ອັດຕະປື ເຜີຍແຜ່ດຳລັດໃຫ້ຫົວໜ່ວຍທຸລະກິດ

  ວັນທີ 9 ກຸມພາ 2021 ນີ້ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງອັດຕະປືຮ່ວມກັບກົມຄຸ້ມຄອງການທ່ອງທ່ຽວກະຊວງຖະແຫຼງຂ່າວ, ວັດທະ ນະທຳ ແລະທ່ອງທ່ຽວ, ໄດ້ເຜີຍແຜ່ດຳລັດນາຍົກລັດຖະມົນຕີວ່າດ້ວຍການບັນເທີງໃຫ້ແກ່ຜູ້ປະກອບການຮ້ານອາຫານ-ຮ້ານບັນເທີງ, ເຮືອນພັກ ແລະໂຮງແຮມພາຍ ໃນແຂວງອັດຕະປືຂຶ້ນທີ່ຫ້ອງວ່າການເມືອງສາມັກຄີໄຊ, ໂດຍເປັນກຽດເຂົ້າຮ່ວມຂອງ ທ່ານ ກົງຈັກ ສີສະຫວາດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງອັດຕະປື, ທ່ານ ນາງ ດາລານີ ພົມມະວົງສາ ຫົວໜ້າກົມຄຸ້ມຄອງການທ່ອງທ່ຽວກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວ, ມີຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ 5 ເມືອງ, ພ້ອມດ້ວຍຜູ້ປະກອບການຮ້ານອາຫານ-ຮ້ານກິນດື່ມ ແລະໂຮງແຮມເຂົ້າຮ່ວມ.

  ໃນວາລະກອງປະຊຸມຜູ້ເຂົ້າຮ່ວມໄດ້ຮັບຟັງການເຜີຍແຜ່ດຳລັດຂອງນາຍົກລັດຖະມົນຕີເລກທີ 135/ລບ ວ່າດ້ວຍການບັນເທີງຊຶ່ງປະປອບມີ 10 ໝວດ, 50 ມາດ ຕາ, ແຕ່ລະໝວດໄດ້ກຳນົດວ່າດ້ວຍບົດບັນຍັດທົ່ວໄປ,ປະເພດ ແລະມາດຕະຖານການບໍລິການບັນເທີງ,ການດຳເນີນທຸລະກິດບັນເທີງ,ສິດ ແລະພັນທະ, ຂໍ້ຫ້າມ, ການແກ້ໄຂຂໍ້ຂັດແຍ່ງ, ການປະຕິບັດຄ່າທຳນຽມການບໍລິການ,ການຄຸ້ມຄອງ ແລະກວດກາ,ນະໂຍບາຍຕໍ່ຜູ້ມີຜົນງານ ແລະມາດຕາການຕໍ່ກັບຜູ້ລະເມີດ ແລະບົດບັນຍັດສຸດ ທ້າຍໃນການປະຕິບັດ, ຊຶ່ງໄລຍະຜ່ານມາພະແນກຖະແຫຼງຂ່າວ,ວັດທະນະທໍາ ແລະທ່ອງທ່ຽວແຂວງອັດຕະປືໄດ້ໃຊ້ມາດຕາການປັບໃໝຕໍ່ຜູ້ລະເມີດ, ມີເມືອງສາມັກຄີໄຊ 5 ຮ້ານ, ໄຊເສດຖາຢຶດອຸປະກອນ ແລະ ປັບໃໝ 11 ຮ້ານ, ຊານໄຊ 2 ຮ້ານ, ເມືອງພູວົງ ປິດຮ້ານກີນດື່ມ 1 ຮ້ານ, ທັງນີ້ກໍ່ເພື່ອກຳນົດຫຼັກການ, ລະບຽບການ ແລະມາດຕາການກ່ຽວກັບການຄຸ້ມຄອງຕິດຕາມກວດກາທຸລະກິດບໍລິການບັນເທີງໃຫ້ມີຄວາມເປັນລະບຽບຮຽບຮ້ອຍ,ສະຫງົບປອດໄພໄດ້ມາດຕະຖານ ແລະເປັນເອກະ ພາບໃນທົ່ວປະເທດເພື່ອອະນຸລັກປົກປັກຮັກສາໂຄສະນາສົ່ງເສີມສິລະປະ,ວັດທະນະທໍາ,ຮີດຄອງປະເພນີຂອງຊາດໃຫ້ມີຄວາມຍືນຍົງ ແລະ ຂະຫຍາຍຕົວເຂົ້າສູ່ສາກົນ.

ຂ່າວ: ທິດປະສົງ

แชร์