ປັບປຸງຄວບຄຸມພະຍາດສັດລ້ຽງຕາມຊາຍແດນ

  ວັນທີ 8 ກຸມພາ 2021 ທີ່ ນະຄອນຫຼວງວຽງຈັນ ກົມນະໂຍບາຍ ແລະນິຕິກໍາ, ກະຊວງກະສິກໍາ ແລະປ່າໄມ້ໄດ້ຈັດກອງປະຊຸມທາງໄກການລິເລີ່ມກະກຽມໂຄງການປັບປຸງການຄວບຄຸມພະຍາດສັດ ແລະການລ້ຽງສັດເປັນສິນຄ້າຕາມແລວຊາຍແດນໂດຍການເປັນປະທານຮ່ວມຂອງ ທ່ານ ລິນຄໍາ ດວງສະຫວັນ ຮອງລັດຖະມົນຕີກະ ຊວງກະສິກໍາ ແລະ ປ່າໄມ້, ທ່ານ ນາງ  ໂສໂນມິ ທານາກະ ຜູ້ອໍານວຍການທະນາຄານພັດທະນາອາຊີປະຈໍາລາວ,ມີບັນດາຫົວໜ້າກົມ-ຮອງຫົວໜ້າກົມ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ລິນຄໍາ ດວງສະຫວັນ ກ່າວວ່າ: ວຽກງານຄໍ້າປະກັນສະບຽງອາຫານ ແລະຜະລິດເປັນສິນຄ້າເປັນໜຶ່ງໃນວຽກງານບູລິມະສິດລະດັບຊາດເຊັ່ນດຽວກັນກັບໂຄງການປັບປຸງການຄວບຄຸມພະຍາດສັດ ແລະ ການລ້ຽງສັດເປັນສິນຄ້າຕາມແລວຊາຍແດນທີ່ພວກເຮົາກຳລັງດຳເນີນການກະກຽມກໍ່ເປັນໜຶ່ງໃນແຜນການໆຮ່ວມມືລະຫວ່າງລັດຖະບານ ສປປ ລາວ ກໍ່ຄືອະນຸພາກພື້ນແມ່ນໍ້າຂອງ (GMS) ແລະ ທະນາຄານພັດທະນາອາຊີໃນການປັບປຸງສຸຂະພາບສັດ ແລະ ລະບົບຕ່ອງໂສ້ການຜະລິດສັດເປັນສິນຄ້າເພື່ອສ້າງລາຍໄດ້ໃຫ້ແກ່ຊາວກະສິກອນ, ບັນດາຜູ້ຜະລິດຂະໜາດນ້ອຍ ແລະ ຜູ້ປະກອບການດ້ານທຸລະກິດກະສິກໍາຊຶ່ງໃນນັ້ນຈະເນັ້ນໃສ່ການປັບປຸງພື້ນຖານໂຄງລ່າງດ້ານການບໍລິການດ້ານສຸຂະພາບສັດແລະຕ່ອງໂສ້ການຜະລິດສັດ, ການຍົກລະດັບຄວາມອາດສາມາດຂອງພະນັກງານແລະຊາວກະສິກອນຜູ້ລ້ຽງສັດ ແລະການປັບ ປຸງນະໂຍບາຍເພື່ອເອື້ອອໍານວຍດ້ານການຄ້າຂາຍສັດ.

  ການຈັດກອງປະຊຸມຄັ້ງນີ້ເພື່ອປຶກສາຫາລືກ່ຽວກັບການລິເລີ່ມກະກຽມໂຄງການ ແລະເພື່ອຮັບຮອງຮ່າງບົດລາຍງານເບື້ອງຕົ້ນຂອງການກະກຽມໂຄງການ, ສໍາລັບໂຄງ ການປັບປຸງການຄວບຄຸມພະຍາດສັດ ແລະ ການລ້ຽງສັດເປັນສິນຄ້າຕາມແລວຊາຍແດນເປັນໜຶ່ງໃນບັນດາໂຄງການບູລິມະສິດທີ່ນອນຢູ່ໃນແຜນການຮ່ວມມືລະຫວ່າງລັດຖະບານລາວ ແລະ ທະນາຄານພັດທະນາອາຊີໃນການສະໜັບສະໜູນວຽກງານຄໍ້າປະກັນສະບຽງອາຫານ ແລະ ຜະລິດເປັນສິນຄ້າຊຶ່ງຈຸດປະສົງລວມຂອງໂຄງການແມ່ນເພື່ອປັບປຸງແລະຍົກລະດັບດ້ານສຸຂະພາບສັດ, ຕ່ອງໂສ້ການຜະລິດສັດ, ການຄ້າຂາຍສັດ ແລະຜະລິດຕະພັນສັດໃຫ້ດີຂຶ້ນເທື່ອລະກ້າວໂດຍແນໃສ່ການບໍລິການພາຍ ໃນ ແລະເພື່ອການສົ່ງອອກ.

แชร์