ເມືອງພູວົງ ທຳລາຍສິນຄ້າຜິດກົດໝາຍ

  ເມືອງພູວົງ ແຂວງອັດຕະປື ໄດ້ຈູດທຳລາຍສິນຄ້ານອກລະບົບ, ສິນຄ້າເສື່ອມຄຸນນະພາບ ແລະສິນຄ້າໝົດອາຍຸຫຼາຍລາຍການ, ລວມມູນຄ່າ 39 ລ້ານກວ່າກີບ.

 ພິທີຈູດທໍາລາຍດັ່ງກ່າວຈັດຂຶ້ນບໍ່ດົນຜ່ານມານີ້ທີ່ຫ້ອງການອຸດສາຫະກຳ ແລະການຄ້າເມືອງ, ໂດຍການເຂົ້າຮ່ວມຂອງທ່ານ ທິດສະຫວັນ ໄຊຍະແສງ ຮອງເຈົ້າເມືອງພູວົງ, ມີທ່ານ ພູໄຊ ວໍລະລາດ ຮອງຫົວໜ້າພະແນກອຸດສາຫະກຳ ແລະການຄ້າແຂວງອັດຕະປື, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ວິໄລວັນ ໄຊຍະບຸນຮາຍ ຫົວໜ້າຫ້ອງການອຸດສາຫະກຳ ແລະການຄ້າເມືອງກ່າວວ່າ: ສິນຄ້າທີ່ນຳມາທຳລາຍຄັ້ງນີ້ເປັນສິນຄ້າທີ່ທາງເຈົ້າໜ້າທີ່ກວດກາການຄ້າເມືອງພູວົງໄດ້ລົງກວດກາຢູ່ບັນດາຫົວໜ່ວຍທຸລະກິດຫ້າງຮ້ານຂາຍຍົກ-ຂາຍຍ່ອຍຕາມຕະຫຼາດໃນຂອບເຂດທົ່ວເມືອງຊຶ່ງໄດ້ເຄື່ອນໄຫວມີ 45 ຄັ້ງ, ມີ 270 ເທື່ອຄົນ,

  ໄດ້ສ້າງບົດບັນທຶກຕັກເຕືອນຫົວໜ່ວຍທຸລະກິດ ມີ 12 ຄັ້ງ, ມີ 55 ສະບັບ, ໄດ້ຢຶດສິນຄ້າມີ 22 ລາຍການ, ລວມມູນຄ່າ 44 ລ້ານກ່ວາກີບ, ໃນນີ້ສິນຄ້າໝົດອາຍຸການນໍ້າໃຊ້ໝວດສະບຽງອາຫານມີ 10 ລາຍການ, ລວມມູນຄ່າ 22 ລ້ານກ່ວາກີບ, ໝວດເຄື່ອງໃຊ້ມີ 6 ລາຍການ,ລວມມູນຄ່າ 8 ລ້ານກ່ວາກີບ,ສິນຄ້ານອກລະບົບ, ເກືອດຫ້າມນຳເຂົ້າ ແລະຫ້າມນຳເຂົ້າມີ 6 ລາຍການ, ລວມມູນຄ່າ 13 ລ້ານກ່ວາກີບ, ສ່ວນປະເພດໄມ້ແມ່ນບໍ່ໄດ້ທຳລາຍ.

ຂ່າວ: ສຸດໃຈ

แชร์