ເປີດໃຊ້ໂຮງແຮມພູເບ້ຍ ໄຊສົມບູນ

 ເນື່ອງໃນໂອກາດທີ່ໄດ້ລົງເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງໄຊສົມບູນ ຂອງທ່ານ ພົອ ຈັນສະໝອນ ຈັນຍາລາດ, ລັດຖະມົນຕີກະຊວງປ້ອງກັນປະເທດພ້ອມດ້ວຍຄະນະໄດ້ເຂົ້າຮ່ວມພິທີເປີດນຳໃຊ້ໂຮງແຮມພູເບ້ຍ ແຂວງໄຊສົມບູນ ໃນຄໍ່າຄືນຂອງວັນທີ 10 ກຸມພາຜ່ານມານີ້ທີ່ໂຮງແຮມດັ່ງກ່າວສຳນັກງານຕັ້ງຢູ່ບ້ານພູຫົວຊ້າງ, ເມືອງອະນຸວົງ ແຂວງໄຊສົມບູນ, ມີທ່ານ ພົນຕີ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ,ຮອງເຈົ້າແຂວງ,ພະແນກການອ້ອມຂ້າງແຂວງ ແລະເຈົ້າເມືອງອະນຸວົງ, ມີທ່ານ ລິນລີ່ຫົວ ປະທານບໍລິສັດແຊັດວ່າຍພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 ໂອກາດນີ້ ທ່ານ ລິນລີ່ຫົວ ປະທານ ບໍລິສັດ ແຊັດວ່າຍ ໄດ້ລາຍງານຜົນສຳເລັດຂອງໂຄງການກໍ່ສ້າງ ແລະສ້ອມແປງໂຮງແຮມພູເບ້ຍໂຄງການດັ່ງກ່າວແມ່ນໄດ້ເລີ່ມລົງມືໃນການກໍ່ສ້າງມາແຕ່ວັນທີ 9 ກໍລະກົດ 2019 ຜ່ານມາຊຶ່ງໂຄງການດັ່ງກ່າວໄດ້ສ້ອມແປງ ແລະຍົກລະດັບຫ້ອງພັກ, ເທພື້ນ,ກໍ່ກຳແພງອ້ອມຮອບໂຮງແຮມ ແລະຮ້ານອາຫານໃນນັ້ນປະກອບມີຫ້ອງພັກທັງໝົດ 15 ຫ້ອງ, ຫ້ອງພັກທຳມະດາ11 ຫ້ອງ, ຫ້ອງພັກ VIP ຈຳນວນ 4 ຫ້ອງ ແລະ ຍັງມີຫ້ອງເຮັດວຽກອີກຈຳນວນໜຶ່ງ ພ້ອມນີ້ຍັງມີຮ້ານອາຫານທີ່ສາມາດຮອງຮັບແຂກໄດ້ຈຳນວນ 200 ຄົນ ລວມມູນຄ່າໃນການກໍ່ສ້າງທັງໝົດ 7 ແສນກວ່າໂດລາສະລັດ ໂດຍແມ່ນບໍລິສັດແຊັດວ່າຍເປັນຜູ້ຮັບເຜົາກໍ່ສ້າງ, ພາຍຫລັງໂຮງແຮມຫຼັງດັ່ງກ່າວສຳເລັດແລ້ວກໍຈະເປັນການກະຕຸກຊຸກຍູ້ທາງດ້ານການພັດທະນາເສດຖະກິດຂອງແຂວງໃຫ້ມີການຂະຫຍາຍຕົວທັງເປັນບ່ອນຮອງຮັບແຂກຄົນທີ່ເຂົ້າມາຢ້ຽມຢາມ ແຂວງໄຊສົມບູນ ໄດ້ມີບ່ອນພັກເຊົານອກຈາກນີ້ຍັງເປັນການສ້າງວຽກເຮັດງານທຳໃຫ້ແກ່ຊາວແຂວງໄຊສົມບູນຕື່ມອີກ.

ຈາກນັ້ນຂອງທ່ານ ພົອ ຈັນສະໝອນ ຈັນຍາລາດ ແລະທ່ານ ພົນຕີ ຄຳລຽງ ອຸທະໄກສອນ ເລຂາພັກແຂວງພ້ອມດ້ວຍການນຳແຂວງໄດ້ພ້ອມກັນທ່ຽວຊົມຫ້ອງພັກໂຮງ ແຮມຕື່ມອີກ.

ຂ່າວ: ພຸດທະສອນ ເວດສະວົງ

แชร์