40% ເຮືອນສ້າງໃຫ້ປະຊາຊົນຖືກເຂື່ອນນໍ້າເທີນ 1

  ວັນທີ 8 ກຸມພາ ຜ່ານມາທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ນວນສະຫັວນ ແສງມະນີ ຮອງປະທານສະພາປະຊາຊົນແຂວງພ້ອມດ້ວຍຄະນະໄດ້ລົງຕິດຕາມ, ກວດກາການຈັດສັນທີ່ດິນປຸກສ້າງ, ດິນກະສິກຳ ແລະການກໍ່ສ້າງເຮືອນໃຫ້ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າເທິນ 1, ມີທ່ານ ພອນສັກ ວິໄລສັກ ປະທານກຸ່ມບໍລິສັດ ພອນສັກ ຈຳກັດ ໃນນາມຜູ້ພັດທະນາໂຄງການກໍ່ສ້າງເຂື່ອນໄຟຟ້ານໍ້າເທີນ 1 ແລະ ໜ່ວຍງານຄຸ້ມຄອງການທົດແທນຄ່າເສຍຫາຍ ແລະຈັດສັນຍົກຍ້າຍປະຊາຊົນທີ່ຖືກຜົນກະທົບຈາກໂຄງການທັງພາກລັດ ແລະໂຄງການຮ່ວມພາທາງ.

  ທ່ານ ຄຳເຕີມ ອິນທິລາດ ຜູ້ຈັດການພາກສະໜາມໂຄງການເຂື່ອນໄຟຟ້ານໍ້າເທີນ 1 ໄດ້ລາຍງານຄວາມຄືບໜ້າບັນດາໜ້າວຽກວ່າ: ໂດຍປະຕິບັດຕາມນິຕິກຳຂອງຂັ້ນເທິງ ແລະການເຫັນດີຂອງປະຊາຊົນທີ່ມີເນື້ອທີ່ຖືກຜົນກະທົບຈາກໂຄງການກໍ່ສ້າງລວມມີ ເມືອງວຽງທອງ ແລະເມືອງຄຳເກີດຄະນະປະຕິບັດງານພາກສະໜາມໂຄງ ການ ແລະພາກລັດໄດ້ປະສານງານເຊິ່ງກັນ ແລະກັນໂດຍການເຜີຍແຜ່ເອກະສານ,ນິຕິກຳທີ່ກ່ຽວຂ້ອງໃຫ້ປະຊາຊົນທີ່ຖືກຜົນກະທົບຈາກໂຄງການໄດ້ຮັບຮູ້ ແລະເຂົ້າໃຈ, ໄດ້ກຳນົດພື້ນທີ່ດິນປຸກສ້າງ, ດິນກະສິກຳເພື່ອລ້ຽງສັດໃຫຍ່ ແລະເຂດດິນປຸກເຮືອນທີ່ຢູ່ອາໃສ, ການຈັດສັນດິນປຸກສ້າງແມ່ນຕິດກັບບ້ານຈັດສັນຢູ່ບ້ານຫ້ວຍຫອຍໃກ້ກັບເສັ້ນທາງ 1D ໃນເນື້ອທີ່ 5 ເຮັກຕາ ແມ່ນຈັດໃຫ້ສະເພາະຄອບຄົວທີ່ມີເນື້ອທີ່ທຳການຜະລິດຈຳນວນຫຼາຍຖືກຜົນກະທົບ ແລະຈະເຂົ້າມາທຳການຜະລິດລ້ຽງສັດໃຫຍ່ຢູ່ເຂດບ້ານຫ້ວຍຫອຍ, ປະຈຸບັນເນື້ອທີ່ດັ່ງກ່າວກຳລັງບຸກເບີກ ແລະ ຈະໄດ້ປັບພື້ນທີ່ທັງໝົດ 5 ເຮັກຕາ ໃຫ້ຮາບພຽງແລ້ວຈະໄດ້ແບ່ງເປັນລ໋ອກ, ອອກໃບກຳມະສິດນຳໃຊ້ທີ່ດິນໃຫ້ບຸກຄົນນຳໃຊ້ຕໍ່ໄປ.

  ສຳລັບການຈັດສັນດິນລ້ຽງສັດໃຫຍ່ໃນເນື້ອທີ່ 1.400 ເຮັກຕາ, ປະຈຸບັນແມ່ນຢູ່ໃນໄລຍະບຸກເບີກເສັ້ນທາງເພື່ອແບ່ງເຂດໃຫ້ຄອບຄົວນຳເອົາສັດໄປລ້ຽງ, ສຳລັບການກໍ່ສ້າງເຮືອນທີ່ຢູ່ອາໃສໃຫ້ປະຊາຊົນຢູ່ບ້ານເມືອງມ່ວນມີທັງໝົດ 88 ຫຼັງ,ໃນນັ້ນມີ 1 ຫຼັງປຸກໃຫ້ຄອບຄົວອານາຖາໂດຍເລີ່ມລົງມືກໍ່ສ້າງມາແຕ່ຕົ້ນເດືອນທັນວາ 2020 ມາຮອດປະຈຸບັນສຳເລັດແລ້ວປະມານ 40 % ຂອງໜ້າວຽກທັງໝົດ, ບັນດາໜ້າວຽກດັ່ງກ່າວຄາດວ່າທ້າຍເດືອນມິຖຸນາ 2021 ຈະໃຫ້ສຳເລັດ ແລະມອບ-ຮັບຕາມແຜນການທີ່ວາງໄວ້.

ໂອກາດນີ້ ທ່ານເຈົ້າແຂວງບໍລິຄຳໄຊ ຍັງໄດ້ເນັ້ນໃຫ້ໜ່ວຍງານຄຸ້ມຄອງການທົດແທນຄ່າເສຍຫາຍ ແລະຈັດສັນຍົກຍ້າຍປະຊາຊົນທີ່ຖືກຜົນກະທົບຈາກໂຄງການທັງພາກລັດ ແລະໂຄງການຈົ່ງໄດ້ປຶກສາຫາລືເຊິ່ງກັນ ແລະ ກັນເປັນປະຈຳ, ຕ້ອງໄດ້ວາງແຜນໄລຍະສັ້ນ,ໄລຍະຍາວຂອງແຕ່ລະໜ້າວຽກ,ປະຕິບັດໜ້າທີ່ດ້ວຍຄວາມຮັບຜິດຊອບສູງໃຫ້ມີຜົນສຳເລັດຕາມຄາດໝາຍທີ່ວາງໄວ້.

แชร์