ເປີດທ່ອງທ່ຽວປ່າໂຄກໂອ່ງ-ມັ່ງ

  ວັນທີ 11 ກຸມພາ ທີ່ເມືອງຊົນນະບູລີ ແຂວງສະຫວັນນະເຂດໄດ້ຈັດພິທີເປີດການທ່ອງທ່ຽວທຳມະຊາດແບບອະນຸລັກປະຊາຊົນມີສ່ວນຮ່ວມເຂດອະນຸລັກປ່າໂຄກໂອ່ງ-ມັ່ງແຫ່ງຊາດບ້ານສະໜາມໄຊ ແລະບ້ານໜອງສອງຫ້ອງ ໂດຍການເຂົ້າຮ່ວມຂອງທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ-ປ່າໄມ້, ມີຮອງຫົວໜ້າອົງການສະຫະປະຊາຊາດເພື່ອພັດທະນາປະຈຳ ສປປ ລາວ, ມີບັນດາທ່ານຫົວໜ້າຫ້ອງການກະ ຊວງ, ຫົວໜ້າຮອງຫົວໜ້າກົມ-ຮອງຫົວ ໜ້າພະແນກ ຖວທ ແຂວງທ່ານເຈົ້າເມືອງຊົນນະບູລີຫົວໜ້າພະແນກການກ່ຽວຂ້ອງພ້ອມດ້ວຍປະຊາຊົນທັງ 2 ບ້ານເຂົ້າ ຮ່ວມ.

  ທ່ານຮອງຫົວໜ້າພະແນກ ຖວທ ແຂວງໄດ້ລາຍງານການຈັດຕັ້ງປະຕິບັດໂຄງການຄຸ້ມຄອງທີ່ດີ ແລະ ປ່າໄມ້ແບບຍືນຍົງຢູ່ໃນລະບົບນິເວດປ່າໂຄກພາກໃຕ້ ສປປ ລາວ ເປັນໂຄງການທີ່ໄດ້ຮັບການສະໜັບສະໜູນ ແລະຮ່ວມມືໂດຍແມ່ນກະຊວງກະສິກຳ ແລະ ປ່າໄມ້ໃນນາມຕ່າງໜ້າໃຫ້ລັດຖະບານແຫ່ງ ສປປ ລາວ ອົງການສະຫະປະຊາ ຊາດເພື່ອການພັດທະນາປະຈຳ ສປປ ລາວ ແລະກອງທຶນປົກປັກຮັກສາສິ່ງແວດລ້ອມໂລກໂຄງການດັ່ງກ່າວເລີ່ມຈັດຕັ້ງປະຕິບັດມາແຕ່ປີ 2017 ໂດຍກົມປ່າໄມ້ກະຊວງກະສິກຳ ແລະປ່າໄມ້ເປັນກະຊວງຫຼັກໃນການຈັດຕັ້ງປະຕິບັດເຊິ່ງໂຄງການປະກອບມີ 3 ອົງປະກອບ ແລະ 4 ໜ້າວຽກຫຼັກຄື ວຽກງານອະນຸລັກ ແລະຟື້ນຟູ, ວຽກງານຄຸ້ມຄອງ ແລະວາງແຜນນຳໃຊ້ທີ່ດິນວຽກງານທ່ອງທ່ຽວແບບອະນຸລັກ ແລະວຽກງານປັບປຸງຊີວິດການເປັນຢູ່ຂອງປະຊາຊົນໃນເຂດອະນຸລັກປ່າໂຄກໂອ່ງ-ມັ່ງ, ເຂດອະນຸ ລັກປ່າໂຄກໂອ່ງ-ມັ່ງມີເນື້ອທີ່ທັງໝົດ 93 ພັນເຮັກຕາ ແລະຕໍ່ມາໄດ້ຖືກຍົກລະດັບເປັນປ່າໂຄກໂອ່ງ-ມັ່ງ ແຫ່ງຊາດ 2020 ຊຶ່ງມີເນື້ອທີ່ 1,3 ແສນເຮັກຕາ ກວມເອົາ 5 ຕົວເມືອງຄື: ຊົນນະບູລີ,ສອງຄອນ,ທ່າປາງທອງ, ພີນ ແລະເມືອງພະລານໄຊເປັນຖິ່ນຢູ່ອາໃສຂອງສັດທີ່ໃກ້ຈະສູນພັນໃນລະດັບໂລກທີ່ມີຊື່ວ່າໂອ່ງ-ມັ່ງປະມານ 170 ກວ່າໂຕນອກນັ້ນຍັງມີສັດ ແລະພືດພັນອື່ນໆ 647 ກວ່າຊະນິດ ຊຶ່ງເໝາະແກ່ການພັດທະນາທີ່ຕິດພັນກັບການອະນຸລັກ.

   ມາຮອດປະຈຸບັນການຈັດຕັ້ງປະຕິບັດວຽກງານການພັດທະນາການທ່ອງທ່ຽວສະເພາະເຂດອະນຸລັກປ່າໂຄກໂອ່ງ-ມັ່ງ ແຫ່ງຊາດໄດ້ມີຜົນສຳເລັດໄດ້ຫຼາຍໆດ້ານພໍສົມຄວນ ແລະບໍລິການນັກທ່ອງທ່ຽວທີ່ມີຄວາມສົນໃຈທັງພາຍໃນ ແລະຕ່າງປະເທດບໍ່ວ່າຈະເປັນສິ່ງຮອງຮັບພື້ນຖານໂຄງລ່າງ ແລະສິ່ງອຳນວຍຄວາມສະດວກເຊັ່ນ: ທີ່ພັກ 1 ຫຼັງມີ 5 ຫ້ອງສາມາດຮັບແຂກໄດ້ 20 ຄົນຕໍ່ຄືນພ້ອມຫ້ອງນໍ້າ, ຫ້ອງອາຫານຮັບແຂກໄດ້ 30 ຄົນຕໍ່ຄັ້ງ, ຈຸດຕັ້ງແຄ້ມ 2 ຈຸດທີ່ສາມາດຮັບນັກທ່ອງທ່ຽວໄດ້ 30 ຄົນຕໍ່ຈຸດ, ຈຸດຫໍຄອຍຊົມວິວເບິ່ງໂອ່ງ-ມັ່ງ 1 ຈຸດ ພ້ອມນີ້ຍັງມີລົດຖີບກ້ອງຊ່ອງ ແລະເຄື່ອງມືສື່ສານຈຳນວນໜຶ່ງໄວ້ບໍລິການມີໜ່ວຍງານບໍລິການ ແລະກຸ່ມບໍລິການນັກທ່ອງທ່ຽວທັງໝົດ 3 ຈຸດຄື: ໜ່ວຍງານບໍລິການນັກທ່ອງທ່ຽວຢູ່ສູນອະນຸລັກປ່າໂຄກຊຶ່ງເປັນຈຸດບໍລິຫານ ແລະ ບໍລິການທ່ອງທ່ຽວຕາມລາຍການກຸ່ມບໍລິການນັກທ່ອງ ທ່ຽວບ້ານສະໜາມໄຊ ແລະບ້ານສອງຫ້ອງຈຳນວນ 6 ກຸ່ມໃນແຕ່ລະບ້ານ, ຊຶ່ງກຸ່ມເຫຼົ່ານີ້ໄດ້ຮັບການຝືກອົບຮົມດ້ານການບໍລິການສະເພາະດ້ານລາຍການທ່ອງທ່ຽວມີຂີ່ລົດເບີ່ງ ໂອ່ງ-ມັ່ງ ຕອນເຊົ້າ-ຕອນແລງ ແລະຕອນກາງຄືນ,ລາຍການທ່ອງທ່ຽວຍ່າງເບິ່ງໂອ່ງ-ມັ່ງຕອນເຊົ້າ-ຕອນແລງ ແລະຕອນກາງຄືນ, ລາຍການຂີ່ລົດຖີບເຄິ່ງວັນ ແລະ 1 ວັນ, ລາຍການຍ່າງປ່າ ແລະຂີ່ລົດຖີບ 2 ວັນ 1 ຄືນ ບ້ານສະໜາມໄຊ ແລະບ້ານສອງຫ້ອງ, ກິດຈະກຳກາງເຕັ້ນ ແລະກິດຈະກຳເບິ່ງ ໂອ່ງ-ມັ່ງ ດ້ວຍລົດຂອງນັກທ່ອງທ່ຽວເອງ.

แชร์