ຕາມການໃຫ້ຂໍ້ມູນຂອງທ່ານ ຮ້ອຍເອກ ຈອນສະຫວັນ ບຸດສາຍໂຈ ຫົວໜ້າການທະຫານກອງຮ້ອຍທະຫານຊາຍແດນ 133 ທະຫານແຂວງຫຼວງນໍ້າທາໃນວັນທີ 5 ກຸມພາ 2021 ນີ້, ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຈະມີກຸ່ມຄົນບໍ່ດີເຄື່ອນໄຫວມົ້ວສຸມຄ້າ-ຂາຍຢາເສບຕິດປະເພດຢາບ້າຢູ່ຂອບເຂດຫຼັກໝາຍ 39 ຊາຍແດນທາງນໍ້າລະຫວ່າງລາວ-ມຽນມາເຂດຊຽງກົກເມືອງລອງ ແຂວງຫຼວງນໍ້າທາ,ຈາກນັ້ນກໍໄດ້ແຕ່ງຕັ້ງພະນັກງານວິຊາສະເພາະອອກເຄື່ອນໄຫວລາດຕະເວນຕາມຂອບເຂດ ຄວາມຮັບຜິດຊອບຂອງກົມກອງ.

 ພໍມາຮອດຕອນແລງເວລາ 16: 20 ໂມງ ຂອງວັນທີ 9 ກຸມພາ 2021,ໄດ້ປະກົດເຫັນຜູ້ຕ້ອງສົງໄສ 2 ຄົນ ຂີ່ລົດຈັກມາຈອດແຄມຂອງ ແລະເຫັນເຮືອກາບລໍາໜຶ່ງຂີ່ມາແຕ່ຝັ່ງປະເທດມຽນມາເຂົ້າມາຈອດຝັ່ງລາວ, ສະນັ້ນຈຶ່ງສະແດງຕົວເຂົ້າກວດຄົ້ນຈຶ່ງສາມາດກັກຕົວຜູ້ຖືກຫາໄດ້ 2 ຄົນ ຊື່ທ້າວຊາເຢີ, ອາຍຸ 25 ປີ, ທ້າວ ຊາທູ ອາຍຸ 24 ປີ, ທັງສອງອາຊີບຊາວສວນ, ຢູ່ບ້ານຕັບໄຮໃໝ່ ເມືອງລອງ ແຂວງຫຼວງນໍ້າທາ ພ້ອມຂອງກາງປະເພດຢາບ້າ 6 ຫໍ່, ມີ 36.360 ເມັດ, ລົດຈັກ 2 ຄັນ, ເງິນກີບ 15,74 ລ້ານກີບ, ເງິນຢວນ 900 ຢວນ, ເງິນບາດ 100 ບາດ ແລະໂທລະສັບ 6 ໜ່ວຍ, ສ່ວນຄູ່ຮ່ວມຂະບວນການແມ່ນໄດ້ຂີ່ເຮືອຫຼົບໜີໄປຝັ່ງປະເທດມຽນມາ.

ຜ່ານການສືບສວນ-ສອບສວນພວກກ່ຽວທັງ 2 ຄົນ ໄດ້ຮັບສາລະພາບວ່າ: ຢາເສບຕິດປະເພດຢາບ້າຈໍານວນດັ່ງກ່າວແມ່ນຂອງພວກກ່ຽວແທ້ເຊິ່ງໄດ້ພົວພັນຊື້ນຳຄູ່ຮ່ວມຂະບວນການດຽວກັນຊື່ທ້າວອຸ່ນແສງອາຊີບປະຊາຊົນຢູ່ບ້ານຊຽງລາບເມືອງ ແລະ ແຂວງທ່າຂີ້ເຫຼັກປະເທດມຽນນມາສ່ວນຜູ້ກ່ຽວແມ່ນໄດ້ຂີ່ເຮືອຫຼົບໜີ, ປະຈຸບັນຜູ້ຖືກຫາທັງ 2 ຄົນພ້ອມຂອງກາງຢາເສບຕິດ 36.360 ເມັດແມ່ນໄດ້ສົ່ງໃຫ້ທາງເຈົ້າໜ້າທີ່ ປກສ ເມືອງລອງ ສືບສວນ-ສອບສວນຂະຫຍາຍຜົນຫາກຸ່ມແກ້ງເພື່ອມາດຳ ເນີນຄະດີຕາມລະບຽບກົດໝາຍຕໍ່ໄປ.

แชร์