ເປີດໃຊ້ເສັ້ນທາງເບຕົງອ້ອມດອນໂຂງ

   ໃນວັນທີ 15 ກຸມພາ 2021 ໄດ້ມີພິທີເປີດການນຳໃຊ້ເສັ້ນທາງເບຕົງອ້ອມດອນໂຂງຍາວທັງໝົດ 43,5 ກິໂລແມັດ ຢູ່ເມືອງໂຂງ ແຂວງຈຳປາສັກ ພາຍຫຼັງສໍາເລັດການກໍ່ສ້າງໂດຍໄດ້ຮັບການຊ່ວຍເຫຼືອລ້າຈາກໂຄງການພັດທະນາເຂດເສດຖະກິດໃໝ່ສີພັນດອນມູນຄ່າ 12 ລ້ານກວ່າໂດລາສະຫະລັດ.

ໃຫ້ກຽດເຂົ້າຮ່ວມພິທີດັ່ງກ່າວ,ໂດຍທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການແລະການລົງທຶນ,ທ່ານ ວິໄລ ວົງບຸດດາຄຳ ເຈົ້າແຂວງຈຳປາສັກ, ທ່ານນາງ ຄໍາພູ ລິດທິສັກ ເຈົ້າເມືອງໂຂງ,ພ້ອມດ້ວຍບັນດາຂະແໜງການທີ່ກ່ຽວຂ້ອງຈາກສູນກາງ ແລະທ້ອງຖິ່ນ.

   ທ່ານ ລາຕີ ສີສຸພັນນະວົງ ຮອງປະທານບໍລິສັດຮ່ວມພັດທະນາສີພັນດອນຈຳກັດລາຍງານວ່າ: ເສັ້ນທາງເບຕົງອ້ອມດອນໂຂງນີ້ໄດ້ເລີ່ມລົງມືກໍ່ສ້າງໃນວັນທີ 6 ຕຸລາ 2018 ໂດຍໃຊ້ເວລາໃນການກໍ່ສ້າງທັງໝົດ 2 ປີ 4 ເດືອນ, ເປົ້າໝາຍໃນການສ້າງບໍ່ພຽງແຕ່ເປັນຂອງຂວັນໃຫ້ປະຊາຊົນຊາວເມືອງໂຂງເທົ່ານັ້ນ, ແຕ່ຍັງເປັນພັນທະ ຂອງບໍລິສັດເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງເມືອງໂຂງເຊິ່ງເປັນການສະແດງອອກເຖິງຄວາມຕັ້ງໃຈອັນເດັດດ່ຽວຂອງບໍລິສັດເພື່ອປະ ກອບສ່ວນເຂົ້າໃນການພັດທະນາຢູ່ແຂວງຈຳປາສັກ.

  ໂຄງການນີ້, ແມ່ນເປັນພຽງການເລີ່ມຕົ້ນລົງມືຂອງໂຄງການພັດທະນາເຂດເສດຖະກິດໃໝ່ສີພັນດອນ, ຊຶ່ງໃນແຕ່ລະໄລຍະການກໍ່ສ້າງພື້ນຖານໂຄງລ່າງ ແລະສິ່ງອຳ ນວຍຄວາມສະດວກນັ້ນແມ່ນຈະສາມາດຊ່ວຍຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນໂດຍສະເພາະແມ່ນຈະສ້າງໂອກາດອັນດີໃຫ້ແກ່ການພັດທະນາເສດຖະ ກິດ-ສັງຄົມແລະການທ່ອງທ່ຽວຂອງແຂວງຈຳປາສັກ.

ຂ່າວ: ສິງຄໍາ

แชร์