ຝຶກອົບຮົມເຕັກນິກ ແລະຂັ້ນຕອນການປູກຜັກອິນຊີ

 ຕາມແຜນພັດທະນາເສດຖະກິດຂອງລັດຖະບານວາງອອກໃນການສ້າງສາພັດທະນາເສດຖະກິດຄອບຄົວໃຫ້ດີຂຶ້ນເທື່ອລະກ້າວໃນວັນທີ 9 ກຸມພາ 2021 ຫ້ອງການກະສິກຳ ແລະປ່າໄມ້ເມືອງຄຳເກີດແຂວງບໍລິຄຳໄຊໄດ້ຈັດຝຶກອົບຮົມເຕັກນິກ ແລະຂັ້ນຕອນການປູກຜັກອິນຊີໃຫ້ແກ່ປະຊາຊົນກຸ່ມປູກຜັກບ້ານນາຫາດຈຳນວນ 42 ຄອບ ຄົວຂອງກຸ່ມພັດທະນາໜອງອໍ້-ນາແປ່ ຊຶ່ງໃຫ້ກຽດເປັນປະທານໂດຍທ່ານ ສົມໃຈ ແກ້ວສຸວັນ ຮອງເຈົ້າເມືອງຄຳເກີດ,ມີບັນດາຫົວໜ້າຫ້ອງການ, ພະນັກງານ ແລະປະ ຊາຊົນເຂົ້າຮ່ວມ.

  ໃນພິທີດັ່ງກ່າວທ່ານ ສົມໃຈ ແກ້ວສຸວັນ ຮອງເຈົ້າເມືອງຄຳເກີດ ໃຫ້ຮູ້ວ່າການປູກຜັກໃຫ້ສະອາດປອດໄພຕໍ່ກັບຜູ້ຜະລິດ, ຜູ້ບໍລິໂພກ ແລະເປັນມິດກັບສີ່ງແວດລ້ອມເຮົາຕ້ອງມີເຕັກນິກ ແລະຂັ້ນຕອນໃນການປູກເພື່ອເຮັດໃຫ້ໄດ້ຮັບຜົນຜະລິດທີ່ສູງ, ການຝຶກອົບຮົມແມ່ນໄດ້ເລີ່ມຕົ້ນຈາກການຮຽນຮູ້ທາງດ້ານປະສົບການຕົວຈິງ ຫຼືວ່າເປັນການແລກປ່ຽນບົດຮຽນທາງດ້ານວິຊາການເພື່ອພັດທະນາວຽກງານປູກຝັງໃຫ້ມີບາດກ້າວຂະຫຍາຍຕົວຢ່າງຕໍ່ເນື່ອງ, ການປູກຜັກໃຫ້ມີຄວາມສະອາດ, ປອດໄພ  ແລະເປັນມິດກັບສີ່ງແວດລ້ອມ,ເປັນການຮັກສາລະບົບນິເວດ,ຈຸລິນຊີໃນດິນໃຫ້ມີຄວາມຍືນຍົງ ແລະໝັ້ນຄົງ,ຕາມແນວທາງແຜນການຂອງລັດຖະບານຫັນເອົາວຽກງານຊຸກ ຍູ້ສົ່ງເສີມກະສິກຳສີຂຽວເປັນການສ້າງຕະຫຼາດຂາຍຜັກອິນຊີໃນອະນາຄົດ, ເພື່ອສ້າງມູນຄ່າເພີ່ມໃນການຜະລິດໃຫ້ກາຍເປັນມິດຕໍ່ກັບທຳມະຊາດ ແລະສີ່ງແວດລ້ອມ.

  ທ່ານຍັງໄດ້ຮຽກຮ້ອງມາຍັງນັກສຳມະນາກອນທຸກທ່ານຈົ່ງພ້ອມກັນເອົາໃຈໃສ່ການຝຶກອົບຮົມໃນຄັ້ງນີ້ເພື່ອນຳເອົາຄວາມຮູ້,ຄວາມສາມາດມາພັດທະນາໃນການປູກພືດໃຫ້ຫຼາຍ  ແລະໄດ້ຮັບຜົນຜະລິດທີ່ສູງເພື່ອສົ່ງອອກປ້ອນຕະຫຼາດທັງພາຍໃນ ແລະຕ່າງແຂວງ, ເພື່ອພັດທະນາເສດຖະກິດຄອບຄົວໃຫ້ດີຂຶ້ນເທື່ອລະກ້າວການຝຶກອົບຮົມເຕັກນິກ ແລະຂັ້ນຕອນການປູກຜັກອິນຊີໃນຄັ້ງນີ້ໄດ້ຮັບການສະໜັບສະໜູນຈາກແຜນງານ 030 ແລະຊຶ່ງຈະໄດ້ດຳເນີນໄປເປັນເວລາ 5 ວັນ ຈຶ່ງສຳເລັດ.

แชร์