ທ່ານ ບຸນທອງ ຈິດມະນີ ຢ້ຽມຢາມ ແລະເຮັດວຽກຢູ່ຫີນເຫີບ

 ວັນທີ 12 ກຸມພາ 2021 ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກຜູ້ປະຈໍາການຄະນະເລຂາທິການສູນກາງພັກຮອງນາຍົກລັດຖະມົນຕີຮອງປະທານກໍາມະການເລືອກຕັ້ງລະດັບຊາດຫົວໜ້າອະນຸກໍາມະການໂຄສະນາປຸກລະດົມຂະບວນການພ້ອມດ້ວຍຄະນະໄດ້ລົງເຄື່ອນໄຫວຕິດຕາມ,ກວດກາການຝຶກອົບຮົມ, ໂຄສະນາ ແລະປຸກລະດົມຂະບວນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະມາຊິກສະພາປະຊາຊົນຂັ້ນແຂວງຊຸດທີ II ຢູ່ເມືອງຫີນເຫີບ ແຂວງວຽງ ຈັນ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຄໍາພັນ ສິດທິດໍາພາ ກຳມະການສູນກາງພັກເຈົ້າ ແຂວງໆວຽງຈັນ,ທ່ານ ວອນວໍ ລະສານ ກຳມະການພັກແຂວງເລ ຂາພັກເມືອງເຈົ້າເມືອງຫີນເຫີບ, ມີພະນັກງານຫຼັກແຫຼ່ງ, ຂະແໜງການອ້ອມຂ້າງເມືອງ, ອົງການປົກຄອງບ້ານຈາກ 4 ບ້ານຄື: ບ້ານຫີນ ເຫີບເໜືອ,ບ້ານຫີນເຫີບໃຕ້, ບ້ານຫີນໂງ່ນ, ບ້ານຫ້ວຍອີເລີດເຂົ້າຮ່ວມ.

  ການລົງເຄື່ອນໄຫວໃນຄັ້ງນີ້ແມ່ນເພື່ອຕິດຕາມກວດກາ ແລະກໍາສະພາບການກ່ຽວກັບການກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນແຂວງຊຸດທີ II ແລະຮັບຟັງການລາຍງານຄວາມພ້ອມດ້ານຕ່າງໆຂອງຄະນະກຳມະການເລືອກຕັ້ງເມືອງຫີນເຫີບໃນບາດກ້າວທີ 1 ແລະທິດທາງແຜນການບາດກ້າວທີ 2 ໃຫ້ຮູ້ວ່າຜູ້ມີສິດປ່ອນບັດເລືອກຕັ້ງທີ່ມີອາຍຸ 18 ປີ ຂຶ້ນໄປທົ່ວເມືອງມີທັງໝົດ 20.767 ຄົນ ຍິງ 9.898 ຄົນ, ຈຳນວນຈຸດໜ່ວຍຫີບປ່ອນບັດເລືອກຕັ້ງໃນທົ່ວເມືອງມີທັງໝົດ 35 ຈຸດ ແລະ 13 ຖົງ ເຄື່ອນທີ່ຟັງການລາຍງານຂອງຄະນະກໍາມະການເລືອກຕັ້ງຂັ້ນບ້ານຈາກ 4 ບ້ານ, ຫຼັງຈາກນັ້ນທ່ານ ຄໍາພັນ ສິດທິດໍາພາ ໄດ້ມີຄໍາເຫັນຊີ້ນໍາເປັນຕົ້ນແມ່ນວຽກງານສ້າງຂະບວນການປຸກລະດົມປະຊາຊົນຜູ້ມີສິດເລືອກຕັ້ງໃຫ້ໄປໃຊ້ສິດຂອງຕົນພາຍຫຼັງທີ່ໄດ້ຮັບຟັງການລາຍ ງານທ່ານຮອງນາຍົກລັດຖະມົນຕີໄດ້ສະແດງຄວາມຍ້ອງຍໍຊົມເຊີຍຕໍ່ການນຳຂອງເມືອງ, ຂອງບ້ານທີ່ໄດ້ເອົາໃຈໃສ່ໃນການຈັດຕັ້ງປະຕິບັດກ່ຽວກັບການກະກຽມການເລືອກຕັ້ງທີ່ໄດ້ຮັບຜົນສຳເລັດຫຼາຍດ້ານເພື່ອຮັບປະກັນໃຫ້ການເລືອກຕັ້ງໃຫ້ໄດ້ຮັບ 300/100% ຄື: ມີສິດປ່ອນບັດເລືອກຕັ້ງ 100%, ຮັບປະກັນບໍ່ໃຫ້ມີບັດຕາຍ 100%, ມີຄວາມສະຫງົບ 100%. ນອກນີ້, ກໍໄດ້ສະແດງຄວາມເປັນຫ່ວງເປັນໃຍ ແລະໄດ້ເນັ້ນໃຫ້ການຈັດຕັ້ງເມືອງ, ບ້ານເອົາໃຈໃສ່ໃນການປ້ອງກັນພະຍາດໂຄວິດ-19, ນອກນີ້ທ່ານຮອງນາຍົກກໍໄດ້ມີບາງຄໍາເຫັນຊີ້ນໍາຕື່ມອີກເປັນຕົ້ນຄື:

1. ສະເໜີໃຫ້ເມືອງ,ບ້ານພ້ອມກັນເບິ່ງຄືນວຽກງານທັງໝົດຂອງການເລືອກຕັ້ງວ່າອັນໃດທີ່ມີຄວາມພ້ອມ ແລະອັນໃດທີ່ຍັງບໍ່ມີຄວາມພ້ອມ ແລະພ້ອມກັນສືບຕໍ່ເຮັດໃຫ້ສຳເລັດເພາະເວລາໃນການເລືອກຕັ້ງກໍໃກ້ເຂົ້າມາແລ້ວ,ເອົາໃຈໃສ່ສືບຕໍ່ສຳລັບຜູ້ມີສິດເລືອກຕັ້ງໃຫ້ເບິ່ງຄືນຜູ້ມີສິດເລືອກຕັ້ງໃຫ້ເອົາໃຈໃສ່ຕໍ່ຜູ້ທີ່ມີໃບຢັ້ງຢືນຕ້ອງໃຫ້ຄຸ້ມຄອງນັບແຕ່ນີ້ຈົນກວ່າຈະມີການປ່ອນບັດເລືອກຕັ້ງສຳເລັດຫ້າມບໍ່ໃຫ້ເຂົາເຈົ້າເດີນທາງອອກຈາກພື້ນທີ່ຈົນກວ່າຈະມີການເລືອກຕັ້ງສຳເລັດ.
2. ສືບຕໍ່ໂຄສະນາແນະນຳຜູ້ທີ່ລົງສະໝັກເລືອກຕັ້ງໃຫ້ທົ່ວເຖິງເລິກເຊິ່ງທຸກດ້ານທຸກເຂດພ້ອມແນະນຳລະບຽບການປ່ອນບັດເລືອກຕັ້ງໃຫ້ຜູ້ທີ່ມີສິດເລືອກຕັ້ງເຂົ້າໃຈລະ ບຽບການປ່ອນບັດເລືອກຕັ້ງ.
3. ສືບຕໍ່ເອົາໃຈໃສ່ຫຼາຍຂຶ້ນຕື່ມຕໍ່ກັບວຽກງານປ້ອງກັນຊາດ-ປ້ອງກັນຄວາມສະຫງົບໂດຍສະເພາະໄລຍະການເລືອກຕັ້ງໃຫ້ໄດ້ 100/100%.
4. ສືບຕໍ່ນຳພາ ແລະຊຸ້ກຍູ້ຂະບວນການຕ່າງໆໃຫ້ເປັນຂະບວນການຟົດຟື້ນເປັນຕົ້ນແມ່ນຂະບວນການເຂົ້າຮ່ວມເລືອກຕັ້ງສະມາຊິກ ສສຊ ແລະສສຂ ໃຫ້ມີຄວາມຄຶກ ຄື້ນມ່ວນຊື່ນ.
5. ສືບຕໍ່ເພີ່ມທະວີການນຳພາຂອງຄະນະພັກແຕ່ລະຂັ້ນ (ເມືອງ, ຮາກຖານ ແລະ ໜ່ວຍພັກ) ຊີ້ນຳ-ນຳພາ ໃຫ້ທົ່ວເຖິງໂດຍສະເພາະແມ່ນການນຳພາກ່ຽວກັບການ ເລືອກຕັ້ງເຮັດໃຫ້ປະຊາຊົນຮັບຮູ້ເຂົ້າໃຈຄວາມໝາຍຄວາມສຳຄັນຂອງການເລືອກຕັ້ງວ່າເປັນສິດ ແລະພັນທະຂອງພົນລະເມືອງລາວທຸກຊັ້ນຄົນ, ເຮັດໃຫ້ຜູ້ທີ່ມີສິດປ່ອນບັດເລືອກຕັ້ງມີຄວາມຕື່ນຕົວ.

ຂ່າວ: ຕູ່ນາ ເລົ່າຖາວອນ

แชร์