ຫາລືເພື່ອປະກາດສິນຄ້າໂອດັອບ

  ວັນທີ 11 ກຸມພາ 2021 ຢູ່ພະແນກອຸດສາຫະກໍາ ແລະການຄ້າແຂວງຫຼວງພະບາງ, ໄດ້ຈັດກອງປະຊຸມປຶກສາຫາລືກ່ຽວກັບການໄຈ້ແຍກສິນຄ້າໜຶ່ງເມືອງໜຶ່ງຜະ ລິດຕະພັນແຫ່ງຊາດ ຫຼື ODOP ແຫ່ງຊາດປະຈຳປີ 2021 ໂດຍການເປັນປະທານຂອງທ່ານ ຄຳຕັນ ສົມພັນວິໄລ ຮອງຫົວໜ້າພະແນກອຸດສາຫະກຳ ແລະການຄ້າແຂວງ, ມີຫົວໜ້າຄະນະກໍາມະການຄັດເລືອກສິນຄ້າໜຶ່ງເມືອງໜຶ່ງຜະລິດຕະພັນຂັ້ນແຂວງພ້ອມດ້ວຍຜູ້ຕາງໜ້າຈາກພະແນກການ, ສະພາການຄ້າ ແລະ ອຸດສາຫະ ກຳ, ຫ້ອງການອຸດສາຫະກຳ ແລະການຄ້ານະຄອນຫຼວງພະບາງລວມເຖິງຜູ້ປະກອບການເຂົ້າຮ່ວມ.

  ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອປະຕິບັດຕາມແຜນພັດທະນາເສດຖະກິດ-ສັງຄົມຂອງແຂວງເວົ້າສະເພາະກໍ່ແມ່ນແຜນພັດທະນາວຽກງານອຸດສາຫະກຳ ແລະ ການຄ້າໃນການຊຸກຍູ້ສົ່ງເສີມການຜະລິດເປັນສິນຄ້າໂດຍສະເພາະຂະບວນການຜະລິດສິນຄ້າໂອດັອບໃຫ້ຫຼາກຫຼາຍ ແລະ ຂະຫຍາຍຕົວ, ກວມເອົາຫຼາຍຂົງເຂດພ້ອມທັງປະສານສົມທົບກັບບັນດາຂະແໜງການທີ່ກ່ຽວຂ້ອງ, ສຶກສາ, ຄົ້ນຄວ້າ, ໄຈ້ແຍກ ແລະປະຕິບັດຕາມ ຂັ້ນຕອນຄັດເລືອກສິນຄ້າເພື່ອນໍາສະເໜີກົມສົ່ງເສີມການຄ້າກະຊວງອຸດສາຫະກຳ ແລະການຄ້າພິຈາລະນາ, ຮັບຮອງ, ອອກໃບຢັ້ງຢືນ ແລະອະນຸຍາດການນຳໃຊ້ກາໝາຍໂອດັອບແຫ່ງຊາດໃຫ້ກັບຫົວໜ່ວຍທຸລະກິດທີ່ໄດ້ມາດຕະຖານທີ່ກໍານົດໄວ້.  

 ຜະລິດຕະພັນທີ່ນຳມາຄົ້ນຄວ້າໃນຄັ້ງນີ້ແມ່ນປະເພດຜະລິດຕະພັນຕໍ່າແຜ່ນແພປະກອບມີ: ສິ້ນຝ້າຍຕີນໝາກແຫຼະ, ສິ້ນຝ້າຍຕີນມ້ານ້ອຍ, ສິ້ນໄໝຕີນມ້ານ້ອຍ, ຜ້າບ່ຽງລາຍດອກກາບ, ຜ້າບ່ຽງລາຍນາກ, ຂອງທ່ານ ນາງ ໂຊກທະວີ ວົງພະຈັນ ບ້ານທົ່ງຈະເລີນ ນະຄອນຫຼວງພະບາງ ແຂວງຫຼວງພະບາງ.

 ທ່ານ ນາງໂຊກທະວີ ວົງພະຈັນ ໃນນາມເຈົ້າຂອງສິນຄ້າກໍ່ໄດ້ຂຶ້ນກ່າວປະຫວັດຄວາມເປັນມາຂອງທຸລະກິດ ແລະຄວາມເປັນມາຂອງສິນຄ້າໂດຍສັງເຂບ, ຈາກນັ້ນຄະນະກຳມະການຄັດເລືອກສິນຄ້າໂອດັອບຂັ້ນແຂວງກໍ່ໄດ້ຄົ້ນຄວ້າ ແລະໄຈ້ແຍກເອກະລັກຂອງສິນຄ້າຕາມບົດແນະນຳຂອງກະຊວງອຸດສາຫະກຳ ແລະການຄ້າ ແລະມີຄຳເຫັນແນະນຳໃຫ້ແກ່ຜູ້ປະກອບການເພື່ອໄປປັບປຸງແລະພັດທະນາຜະລິດຕະພັນຮັກສາໃຫ້ໄດ້ເອກະລັກສະເພາະຂອງຕົນທັງຮັບປະກັນຄຸນນະພາບ,ແນໃສ່ສ້າງ ແລະຂະຫຍາຍຕະຫຼາດໃຫ້ກວ້າງຂວາງ, ຊຸກຍູ້ສົ່ງເສີມຊາວກະສິກອນເພື່ອຄວາມຍືນຍົງຂອງວັດຖຸດິບ.

   ຜ່ານການຄົ້ນຄວ້າປຶກສາຫາລືຈາກຄະນະກຳມະການຄັດເລືອກສີນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດຂັ້ນແຂວງໄດ້ມີຄວາມເຫັນເປັນເອກະພາບເຫັນດີໃຫ້ສະເໜີຕໍ່ກະຊວງອຸດສາຫະກຳ ແລະ ການຄ້າໂດຍສະເພາະແມ່ນກົມສົ່ງເສີມການຄ້າຄົ້ນຄ້ວາ ແລະ ອອກໃບຢັ້ງຢືນການນຳໃຊ້ກາໝາຍສີນຄ້າໜຶ່ງເມືອງໜຶ່ງຜະລິດຕະ ພັນແຫ່ງຊາດໃຫ້ແກ່ສິນຄ້າດັ່ງກ່າວຕື່ມອີກ.

   ສີນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດແມ່ນຜະລິດຕະພັນທີ່ນຳໃຊ້ສີມືແຮງງານ, ພູມປັນຍາ, ຫົວຄິດປະດິດສ້າງ ແລະ ຊັບພະຍາກອນພາຍໃນທ້ອງຖິ່ນເປັນເອກະລັກຂອງທ້ອງຖິ່ນນັ້ນຊຶ່ງປະກອບມີຜະລິດຕະພັນສິນຄ້າ ແລະ ຮູບແບບການບໍລິການທີ່ມີມູນເຊື້ອ ແລະ ເປັນມໍລະດົກຕົກທອດກັນມາໂດຍຖືເປັນຊັບສິນທາງປັນຍາຂອງຜູ້ປະດິດຄິດແຕ່ງ, ແນໃສ່ສົ່ງເສີມຊຸກຍູ້ຂະບວນການຜະລິດເປັນສິນຄ້າຢູ່ຂັ້ນເມືອງ ແລະ ບ້ານໃຫ້ຟົດຟື້ນ ແລະ ຫຼາກຫຼາຍພ້ອມທັງປົກປ້ອງສິດແລະຜົນປະໂຫຍດຂອງຜູ້ຜະລິດ ແລະຜູ້ຊົມໃຊ້ປະກອບສ່ວນແກ່ການພັດທະນາເສດຖະກິດຂອງຊາດໃຫ້ເຕີບໃຫຍ່ເຂັ້ມແຂງ.

 ມາເຖິງປະຈຸບັນແຂວງຫຼວງພະບາງໄດ້ຮັບອະນຸຍາດ ແລະປະກາດໃຊ້ກາໝາຍສີນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼືODOP ແຫ່ງຊາດແລ້ວຈຳນວນ 10 ຫົວໜ່ວຍ, ລວມ 45 ລາຍການຜະລິດຕະພັນ ແລະພວມສະເໜີກົມສົ່ງເສີມການຄ້າກະຊວງອຸດສາຫະກຳ ແລະການຄ້າພິຈາລະນາ, ຮັບຮອງເພີ່ມອີກ 1 ຫົວໜ່ວຍ, 5 ລາຍການຜະລິດຕະພັນ.

ຂ່າວ: ສີສຸວັນ

แชร์