ຄະຕະລິສ ພາດເນີສ ສະຫຼຸບຄ້າເອເລັກໂຕຣນິກ

  ໃນວັນທີ 15 ກຸມພາ 2021 ທີ່ ນະຄອນຫຼວງວຽງຈັນ, ຄະຕະລິສ ພາດເນີສ ບໍລິສັດຝຶກອົບຮົມທັກສະທຸລະກິດການພັດທະນາຕົນເອງຈັດງານສະຫຼຸບປິດໂຄງການການຄ້າເອເລັກໂຕຣນິກສໍາລັບ mSMEs (e-Commerece for mSMEs) ເພື່ອເຜີຍແຜ່ຜົນໄດ້ຮັບ ແລະລະດົມຄວາມຄິດສໍາລັບບາດກ້າວຕໍ່ໄປຂອງການພັດ ທະນາທາງດ້ານການຄ້າເອເລັກໂຕຣນິກຊຶ່ງແມ່ນການລິເລີ່ມຂອງອົງການເພື່ອການພັດທະນາສາກົນຂອງອົດສະຕຣາລີຜ່ານຫ້ອງການອົດສະຕຣາລີດ້ານການເຈລະຈາການຄ້າໄດ້ຮັບການຈັດຕັ້ງໂດຍມູນນິທິເອເຊຍຊຶ່ງເປັນພາກໜຶ່ງຂອງການຊ່ວຍເຫຼືອດ້ານການຄ້າເອເລັກໂຕຣນິກສໍາລັບກອງທຶນທາງການຄ້າ.

  ທ່ານ ໂທນີ ແຄັມເບວ ຈາກບໍລິສັດ ຄະຕະລິສ ພາດເນີສ ໃຫ້ຮູ້ວ່າ: ອີງໃສ່ແຜນງານການອໍານວຍຄວາມສະດວກທາງດ້ານການຄ້າປີ2017-2022 ລາຍຮັບຂອງປະ ເທດຈາກຍອດການສົ່ງອອກແມ່ນມີພຽງແຕ່ 54% ຂອງ GDP ຊຶ່ງຕໍ່າກວ່າປະເທດໄທ 126%, ຫວຽດນາມ 178% ແລະກໍາປູເຈຍ 127%, ຊຶ່ງໃນທົ່ວໂລກມີຜູ້ບໍລິໂພກເກືອບ 3,47 ພັນລ້ານຄົນ ໃຊ້ຈ່າຍກັບສິນຄ້າ ແລະບໍລິການອອນລາຍເກືອບ2,4 ຕື້ໂດລາ ຈົນເຮັດໃຫ້ເປັນໂອກາດທາງການຄ້າຂາຍເປັນທີ່ສໍາຄັນຫຼາຍສໍາລັບ mSME ລາວ ແລະໃນໄລຍະປີ  2020 ທາງໂຄງການໄດ້ຈັດການສໍາມະນາປຶກສາຫາລືກັນລະຫວ່າງ mSME ລາວ ທີ່ຢູ່ໃນຂົງເຂດທຸລະກິດອາຫານກະສິກໍາ ແລະຫັດຖະກໍາໃນຂອບເຂດທົ່ວປະເທດຊຶ່ງສະຫຼຸບໄດ້ວ່າສິ່ງສໍາຄັນທີ່ຍັງຕ້ອງໄດ້ເອົາໃຈໃສ່ໃນວຽກງານການຄ້າເອເລັກໂຕຣນິກຄືການໃຫ້ຄວາມຮູ້ ແລະການສຶກສາແກ່ເຈົ້າຂອງກິດຈະການ ແລະພະນັກງານ, ການຈັດສົ່ງການຂົນສົ່ງ ແລະການຊໍາລະສະສາງ.

  ທ່ານ ນາງ ທາມະລາ ໄຟເລີ ຜູ້ອໍານວຍການໂຄງງານຂອງມູນນິທິເອເຊຍກ່າວວ່າ: “ການມີສ່ວນຮ່ວມຢ່າງກະຕືລືລົ້ນຂອງຜູ້ປະກອບການ mSME ຈາກພາກສ່ວນຕ່າງໆໃນ ສປປ ລາວ ແມ່ນກຸນແຈສໍາຄັນໃນການຈັດລຽງບຸລິມະສິດທີ່ສໍາຄັນໃຫ້ທຸກຄົນໄດ້ເຫັນເຖິງໂອກາດອັນດີໃນການຄ້າເອເລັກໂຕຣນິກທັງສໍາລັບຕະຫຼາດພາຍໃນກໍຄື ຂ້າມປະເທດ” ແລະການປຶກສາຫາລືຫຼາຍຄັ້ງໄດ້ພາໃຫ້ເກີດດອກອອກຜົນເປັນໂຄງການຍ່ອຍຫຼາຍອັນໃນການໃຫ້ຄວາມຊ່ອຍເຫຼືອແກ່ບັນດາ mSME ໃນນັ້ນລວມເຖິງຊຸດວີດີໂອຮຽນຮູ້ສາມຊຸດວິຊາທີ່ກວມເອົາຫົວຂໍ້ທີ່ຈໍາເປັນສໍາລັບເຈົ້າຂອງກິດຈະການພະນັກງານລະດັບປະຕິບັດງານເພື່ອໃຫ້ເຂົາເຈົ້າໄດ້ເອົາໄປປັບໃຊ້ເພື່ອພັດທະນາການຕະຫຼາດທາງເອເລັກໂຕຣນິກໃຫ້ມີປະສິດຕິພາບຍິ່ງຂຶ້ນການຊ່ອຍໃຫ້ຄໍາແນະນໍາໂດຍກົງແກ່ mSME ເພື່ອໃຫ້ເຂົາເຈົ້າໄດ້ກ້າວເຂົ້າສູ່ການເຮັດ e-commerce, ນອກນັ້ນຍັງມີການເຮັດບົດຄົ້ນຄວ້າ ແລະໃຫ້ຂໍ້ສະເໜີແນະໃນຂົງເຂດການຊໍາລະສະສາງແບບດີຈິຕອລເພື່ອຊຸກຍູ້ໃຫ້ການຄ້າເອເລັກໂຕຣນິກໃນ ສປປ ລາວ ໄດ້ຂະຫຍາຍໂຕຍິ່ງຂຶ້ນ.

  ສໍາລັບງານຄັ້ງນີ້ໄດ້ມີສ່ວນເຮັດໃຫ້ຜູ້ເຂົ້າຮ່ວມໄດ້ປະກອບຄໍາຄິດເຫັນເຮັດໃຫ້ຂໍ້ສະເໜີແນະນໍາໃນການຊຸກຍູ້ສົ່ງເສີມການຄ້າເອເລັກໂຕຣນິກໃນ ສປປ ລາວ ກໍຄືເສດຖະ ກິດໂດຍລວມໄດ້ຂະຫຍາຍໂຕຂຶ້ນຢ່າງໜັກແໜ້ນໂດຍສະເພາະກໍແມ່ນໄລຍະຫຼັງ COVID-19, ຂໍ້ສະເໜີແນະນໍາຕ່າງໆເຫຼົ່ານີ້ຍັງຈະເປັນປະໂຫຍດຢ່າງສູງໃຫ້ແກ່ມູນນິທິເອເຊຍແລະຄູ່ຮ່ວມພັດທະນາຕ່າງໆໄດ້ສືບຕໍ່ຜັນຂະຫຍາຍ ແລະສະໜັບສະໜູນໃຫ້ແກ່ສະພາບແວດລ້ອມທາງການຄ້າເອເລັກໂຕຣນິກທີ່ດີຂຶ້ນໃຫ້ແກ່ເສດຖະກິດຂອງ ສປປ ລາວ ອີກດ້ວຍ.

แชร์