້ງນີ້ແມ່ນເຫດການໆເມືອງສໍາຄັນທີ່ສຸດຂອງລະບອບປະຊາທິປະໄຕເພື່ອໃຫ້ປະຊາຊົນໄດ້ມີໂອກາດໃຊ້ສິດເລືອກເອົາຜູ້ແທນຂອງຕົນໄປດໍາລົງຕໍາແໜ່ງຢູ່ໃນສະພາເປັນອົງການຕົວແທນແຫ່ງສິດ ແລະຜົນປະໂຫຍດອັນຊອບທໍາຂອງປະຊາຊົນລາວບັນດາເຜົ່າເລືອກເອົາຜູ້ທີ່ມີຄວາມຮູ້ຄວາມສາມາດມີມາດຖານເງື່ອນໄຂຄົບຖ້ວນຢ່າງແທ້ຈິງທັງເປັນການສືບຕໍ່ປະຕິບັດພາລະບົດບາດສິດ ແລະໜ້າທີ່ສະພາແຫ່ງຊາດ ແລະສະພາປະຊາຊົນແຂວງໃຫ້ມີລັກສະນະຕໍ່ເນື່ອງເພື່ອປະກອບສ່ວນເຂົ້າໃນພາລະກິດປ່ຽນແປງໃໝ່ຂອງພັກ, ຢູ່ໃນໄລຍະການປົກປັກຮັກສາ ແລະ ສ້າງສາພັດທະນາປະ ເທດຊາດໃຫ້ມີຄວາມຈະເລີນຮຸ່ງເຮືອງ.

  ໂອກາດດັ່ງກ່າວຜູ້ສະໝັກແຕ່ລະທ່ານໄດ້ຂຶ້ນສະເໜີຕົວ, ປະຫວັດ, ການເຄື່ອນໄຫວຂອງຕົນໃນໄລຍະຜ່ານມາເພື່ອເຮັດໃຫ້ຜູ້ມີສິດເລືອກຕັ້ງໄດ້ຮັບຮູ້, ເຂົ້າໃຈຢ່າງເລິກເຊິ່ງ ແລະນໍາໄປພິຈາລະນາສຸມຈິດສຸມໃຈໃຊ້ສິດຂອງຕົນປ່ອນບັດຄັດເລືອກເອົາບຸກຄົນຜູ້ທີ່ມີມາດຖານເງື່ອນໄຂ ແລະສາມາດເປັນຕົວແທນຂອງປະຊາຊົນບັນດາເຜົ່າປົກ ປ້ອງສິດ, ຜົນປະໂຫຍດຂອງປະຊາຊົນໂດຍປະຊາຊົນ ແລະເພື່ອປະຊາຊົນຢ່າງແທ້ຈິງພ້ອມກັນນັ້ນຜູ້ສະໝັກຍັງໄດ້ໃຫ້ຄໍາຢືນຢັນ ແລະປະຕິຍານຕົນຢ່າງໜັກແໜ້ນຕໍ່ຜູ້ມີສິດເລືອກຕັ້ງຕື່ມວ່າ: ຈະທຸ່ມເທເຫື່ອແຮງ ແລະສຸມສະຕິປັນຍາຂອງຕົນເຂົ້າໃນການຮັບໃຊ້ຊາດ, ຮັບໃຊ້ປະຊາຊົນຢ່າງສຸດຄວາມສາມາດເພື່ອຜົນປະໂຫຍດລວມຂອງຊາດ, ຂອງປະຊາຊົນໂດຍສະເພາະຮັບໃຊ້ປະຊາຊົນຊາວແຂວງຫຼວງນໍ້າທາກໍ່ຄືເມືອງວຽງພູຄາຢ່າງສຸດໃຈ. ສໍາລັບຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງຊຸດທີ 2 ປະຈໍາເຂດເລືອກຕັ້ງທີ 4 ເມືອງວຽງພູຄາ ແຂວງຫຼວງນໍ້າທາ, ມີ 6 ທ່ານ,ຍິງ 2 ທ່ານ ຈະຄັດເລືອກເອົາ 4 ທ່ານເພື່ອເປັນຜູ້ແທນຂອງປະຊາຊົນຢູ່ໃນສະພາປະຊາຊົນແຂວງ.

  ດັ່ງນັ້ນເພື່ອໃຫ້ການເລືອກຕັ້ງບັນລຸຕາມລະດັບຄາດໝາຍທີ່ວາງໄວ້ຂໍເຊີນຊວນໃຫ້ປະຊາຊົນລາວບັນດາເຜົ່າໃນທົ່ວປະເທດໂດຍສະເພາະຢູ່ເມືອງວຽງພູຄາຜູ້ທີ່ມີອາຍຸແຕ່ 18 ປີຂຶ້ນໄປຈົ່ງພ້ອມພຽງກັນໄປໃຊ້ສິດຂອງຕົນປ່ອນບັດເອົາຜູ້ແທນທີ່ໄດ້ມາດຖານ ແລະ ເງື່ອນໄຂຄົບຖ້ວນເພື່ອໄປເຮັດໜ້າທີ່ໃນການປົກປ້ອງສິດ ແລະ ຜົນປະໂຫຍດຂອງປະຊາຊົນຢູ່ໃນສະພາ ແລະເອົາໃຈໃສ່ເຮັດໃຫ້ການເລືອກຕັ້ງໃນຄັ້ງນີ້ບັນລຸຕາມລະດັບຄາດໝາຍສາມຮ້ອຍສ່ວນຮ້ອຍ ແລະ ມີຜົນສຳເລັດຢ່າງຈົບງາມ. ຈາກນັ້ນຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງ ຊຸດທີ ll ປະຈໍາເຂດເລືອກຕັ້ງທີ 4 ເມືອງວຽງພູຄາ ແຂວງຫຼວງນໍ້າທາຍັງຈະໄດ້ສືບຕໍ່ລົງເຄື່ອນໄຫວໂຄສະນາຫາສຽງແຕ່ວັນທີ 11–19 ກຸມພາ 2021 ຈຶ່ງສໍາເລັດ.

ຂ່າວ: ສົມພອນ ຂຸນດາວົງ 

แชร์