ຜົ້ງສາລີ ເຜີຍແຜ່ບັນດາເນື້ອໃນສຳຄັນໃຫ້ຜູ້ສະໝັກເລືອກຕັ້ງ

  ວັນທີ 8 ກຸມພາ 2021, ສະພາປະຊາຊົນແຂວງຜົ້ງສາລີ ຈັດກອງປະຊຸມເຜີຍແຜ່ບັນດາເນື້ອໃນສໍາຄັນໃຫ້ແກ່ບຸກຄະລາກອນທີ່ຈະລົງສະໝັກຮັບເລືອກຕັ້ງເປັນສະ ມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ຂຶ້ນທີ່ຫ້ອງວ່າການແຂວງໂດຍການເປັນປະທານຂອງ ທ່ານ ຈັນສີ ແສງສົມພູ ຮອງປະທານສະ ພາປະຊາຊົນແຂວງຜົ້ງສາລີ (ຫົວໜ້າອະນຸກໍາມະການເລຂານຸການ ຄລຂ ), ເຂົ້າຮ່ວມມີບັນດາທ່ານຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ເຂົ້າຮ່ວມ.

  ທີ່ປະຊຸມພາຍຫຼັງ ທ່ານ ຈັນສີ ແສງສົມພູ ກ່າວຈຸດປະສົງ ແລະສະເໜີເອກະສານກ່ຽວກັບການເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະສະພາ ປະຊາ ຊົນແຂວງຊຸດທີ II; ໄດ້ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາໜ່ວຍພັກ,ເລຂາທິການສະພາປະຊາຊົນແຂວງ (ກໍາມະການເລຂານຸການ ຄລຂ) ເຜີຍແຜ່ຄໍາແນະນໍາຂອງຄະນະກໍາມະການເລືອກຕັ້ງລະດັບຊາດສະບັບເລກທີ 08/ຄລຊ, ລົງວັນທີ 24 ພະຈິກ 2020 ກ່ຽວກັບການໂຄສະນາຫາສຽງໃຫ້ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II;ເຜິຍແຜ່ຄໍາແນະນໍາເພີ່ມເຕີມສະບັບເລກທີ 39/ຄປລຊ,ລົງວັນທີ 28ມັງກອນ 2021 ກ່ຽວກັບການໂຄສະນາຫາສຽງໃຫ້ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ II.

  ສະນັ້ນໃນຕອນບ່າຍຂອງວັນດຽວກັນຍັງໄດ້ເຜີຍແຜ່ບັນດາເນື້ອໃນສໍາຄັນໃຫ້ແກ່ບຸກຄະລາກອນທີ່ຈະລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ສະເພາະເພດຍິງ, ເຜີຍແຜ່ບາງບັນຫາທີ່ຜູ້ສະໝັກເພດຍິງຄວນເອົາໃຈໃສ່ໃນເວລາພົບປະກັບຜູ້ສິດເລືອກຕັ້ງ; ການມີພາວະ ຄວາມເປັນຜູ້ນໍາຂອງເພດຍິງ; ບົດບາດຂອງແມ່ຍິງໃນເວທີການເມືອງ.

ຂ່າວ: ສຸກສົມພອນ

แชร์