ຊາວສວນມັນຕົ້ນກະທົບໂຄວິດໜັກ ຜູ້ປະກອບການເລັ່ງຊອກທາງສົ່ງອອກ

  ສະພາການຄ້າ ແລະອຸດສາຫະກໍາ ແຂວງສາລະວັນ ຮ່ວມກັບສະມາຄົມມັນຕົ້ນລາວ ແລະ ຫົວໜ່ວຍທຸລະກິດພາຍໃນແຂວງສາລະວັນປຶກສາກ່ຽວກັບການສົ່ງອອກມັນຕົ້ນພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໂດຍການຫາລືດັ່ງກ່າວໄດ້ຈັດຂຶ້ນໃນວັນທີ 5 ກຸມພາ 2021, ທີ່ພັດທະຄານສິນສະໄໝແຂວງສາລະວັນ, ເຂົ້າຮ່ວມເປັນປະທານຂອງທ່ານນາງ ອິນແປງ ຊາມຸນຕີ ປະທານສະພາການຄ້າ ແລະອຸດສາຫະກໍາແຂວງສາລະວັນ,ທ່ານ ບຸນເຫຼີມ ແກ້ວວິຈິດ ຮອງປະທານສະມາຄົມມັນຕົ້ນລາວ, ຜູ້ປະກອບການຫົວໜ່ວຍທຸລະກິດ ແລະຜູ້ເກັບຊື້ມັນຕົ້ນເຂົ້າຮ່ວມ.

  ຜ່ານການຄົ້ນຄວ້າປຶກສາ-ຫາລືຮ່ວມ ກັບບັນດາຜູ້ປະກອບການເພື່ອແກ້ໄຂບັນຫາການສົ່ງອອກມັນຕົ້ນຢູ່ພາກໃນ ແຂວງສາລະວັນ ທີ່ບໍ່ສາມາດລະບາຍມັນຕົ້ນອອກໄດ້ຫຼາຍໂດຍສະເພາະໃນລານມັນ 63 ຈຸດ, ທີ່ມີມັນຄ້າງຢູ່ໃນລານມັນຈໍານວນ 2 ແສນກວ່າໂຕນ ມາຮອດປະຈຸບັນບັນດາຜູ້ປະກອບການບໍ່ສາມາດເກັບຊື້ໄດ້ຕາມຕ້ອງການຍ້ອນວ່າການສົ່ງອອກສິນຄ້າມີຄ່າໃຊ້ຈ່າຍໃນການປ່ຽນຖ່າຍສິນຄ້າຢູ່ໜ້າດ່ານທ່າບົກ-ວັງເຕົ່າຍັງສູງ, ຕໍ່ກັບບັນຫາດັ່ງກ່າວກໍ່ໄດ້ມີການປຶກສາຫາລືຕົກລົງເຫັນດີເປັນເອກະ ພາບນໍາໃຊ້ທາງເລືອກທີ 2 ຕາມການແຈ້ງການຂອງທ່ານເຈົ້າ ແຂວງຈໍາປາສັກ, ສະບັບເລກທີ 001/ຈຂ.ຈສ, ລົງວັນທີ 4 ມັງກອນ 2021.

  ໝາຍຄວາມວ່າລົດຂົນສົ່ງສິນຄ້າທີ່ຈະຜ່ານເຂົ້າມາດ່ານສາກົນວັງເຕົ່າ-ຊ່ອງເມັກ ຕ້ອງມີເຈົ້າໜ້າທີ່ຕິດຕາມຕະຫຼອດໄລຍະການຂົນສົ່ງສິນຄ້າຊຶ່ງຄ່າໃຊ້ຈ່າຍທີ່ເກີດຂຶ້ນຈາກການຕິດຕາມຂອງເຈົ້າໜ້າທີ່ແມ່ນຄວາມຮັບຜິດຊອບຂອງ ບໍລິສັດຂົນສົ່ງສິນຄ້າ ແລະຜູ້ປະກອບການລານມັນເອງ ແລະເຫັນດີໃຫ້ມີການຄັດກອງກວດພະຍາດໂຄວິດ-19 ຂອງຄົນຂັບລົດຜ່ານເຂົ້າມາທາງດ່ານແຂວງສະຫວັນນະເຂດ ແລະ ດ່ານແຂວງຈໍາປາສັກແຕ່ຕ້ອງອີງຕາມການກວດກາ ແລະ ໄດ້ຮັບການຢັ້ງຢືນການກວດພະຍາດໂຄວິດ-19 ຈາກປະເທດຕົ້ນທາງແຕ່ໃນກໍລະນີອຸນຫະພູມຂອງພະນັກງານຂັບລົດບັນທຸກຫາກເກີນກໍານົດມາດຖານຂອງພາກສ່ວນກ່ຽວຂ້ອງ (ສາທາລະນະສຸກ) ໃນເວລາເດີນທາງເຂົ້າ ສປປ ລາວ ຕ້ອງກວດພະຍາດໂຄວິດ-19 ຄືນໃໝ່.

  ສ່ວນບັນດາຜູ້ປະກອບການທີ່ຈະນໍາລົດໄທເຂົ້າມາຂົນສິນຄ້າໃນລານຂອງຕົນເຫັນດີປະກອບສ່ວນ 1 ແສນກີບຕໍ່ຄັນ ໃຫ້ສະມາຄົມມັນຕົ້ນລາວເປັນຜູ້ບໍລິຫານຈັດການຕາມຄວາມເໝາະສົມກັບສະພາການຄ້າ ແລະ ອຸດສາຫະກໍາແຂວງສາລະວັນ (ການປະກອບສ່ວນດ້ານງົບປະມານນີ້ແມ່ນໃຊ້ພຽງແຕ່ໄລຍະເວລາການສົ່ງອອກສິນຄ້າປະ ເພດມັນຕົ້ນເລີ່ມແຕ່ວັນທີ 10 ກຸມພາ ຫາວັນທີ 10 ມີນາ 2021 (1 ເດືອນ) ໂດຍບັນດາຜູ້ປະກອບການທີ່ຈະນໍາໃຊ້ລົດໄທເຂົ້າມາຂົນສິນຄ້າຈະຕ້ອງໄດ້ສັງລວມຂໍ້ມູນຈໍານວນລົດ, ທະບຽນລົດ, ເອກະສານລົດ ແລະເອກະສານພະນັກງານຄົນຂັບລົດໃຫ້ຄົບຖ້ວນໃນແຕ່ລະມື້, ໂດຍສົ່ງໃຫ້ສະມາຄົມມັນຕົ້ນ ແລະສະພາການຄ້າ ແລະອຸດສາຫະກໍາແຂວງຂອງຕົນເປັນຜູ້ສັ່ງລວມເອກະສານ, ເພື່ອແຈ້ງຕໍ່ໃຫ້ຄະນະສະເພາະກິດແຂວງສະຫວັນເຂດ ແລະ ແຂວງຈໍາປາສັກ ເພື່ອສະດວກໃນການກວດກາ ແລະຕິດຕາມກ່ອນທີ່ຈະນໍາລົດເຂົ້າມາຂົນສົ່ງສີນຄ້າປະເພດມັນຕົ້ນຜ່ານດ່ານເຂົ້າມາໃນແຕ່ລະມື້ຕໍ່ຄັ້ງ.

  ທັງນີ້ສະເໜີຂໍນໍາໃຊ້ລົດຂົນສົ່ງສິນຄ້າປະເພດມັນຕົ້ນຈາກປະເທດໄທວັນລະ 200 ຄັນ, ເພື່ອເລັ່ງລະບາຍສິນຄ້າປະເພດມັນຕົ້ນທີ່ຄ້າງໃນແຕ່ລະລານຈໍານວນ 2 ແສນກວ່າໂຕນອອກໄດ້ທັນລະດູຝົນຈະມາເຖິງ,ຊຶ່ງການຈັດແບ່ງລົດໃຫ້ແຕ່ລະບັນດາຜູ້ປະກອບການນັ້ນແມ່ນອີງຕາມປະລິມານຂອງມັນຕົ້ນໃນແຕ່ລະລານຂອງຕົນເອງ ແລະຍັງສະເໜີໃຫ້ສະພາການຄ້າ ແລະອຸດສາຫະກໍາແຂວງສາລະວັນຮ່ວມກັບສະມາຄົມມັນຕົ້ນລາວເຮັດໜັງສືສະເໜີເປັນລາຍລັກອັກສອນແຈ້ງໃຫ້ຄະນະນໍາ ແຂວງສາລະວັນໄດ້ຮັບຮູ້ເຖິງສະພາບຄວາມຫຍຸ້ງຍາກດັ່ງກ່າວນີ້.

   ຈາກນັ້ນຍັງໄດ້ປຶກສາຫາລືກ່ຽວກັບບັນຫາການເກັບຊື້ ແລະສົ່ງອອກສີນຄ້າກະສີກໍາປະເພດມັນຕົ້ນລະຫວ່າງສະພາການຄ້າ ແລະອຸດສາຫະກໍາ 5 ແຂວງ, ປະກອບມີແຂວງສາລະວັນ, ຈໍາປາສັກ, ອັດຕະປື, ເຊກອງ ແລະສະຫວັນນະເຂດຮ່ວມກັບສະມາຄົມມັນຕົ້ນລາວ.

ຂ່າວ: ກິນດາວັນ ອ້ວນນາຄູ

แชร์