ຊ້າງ 21 ເຊືອກຮ່ວມບຸນຊ້າງໄຊຍະ

  ງານມະຫະກໍາບຸນຊ້າງ ແຂວງໄຊຍະບູລີ ໄດ້ຈັດຂຶ້ນໃນວັນທີ 13 ກຸມພາ 2021 ທີ່ສະໜາມຫຼວງຂອງແຂວງເຂົ້າຮ່ວມມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມມີການນໍາຂອງແຂວງ, ຂອງເມືອງ, ແຂກທັງພາຍໃນ ແລະຕ່າງປະເທດພ້ອມດ້ວຍພໍ່ແມ່ປະຊາຊົນບັນດາເຜົ່າພາຍໃນແຂວງເຂົ້າຮ່ວມ.

ສໍາລັບການຈັດງານມະຫະກໍາບຸນຊ້າງໃນປີ 2021 ນີ້ຖືວ່າເປັນຄັ້ງທີ 15 ຈັດຂຶ້ນຕາມຮີດຄອງປະເພນີ, ມີຊ້າງເຂົ້າຮ່ວມ 21 ເຊືອກເພາະວ່າປີນີ້ເປັນປີທີ່ມີຄວາມສ່ຽງສູງໂດຍສະເພາະສະພາບການລະບາດຂອງພະຍາດໂຄວິດ-19 ແມ່ນຍັງສືບຕໍ່ຂະຫຍາຍຕົວເປັນວົງກວ້າງ ແລະ ກາຍພັນຊຶ່ງມັນເປັນມະຫັນຕະໄພຕໍ່ມວນມະນຸດໃນທົ່ວ ໂລກ ແລະຍາກທີ່ຈະຢັບຢັ້ງບັນຫາເຊື້ອພະຍາດດັ່ງກ່າວ, ສະນັ້ນການຈັດງານມະຫະກໍາບຸນຊ້າງປີ 2021 ນີ້ຈຶ່ງຈັດຂຶ້ນພຽງ 1 ວັນເທົ່ານັ້ນເພື່ອເປັນການຄອບເລົ່າ, ບໍ່ໄດ້ຈັດໃຫຍ່ຄືທຸກໆ ປີຜ່ານມາເພື່ອຮັບປະກັນມາດຕະການປ້ອງກັນການລະບາດເຊື້ອພະຍາດໂຄວິດ-19, ຄະນະຮັບຜິດຊອບຈັດງານຈຶ່ງໄດ້ກໍານົດເອົາແຕ່ກິດຈະກໍາທີ່ສໍາຄັນແລະຈໍາເປັນເຊັ່ນ: ຕັກບາດພຣະ 13 ອົງ ເພື່ອອຸທິດບຸນກຸສົນໃຫ້ຊ້າງ,ບາສີສູ່ຂວັນຊ້າງ,ແຮ່ຂະບວນຊ້າງ,ຈັດອາຫານບຸບເຟ້ຊ້າງເພື່ອສ້າງເງື່ອນໄຂໃຫ້ຊ້າງມີໂອກາດພົບປະກັນ ແລະຂີ່ຊ້າງອ້ອມເມືອງ.

ແຂວງໄຊຍະບູລີ ເປັນແຂວງດຽວທີ່ມີປະຊາກອນຊ້າງຫຼາຍກວ່າໝູ່ຖ້າທຽບໃສ່ແຂວງອື່ນໃນ ສປປ ລາວ ດ້ວຍເຫດນັ້ນເພື່ອເປັນການອານຸລັກຮັກສາຊ້າງບໍ່ໃຫ້ສູນພັນແລະທັງເປັນການສືບຕໍ່ປົກປັກຮັກສາວັດທະນະທໍາຮີດຄອງປະເພນີອັນດີງາມ ແລະວິຖີການດໍາລົງຊີວິດຂອງປະຊາຊົນລາວບັນດາເຜົ່າທີ່ຕິດພັນກັບຊ້າງມາແຕ່ອະດີດຕະການໃຫ້ຍືນຍົງຄົງຕົວ ແລະຢູ່ກັບປະຊາຊົນລາວເຮົາ, ເວົ້າສະເພາະປະຊາຊົນຊາວແຂວງໄຊຍະບູລີ ຈຶ່ງໄດ້ພ້ອມພຽງກັນຈັດງານມະຫະກໍາບຸນຊ້າງນີ້ຂຶ້ນໃນແຕ່ລະປີ.

ຂ່າວ: ບຸນທີ

แชร์