ການເລືອກຕັ້ງ ສສຊ ແລະສສຂ ຕ້ອງຮັບປະກັນ ບັນລຸຄາດໝາຍ 300%

 ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ ໄດ້ກ່າວມີຄໍາເຫັນໃນໂອກາດນໍາພາຜູ້ສະໝັກຮັບເລືອກຕັ້ງສະມາຊິກສະພາປະຊາຊົນແຂວງເຊກອງ (ສສຂ) ຊຸດທີ II ເຂດເລືອກຕັ້ງເມືອງທ່າແຕງລົງເຄື່ອນໄຫວໂຄສະນາຫາສຽງຢູ່ໜ່ວຍປ່ອນບັດທີ 8 ບ້ານໜອງນົກ ແລະ ໜ່ວຍປ່ອນບັດທີ 9 ບ້ານຫຼີກໃນ ວັນທີ 11 ກຸມພາ 2021 ໂດຍທ່ານໄດ້ເນັ້ນໃຫ້ຄະນະຮັບຜິດຊອບໜ່ວຍປ່ອນບັດແຕ່ລະໜ່ວຍ ແລະອໍານາດການປົກຄອງບ້ານເປັນເຈົ້າການໃນການໂຄສະນາສຶກສາອົບຮົມການເມືອງແນວຄິດໃຫ້ປະຊາຊົນເພື່ອໃຫ້ປະຊາຊົນຮັບຮູ້ເຂົ້າໃຈຕໍ່ແນວທາງການເມືອງຂອງພັກໂດຍສະເພາະແມ່ນລະບຽບກ່ຽວກັບການເລືອກຕັ້ງ, ທັງນີ້ກໍເພື່ອແນໃສ່ເຮັດໃຫ້ການເລືອກຕັ້ງບັນລຸຕາມຄາດໝາຍ 300%.

   ທ່ານ ພອນເພັດ ຄິວລະວົງ ກ່າວວ່າ: 21 ກຸມພາ 2021 ວັນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ແມ່ນເປັນເຫດການທາງດ້ານການເມືອງ ແລະປາງບຸນໃຫຍ່ທີ່ສໍາຄັນຂອງຊາດ, ປະຊາຊົນລາວຜູ້ທີ່ມີອາຍຸ 18 ປີ ຂຶ້ນຕ້ອງໃຫ້ໄດ້ໃຊ້ສິດຂອງຕົນປ່ອນບັດເລືອກຕັ້ງໃຫ້ໄດ້ 100%, ຮັບປະກັນບໍ່ໃຫ້ມີບັດຕາຍ 100% ແລະ ແຕ່ລະໜ່ວຍປ່ອນບັດ ແລະ ເຂດເລືອກຕັ້ງຕ້ອງຮັບປະກັນໃຫ້ມີຄວາມສະຫງົບປອດໄພໃນວັນເລືອກຕັ້ງ 100%.

  ເພື່ອບັນລຸໄດ້ 300% ປະທານສະພາປະຊາຊົນແຂວງໄດ້ເນັ້ນໃຫ້ຄະນະກໍາມະການເລືອກຕັ້ງຂັ້ນເມືອງ, ຄະນະໜ່ວຍຮັບຜິດຊອບໜ່ວຍປ່ອນບັດແຕ່ລະໜ່ວຍ ແລະ ອໍານາດການປົກຄອງບ້ານຕ້ອງເປັນເຈົ້າການໃນການສຶກສາອົບຮົມການເມືອງແນວຄິດ, ເປັນເຈົ້າການເຜີຍແຜ່ລະບຽບການກົດໝາຍ ແລະນິຕິກໍາສໍາຄັນຕ່າງໆກ່ຽວກັບ ການເລືອກຕັ້ງເພື່ອແນໃສ່ໃຫ້ພະນັກງານ, ສະມາຊິກພັກ, ທະຫານ-ຕໍາຫຼວດ ແລະ ປະຊາຊົນບັນດາເຜົ່າກໍຄືຜູ້ທີ່ມີສິດເລືອກຕັ້ງທີ່ຢູ່ໃນໜ່ວຍເລືອກຕັ້ງຂອງຕົນຮັບຜິດ ຊອບຮັບຮູ້ເຂົ້າໃຈຢ່າງເລິກ.

 ເຂດເລືອກຕັ້ງທີ 16 ແຂວງເຊກອງມີຜູ້ລົງສະໝັກຮັບເລືອກຕັ້ງສະມາຊິກສະພາແຫ່ງຊາດຊຸດທີ IX ຈໍານວນ 9 ທ່ານ, ເລືອກເອົາ 6 ທ່ານ ແລະຜູ້ສະໝັກຮັບເລືອກຕັ້ງສະມາຊິກສະພາປະຊາຊົນແຂວງຊຸດທີ II ຈໍານວນ 30 ທ່ານ, ເລືອກເອົາ 21 ທ່ານ ຊຶ່ງໃນນີ້ສະເພາະເຂດເລືອກຕັ້ງເມືອງທ່າແຕງມີຈໍານວນຜູ້ສະໝັກ 7 ທ່ານ, ເລືອກເອົາ 5 ທ່ານ.

  ສຳລັບໃນການລົງແຕ່ລະຈຸດ, ທ່ານປະທານສະພາປະຊາຊົນແຂວງໄດ້ຮັບຟັງການລາຍງານກ່ຽວກັບການກະກຽມໃນການປ່ອນບັດເລືອກຕັ້ງ ສສຊ ແລະ ສສຂ ໂດຍໜ່ວຍປ່ອນບັດທີ 8 ແລະທີ 9 ລວມມີ 8 ບ້ານ, ມີພົນລະມືອງທັງໝົດ 5.597 ຄົນ, ຍິງ 2.757 ຄົນ,ໃນນີ້ມີຜູ້ມີສິດປ່ອນບັດຈໍານວນ 3.278 ຄົນ,ຍິງ 1.656 ຄົນ.  

ຂ່າວ: ສັນຍາ

แชร์