ເປີດນຳໃຊ້ຫ້ອງການສະພາທະນາຍຄວາມຄຳມ່ວນ

 ພິທີເປີດຫ້ອງການຫຼັງໃໝ່ສະພາທະນາຍຄວາມປະຈຳແຂວງຄຳມ່ວນໄດ້ຈັດຂຶ້ນໃນວັນທີ 5 ກຸມພາ 2021 ໃຫ້ກຽດເຂົ້າຮ່ວມເປັນປະທານເປີດປ້າຍຢ່າງເປັນທາງການຂອງທ່ານ ຄຳພັນ ຫຼວງອາມາດ ຫົວໜ້າຫ້ອງການສະພາທະນາຍຄວາມປະຈຳແຂວງຄຳມ່ວນ, ພ້ອມດ້ວຍແຂກຖືກເຊີນ ແລະພະນັກງານວິຊາການພາຍໃນຫ້ອງການດັ່ງກ່າວເຂົ້າຮ່ວມ.

 ຫ້ອງການສະພາທະນາຍຄວາມຫຼັງໃໝ່ໄດ້ຍົກຍ້າຍມາຕັ້ງຢູ່ບ້ານສັນຕິສຸກ, ໜ່ວຍ 16, ເມືອງທ່າແຂກ, ແຂວງຄຳມ່ວນ, ມີສາຍຕັ້ງຂຶ້ນກັບສະພາທະນາຍຄວາມລາວ, ສາຍຂວາງຂຶ້ນກັບພະແນກຍຸຕິທຳແຂວງເຄື່ອນໄຫວຕາມພາລະບົດບາດຂອງກົດໝາຍວ່າດ້ວຍທະນາຍຄວາມກໍ່ຄືກົດລະບຽບພາຍໃນສະພາທະນາຍຄວາມ, ປະກອບມີຄະນະ 2 ທ່ານ, ມີພະນັກງານທັງໝົດ 8 ທ່ານ,ໃນນີ້ມີທະນາຍຄວາມສົມບູນ 3 ທ່ານ,ທະນາຍຄວາມຝຶກຫັດ 1 ທ່ານ, ມີ 5 ໜ່ວຍງານຄື: ໜ່ວຍງານຈັດຕັ້ງຫ້ອງ ການ-ນະໂຍບາຍ, ໜ່ວຍງານກວດກາ-ນິຕິກຳ, ໜ່ວຍງານ ແຜນການ-ການເງິນ, ໜ່ວຍງານໂຄສະນາຖະແຫຼງຂ່າວ-ໄອທີ ແລະ ໜ່ວຍງານຊ່ວຍເຫຼືອລ້າທາງດ້ານ ກົດໝາຍ, ໃນໂອກາດທີ່ເປີດຫ້ອງການຫຼັງໃໝ່ນີ້ຍັງໄດ້ມີພິທີເປີດບໍລິສັດ ຫຼວງອາມາດ ຈຳກັດຜູ້ດຽວ (ທະນາຍຄວາມ ແລະທີ່ປຶກສາດ້ານກົດໝາຍ) ແລະ ເປີດບໍລິສັດ ທີເຄໄອປະກັນໄພທົ່ວໄປອີກດ້ວຍ.

 ທ່ານ ຄຳພັນ ຫຼວງອາມາດ ໄດ້ກ່າວຕື່ມອີກວ່າ: ຫ້ອງການສະພາທະນາຍຄວາມບໍ່ພຽງແຕ່ເຮັດໜ້າທີ່ບໍລິການທາງດ້ານກົດໝາຍພຽງແຕ່ຮຽກຄ່າຜົນຕອບແທນພວກເຮົາແມ່ນຍິນດີໃຫ້ການຊ່ວຍເຫຼືອຟີໂດຍບໍ່ເສຍຄ່າຕໍ່ບັນດາທ່ານທີ່ມີການຢັ້ງຢືນຈາກການຈັດຕັ້ງພາກລັດວ່າເປັນຄອບຄົວທີ່ຍັງບໍ່ທັນພົ້ນທຸກຕາມກົດໝາຍດຳລັດ 77 ຂອງລັດຖະບານ ແລະຂໍເຊີນຊວນບັນດາທ່ານເຂົ້າມາໃຊ້ບໍລິການພວກພ້ອມແລ້ວຈະຮັບໃຊ້ທ່ານທີ່ສົນໃຈຢາກມາຂໍຄວາມຊ່ວຍເຫຼືອທາງດ້ານກົດໝາຍ,ຖ້າບໍ່ສະດວກດ້ານເວລາກໍ່ສາມາດຕິດຕໍ່ທາງເບີໂທລະສັບກໍ່ໄດ້ ແລະອີກບັນຫາໜຶ່ງເພື່ອເຮັດແນວໃດໃຫ້ສັງຄົມມີຄວາມສະຫງົບຍຸຕິທຳໂດຍສະເພາະພໍ່ແມ່ປະຊາຊົນທີ່ຍັງຄວາມຮັບຮູ້ທາງດ້ານກົດໝາຍບໍ່ທັນເລິກເຊິ່ງກວ້າງຂວາງນັ້ນເພື່ອບໍ່ຢາກເສຍຜົນປະໂຫຍດ ແລະປົກປ້ອງສິດຂອງຕົນກໍ່ເຊີນຊວນເຂົ້າມາໃຊ້ບໍລິການໄດ້.

ຂ່າວ: ມະນີວັນ

แชร์