ຫົວພັນກຽມພ້ອມເລືອກຕັ້ງ ສສຊ ແລະສສຂ

  ທົ່ວແຂວງຫົວພັນມີພົນລະເມືອງທີ່ມີສິດປ່ອນບັດເລືອກຕັ້ງທັງໝົດ 160,596 ຄົນ, ມີໜ່ວຍປ່ອນບັດເລືອກຕັ້ງທັງໝົດ 420 ໜ່ວຍ,ຊຶ່ງການກະກຽມບັນດາໜ້າ ວຽກຂອງຄະນະກໍາມະການເລືອກຕັ້ງຂັ້ນແຂວງ, ຂັ້ນເມືອງມາເຖິງປະຈຸບັນນີ້ມີຄວາມພ້ອມໃນລະດັບສູງສົມຄວນແລະຄາດວ່າຈະມີຄວາມຮັບປະກັນໃຫ້ສໍາເລັດຕາມຄາດ ໝາຍທີ່ວາງໄວ້.

  ທ່ານ ສົມສັກ ດອນຈານິດ ຄະນະອະນຸກຳມະການເລຂານຸການ, ໂຄສົກຄະນະກຳມະການເລືອກຕັ້ງຂັ້ນແຂວງໆຫົວພັນຖະແຫຼງການຫວ່າງບໍ່ດົນມານີ້ວ່າ: ເພື່ອກະ ກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ II, ຄະນະປະຈຳພັກແຂວງ ແລະຄະ ນະກໍາມະການເລືອກຕັ້ງຂັ້ນແຂວງໄດ້ເອົາໃຈໃສ່ຊີ້ນໍາ-ນໍາພາຢ່າງໃກ້ສິດດ້ວຍຄວາມຮັບຜິດຊອບສູງຊຶ່ງພາກສ່ວນທີ່ກ່ຽວຂ້ອງໄດ້ມີການກະກຽມບັນດາເງື່ອນໄຂຕ່າງໆເລີ່ມແຕ່ທ້າຍເດືອນຕຸລາ 2020 ເປັນຕົ້ນມາ, ຜ່ານການກະກຽມຄວາມພ້ອມດ້ານຕ່າງໆໃຫ້ແກ່ການດຳເນີນການປ່ອນບັດເລືອກຕັ້ງຊຶ່ງມາຮອດປະຈຸບັນປະຕິບັດສຳເລັດບັນ ດາໜ້າວຽກເປັນສ່ວນຫຼາຍເປັນຕົ້ນແມ່ນໄດ້ຜັນຂະຫຍາຍນິຕິກຳຂອງຄະນະກຳມະການເລືອກຕັ້ງລະດັບຊາດອອກເປັນນິຕິກຳຂອງແຂວງເພື່ອຮັບໃຊ້ໃຫ້ແກ່ວຽກງານເລືອກຕັ້ງ; ສໍາເລັດການກະກຽມ ແລະດໍາເນີນກອງປະຊຸມຄັ້ງປະຖົມມະລືກຂອງຄະນະກໍາມະການເລືອກຕັ້ງຂັ້ນແຂວງເພື່ອແບ່ງງານ, ແບ່ງຄວາມຮັບຜິດຊອບພາຍໃນຄະນະກໍາມະການ; ສໍາເລັດການຈັດຝຶກອົບຮົມໃຫ້ແກ່ການນໍາຫຼັກແຫຼ່ງຂອງແຂວງ,ຄະນະກໍາມະການເລືອກຕັ້ງຂັ້ນແຂວງ ແລະຄະນະກໍາມະການເລືອກຕັ້ງຂັ້ນເມືອງ; ສໍາເລັດການຄັດເລືອກເປົ້າໝາຍຈໍານວນຜູ້ສະໝັກຮັບເລືອກຕັ້ງເປັນ ສສຊຊຸດ ທີ IX ປະຈໍາເຂດເລືອກຕັ້ງທີ 8 ແຂວງຫົວພັນ (ຜູ້ສະໝັກຈາກທ້ອງຖິ່ນ) ແລະຜູ້ສະ ໝັກຮັບເລືອກຕັ້ງເປັນ ສສຂ ຊຸດທີ II ພ້ອມທັງ ເກັບກໍາຮູບ,ປະຫວັດຫຍໍ້ຂອງຜູ້ສະໝັກຮັບເລືອກຕັ້ງສົ່ງໃຫ້ຄະນະກໍາມະການເລືອກຕັ້ງລະດັບຊາດທັນກໍານົດ; ຊີ້ນໍາ ເເຕ່ລະອະນຸກໍາມະການແຕ່ງຕັ້ງໜ່ວຍງານ, ຈຸງານຕ່າງໆ ເພື່ອຊ່ວຍວຽກຂອງຕົນ; ຊີ້ນໍາອົງການປົກຄອງເມືອງ ແລະສອງກອງບັນຊາການແຕ່ງຕັ້ງຄະນະກໍາມະການເລືອກຕັ້ງຂັ້ນຕົນ, ຄະນະຮັບຜິດຊອບໜ່ວຍປ່ອນບັດເລືອກຕັ້ງ, ກໍານົດຫນ່ວຍປ່ອນບັດເລືອກຕັ້ງ ແລະປະກາດຄະນະກໍາມະການເລືອກຕັ້ງຂັ້ນຂອງຕົນ; ສໍາເລັດການເກັບກໍາສະຖິຕິຈໍານວນພົນລະເມືອງທົ່ວແຂວງຫົວພັນມີທັງໝົດ 315,889 ຄົນ, ຍິງ 151,709 ຄົນ ໃນນີ້ມີສິດປ່ອນບັດເລືອກຕັ້ງທັງໝົດ 160,596 ຄົນ, ຍິງ 76,513 ຄົນ ແລະ ມີຫນ່ວຍປ່ອນບັດເລືອກຕັ້ງທັງໝົດ 420 ໜ່ວຍ; ສໍາເລັດການຈັດພິມໃບຢັ້ງຢືນຜູ້ມີສິດປ່ອນບັດເລືອກຕັ້ງໃນທົ່ວແຂວງພ້ອມທັງຈັດສົ່ງໃຫ້ເຂດເລືອກຕັ້ງເມືອງຄົບຖ້ວນ; ຈັດນັກຂ່າວເຂົ້າຮ່ວມຂະບວນການເຄື່ອນໄຫວວຽກງານຕ່າງໆເພື່ອເກັບກໍາຂໍ້ມູນຂຽນຂ່າວຜ່ານສືຕ່າງໆອອກຂ່າວໃຫ້ສັງຄົມໄດ້ຮັບຮູ້; ອໍານວຍຄວາມສະດວກ, ລົງຕິດຕາມແລະຊຸກຍູ້ຄະນະກໍາມະການເລືອກຕັ້ງຂັ້ນເມືອງໃນການຈັດຕັ້ງປະຕິບັດວຽກງານສ້າງຂະບວນການຕ່າງໆ;ສໍາເລັດການຄົ້ນຄວ້າ,ວາງແຜນ ການປ້ອງກັນການເລືອກຕັ້ງຄັ້ງນີ້ໃຫ້ມີຄວາມສະຫງົບ, ເປັນລະບຽບຮ້ອຍ ແລະແກ້ໄຂຫນໍ່ແໜງປາກົດການຫຍໍ້ທໍ້ຕ່າງໆທີ່ເປັນປັດໄຈກໍ່ຄວາມບໍ່ສະຫງົບ, ຄວາມບໍ່ເປັນ ລະບຽບຮຽບຮ້ອຍທີ່ຫວັງທໍາລາຍການເລືອກຕັ້ງຢ່າງທັນການ ແລະມີຄວາມສະຫງົບ, ຈັດສັນແບ່ງປັນງົບປະມານ ປີ 2020 ໃຫ້ບັນດາອະນຸກໍາມະການ, ຄະນະກໍາມະການ.

  ທ່ານ ສົມສັກ ດອນຈານິດ ໃຫ້ ຮູ້ຕື່ມອີກວ່າ: ເພື່ອຈັດຕັ້ງປະຕິບັດການເລືອກຕັ້ງໃຫ້ປະສົບຜົນສຳເລັດນັ້ນ, ສືບຕໍ່ຊີ້ນໍາຄະນະປະຈໍາການ, ບັນດາອະນຸກໍາມະການຂອງ ຄະນະກໍາມະການເລືອກຕັ້ງຂັ້ນແຂວງ,ຂັ້ນເມືອງຈັດຕັ້ງປະຕິບັດແຜນດໍາເນີນງານຂອງຄະນະກໍາມະການເລືອກຕັ້ງຂັ້ນແຂວງໃນບາດກ້າວທີ 3 ແລະບາດກ້າວທີ 4 ໃຫ້ສໍາເລັດຕາມແຜນການ; ແຈກຢາຍຮູບ ແລະປະຫວັດຫຍໍ້ຜູ້ສະໝັກຮັບເລືອກຕັ້ງເປັນສສຊ ຊຸດທີ IX ແລະສສຂ ຊຸດທີ II, ບັດລົງຄະແນນສຽງເລືອກຕັ້ງ, ບັດຕິດເອິກນະນັກງານຮັບໃຊ້ຄະນະກໍາມະການເລືອກຕັ້ງຂັ້ນແຂວງ ແລະໜ່ວຍງານຊ່ວຍວຽກໃຫ້ບັນດາເຂດເລືອກຕັ້ງ ແລະໜ່ວຍປ່ອນບັດເລືອກຕັ້ງໃຫ້ທັນຕາມກໍານົດເວລາ;ສືບຕໍ່ປະສານງານກັບອະນຸກໍາມະການງົບປະມານຂອງຄະນະກໍາມະການເລືອກຕັ້ງລະດັບຊາດໃນການຈັດສັນງົບປະມານປີ 2011, ພ້ອມທັງຈັດສັນງົບປະມານໃຫ້ບັນດາອະນຸກໍາມະການຂອງຄະນະກໍາມະການເລືອກຕັ້ງຂັ້ນແຂວງ ແລະຄະນະກໍາມະການເລືອກຕັ້ງຂັ້ນເມືອງ ເພື່ອນໍາໃຊ້ ເຂົ້າໃນການຈັດຕັ້ງປະຕິບັດບັນດາໜ້າວຽກໃຫ້ທັນກໍານົດເວລາ; ຂຶ້ນແຜນຈັດຊື້ອຸປະກອນທີ່ຈໍາເປັນເພື່ອຮັບໃຊ້ໃຫ້ແກ່ການເຄື່ອນໄຫວວຽກງານເລືອກຕັ້ງ; ຮັບການລາຍງານການດໍາເນີນການປ່ອນບັດເລືອກ; ສືບຕໍ່ລົງຊຸກຍູ້ ແລະປຸກລະດົມຂະບວນການຕ່າງໆໃຫ້ເປັນຂະບວນການຟົດຟື້ນ ແລະ ຮັບປະກັນຄວາມສະຫງົບປອດໄພ; ຂຶ້ນແຜນ ແລະ ຈັດຕັ້ງການລົງໂຄສະນາຫາສຽງຜູ້ສະໝັກຮັບເລືອກຕັ້ງນັບແຕ່ວັນທີ 9-19 ກຸ່ມພາ 2021 ໃຫ້ສໍາເລັດຕາມແຜນການ, ຕິດຕາມການດໍາເນີນການປ່ອນບັດເລືອກຕັ້ງໃນວັນທີ 21 ກຸມພາ 2021 ໃຫ້ຖືກຕ້ອງຕາມກົດໝາຍ ແລະລະບຽບການ, ປະສານສົມທົບກັບຄະນະກໍາມະການເລືອກຕັ້ງຂອງສອງບັນຊາການ ແລະ ຄະນະກໍາມະການເລືອກຕັ້ງຂັ້ນເມືອງສະຫຼຸບຄະ ແນນຂອງຜູ້ສະໝັກຮັບເລືອກຕັ້ງໃຫ້ສໍາເລັດຊ້າສຸດໃນວັນທີ 28 ກຸມພາ 2021; ພ້ອມທັງກະກຽມບົດລາຍງານຜົນການເລືອກຕັ້ງໄປຍັງຄະນະກໍາມະການເລືອກຕັ້ງລະດັບຊາດປະກາດລາຍຊື່ຜູ້ໄດ້ຮັບການເລືອກຕັ້ງ.

  ຕອນທ້າຍທ່ານຍັງໄດ້ຮຽກຮ້ອງມາຍັງພະນັກງານ, ທະຫານ, ຕໍາຫຼວດ, ປະຊາຊົນບັນດາເຜົ່າ ແລະທຸກຊັ້ນຄົນໃນແຂວງຫົວພັນຈົ່ງພ້ອມກັນຕິດຕາມ ແລະເຂົ້າຮ່ວມຂະບວນການເລືອກຕັ້ງ ສສຊ ຊຸດທີ IX ແລະສສຂ ແຂວງຫົວພັນ ຊຸດທີ II ຄັ້ງນີ້ໃຫ້ມີຂະບວນການຟົດຟື້ນແລະມີຜົນສໍາເລັດຕາມຄາດໝາຍທີ່ວາງໄວ້.

  ປະຈຸບັນ, ບັນດາຜູ້ຮັບສະໝັກເລືອກຕັ້ງເປັນ ສສຊ ຊຸດທີ IX ຈຳນວນ 10 ທ່ານກຳລັງລົງໂຄສະນາຫາສຽງຢູ່ທ້ອງຖິ່ນໂດຍແບ່ງເປັນ 3 ທີມຄື: ທີມທີ 1 ນຳໂດຍ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ຮອງປະທານສະພາປະຊາຊົນເຂດເລືອກ ຕັ້ງທີ 8 ແຂວງຫົວພັນຊຸດທີ VIII ພ້ອມດ້ວຍຄະນະລົງໂຄສະນາຫາສຽງຢູ່ເມືອງຊຳເໜືອ, ເມືອງວຽງໄຊ, ເມືອງຊຳໃຕ້ ແລະເມືອງກວັນ; ທີມທີ 2 ນຳໂດຍທ່ານ ຄອນປະພັນ ເລືອງສີຈັນທອງ ກຳມະການປະຈຳພັກແຂວງ, ຮອງປະທານສະພາປະຊາຊົນແຂວງຊຸດທີ VIII ພ້ອມດ້ວຍຄະນະລົງເມືອງສົບເບົາ, ເມືອງຊຽງຄໍ້ ແລະເມືອງແອດ; ທີມທີ 3 ນຳໂດຍທ່ານ ຄຳແພງ ວິລະພັນ ຮອງປະທານກຳມາທິການຍຸຕິທຳສະພາແຫ່ງຊາດຊຸດທີ VIII ພ້ອມດ້ວຍຄະນະລົງເມືອງຫົວເມືອງ, ເມືອງຮ້ຽມ ແລະເມືອງຊ່ອນ, ໃນຂະນະດຽວກັນ, ຜູ້ຮັບສະໝັກເລືອກຕັ້ງເປັນ ສສຂ ຊຸດທີ II ຈໍານວນ 49 ທ່ານ ກໍລົງເຄື່ອນໄຫວໂຄສະນາຫາສຽງຢູ່ພື້ນຖານທ້ອງຖິນຕາມເຂດເລືອກຕັ້ງຂອງຕົນຢ່າງພ້ອມພຽງ ແລະເປັນຂະບວນຟົດຟື້ນຊຶ່ງໄດ້ຮັບການຮັບຕ້ອນຈາກພໍ່ແມ່ປະຊາຊົນຢ່າງອົບອຸ່ນ.

ຂ່າວ: ໄອແກ້ວ

แชร์