ທຸກຄົນມີລາຍໄດ້ ຕ້ອງແຈ້ງເສຍອາກອນໃຫ້ລັດ

  ເພື່ອໃຫ້ສາມາດຄຸ້ມຄອງ ແລະ ຕິດກັບບຸກຄົນທັງພາຍໃນ ແລະ ຕ່າງປະເທດທີ່ມີລາຍໄດ້ຢູ່ ສປປ ລາວ ໃນຂອບເຂດທົ່ວປະເທດເຊັ່ນ: ລັດຖະກອນ, ພະນັກງານ, ທະ ຫານ, ຕຳຫຼວດ, ນັກທຸລະກິດ, ແມ່ຄ້າທົ່ວໄປແລະຂາຍເຄື່ອງອອນລາຍ, ນັກກີລາ, ນັກສະແດງ, ນາຍຊ່າງ, ຊ່ຽວຊານ, ທີ່ປຶກສາ,ນາຍຈ້າງກຳມະກອນ, ຊາຍຜູ້ອອກແຮງງານ ແລະອື່ນໆ ແລະທັງເປັນການຊຸກຍູ້ສົ່ງເສີມໃຫ້ຜູ້ມີລາຍໄດ້ທີ່ໄດ້ປະຕິບັດພັນທະຂອງຕົນຕໍ່ລັດໄດ້ຮັບນະໂຍບາຍຕ່າງໆຕາມກົດໝາຍກຳນົດ, ນອກຈາກນັ້ນຍັງເປັນການຄຸ້ມຄອງຖານຂໍ້ມູນຜູ້ມີລາຍໄດ້ເຂົ້າໃນລະບົບທັງໝົດແນໃສ່ເກັບລາຍຮັບເຂົ້າງົບປະມານແຫ່ງລັດໃຫ້ຖືກຕ້ອງ, ຄົບຖ້ວນ, ໂປ່ງໃສ, ຍຸຕິທຳ ແລະ ປະກອບສ່ວນເຂົ້າໃນການສ້າງສາພັດທະນາເສດຖະກິດ-ສັງຄົມຂອງຊາດ.

 ໂດຍອີງຕາມມາດຕາ 6 ຂອງກົດໝາຍວ່າດ້ວຍອາກອນລາຍໄດ້ສະບັບເລກທີ 67/ສພຊ, ລົງວັນທີ 18 ມິຖຸນາ 2019, ໃນວັນທີ 10 ກຸມພາ 2021 ກະຊວງການເງິນໄດ້ອອກແຈ້ງມາຍັງບັນດາທ່ານທີ່ກ່າວມາຂ້າງເທິງນັ້ນເພື່ອໃຫ້ມາລົງທະບຽນອອກເລກປະຈຳຕົວຜູ້ເສຍ ອາກອນຢູ່ຫ້ອງການສ່ວຍອາກອນທຸກຂັ້ນ,ສ່ວນກຳນົດເວລາໃນການລົງທະບຽນເລກປະຈຳຕົວຜູ້ເສຍອາກອນແມ່ນບໍ່ໃຫ້ກາຍວັນທີ 30 ມິຖຸນາ 2021.

  ສຳລັບເອກະສານປະກອບ ແລະຂໍ້ມູນທີ່ຕ້ອງກະກຽມມີບັດປະຈຳຕົວ/ປຶ້ມໜັງສືຜ່ານແດນທີ່ຍັງບໍ່ໝົດອາຍຸນຳໃຊ້; ປຶ້ມສຳມະໂນຄົວ; ເບີໂທລະສັບທີ່ໄດ້ລົງທະບຽນຢັ້ງ ຢືນຕົວຕົນແລ້ວທຸກເລກໝາຍ; ອາຊີບ (ໃຫ້ລະບຸສະຖານທີ່ເຮັດວຽກ, ຕຳແໜ່ງຢ່າງຈະແຈ້ງ); ເລກບັນຊີທະນາຄານທຸກບັນຊີທີ່ມີ ແລະເລກບັດປະກັນສັງຄົມ.

  ທັງນີ້ກະຊວງການເງິນໄດ້ມອບໃຫ້ກົມສ່ວຍສາອາກອນ, ສ່ວຍສາອາກອນປະຈໍາແຂວງ, ນະຄອນຫຼວງ, ສ່ວຍສາອາກອນປະຈຳເມືອງ, ນະຄອນກະກຽມພ້ອມທັງອຳ ນວຍຄວາມສະດວກໃຫ້ບຸກຄົນທັງພາຍໃນ ແລະຕ່າງປະເທດທີ່ມີລາຍໄດ້ຢູ່ ສປປ ລາວ ໃນຂອບເຂດທົ່ວປະເທດ ແລະປະຕິບັດຕໍ່ຜູ້ລະເມີດຕາມລະບຽບກົດໝາຍຢ່າງເຄັ່ງຄັດ.

แชร์