ຮ່ວມໃຈໃຊ້ສິດເລືອກຕັ້ງ ສສຊ ແລະສສຂ

  ດັ່ງທີ່ພວກເຮົາຮູ້ນໍາກັນແລ້ວວ່າ, ຍັງອີກບໍ່ເທົ່າໃດວັນກໍ່ຈະມີການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ຖືວ່າເປັນເຫດການການເມືອງສໍາຄັນຂອງປະຊາຊົນລາວບັນດາເຜົ່າສະນັ້ນຈົ່ງຮ່ວມໃຈໃຊ້ສິດຕົນເອງເລືອກເອົາຜູ້ນຳທີ່ດີຂອງປະເທດໃນວັນທີ 21 ກຸມ ພາ ທີ່ຈະມາເຖິງນີ້.

  ທ່ານ ປອ ອິນຕອງ ເລີດສີນໄຊ ຄະນະບໍດີຄະນະວິທະຍາສາດການກີລາ-ກາຍະກຳມີຄວາມຄິດເຫັນວ່າ: ການເລືອກຕັ້ງ ສສຊ ແລະ ສສຂ ແມ່ນກົນໄກການບໍລິການ ປະເທດສາທາລະນະລັດ ປະຊາທິ ປະໄຕ ປະຊາຊົນລາວ ປະກອບມີ: ສະພາແຫ່ງຊາດອົງການນິຕິບັນຍັດ ແລະຕຸລາການເພື່ອດຳເນີນການບໍລິຫານລັດແຫ່ງກົດໝາຍ, ການເລືອກຕັ້ງ ສສຊ ແລະສສຂ ກໍແມ່ນເລືອກເອົາຜູ້ແທນຕາງໜ້າປະຊາຊົນລາວບັນດາເຜົ່າທຸກສາຂາອາຊີບໃນທົ່ວປະເທດເພື່ອເປັນຕົວແທນ ແລະເປັນກະບອກສຽງໃຫ້ປະຊາຊົນຕິດຕາມກວດກາການປະຕິບັດງານຂອງລັດຖະບານໃຫ້ມີຄວາມຖືກຕ້ອງໂປ່ງໃສເປັນທຳ ແລະເພື່ອສິດຜົນປະໂຫຍດອັນຊອບທຳຂອງບຸກຄົນການຈັດຕັ້ງສັງຄົມ ແລະປະເທດຊາດ.

  ສຳລັບຄຸນລັກສະນະຂອງ ສສຊ ແລະ ສສຂ ຕ້ອງເປັນຄົນທີ່ມີຫຼັກໝັ້ນການເມືອງທີ່ຖືກຕ້ອງຕາມແນວທາງນະໂຍບາຍຂອງພັກປະຊາຊົນປະຕິວັດລາວກ້າວສູ່ສັງຄົມນິ ຍົມເທື່ອລະກ້າວ,ເປັນຄົນທີ່ມີຄວາມຮູ້ຄວາມສາມາດມີວິຊາສະເພາະຕາມຂົງເຂດສະມັກເລືອກຕັ້ງ, ກ້າປາກກ້າເວົ້າກ້າສະແດງອອກ, ມີແນວຄິດສ້າງສັນມີແນວຄິດບວກມີແນວຄິດກວ້າງຂວາງບໍ່ມີແນວຄິດອັກຄະຕິ,ມັກລົງທ້ອງຖິ່ນຮູ້ເວົ້ານຳປະຊາຊົນທຸກລະດັບ,ຮູ້ສັງລວມສະພາບບັນຫາ ແລະວິທີແກ້ໄຂໃຫ້ຂັ້ນເທິງໄດ້ພ້ອມທັງຮູ້ນຳມາຜັນຂະຫຍາຍ ແລະໂຄສະນາເຜີຍແຜ່.

  ທ່ານ ວິໄລສັກ ສຸລິຈັນ ຜູ້ກໍ່ຕັ້ງ ແລະຜູ້ບໍລິຫານຮ້ານຄໍາສີຫອມມີສຸກ SMJ ກໍ່ໄດ້ສະແດງທັດສະນະໃນນາມເປັນປະຊາຊົນພົນລະເມືອງລາວຄົນໜຶ່ງວ່າ: ການເລືອກ ຕັ້ງເອົາ ສສຊ ແລະສສຂ ມີຄວາມສຳຄັນ ແລະ ຈຳເປັນຫຼາຍທີ່ສຸດເພາະມັນແມ່ນການສະແດງອອກເຖິງນໍ້າໃຈຄວາມຮັກຊາດເປັນເຈົ້າການໃນການໃຊ້ສິດ ແລະ ໜ້າທີ່ ຂອງຕົນເອງໃນການເລືອກເອົາຜູ້ແທນເຂົ້າໄປເປັນກະບອກສຽງໃນການສະເໜີ ແລະສະແດງຄວາມຄິດເຫັນຕໍ່ກັບກະທູ້ສໍາຄັນຕ່າງໆທີ່ຂະເກີດຂຶ້ນເພື່ອໃຫ້ເກີດປະໂຫຍດ ສູງສຸດໃນການພັດທະນາປະເທດຊາດ ແລະປະຊາຊົນລາວທຸກຄົນ,ແນ່ນອນຜູ້ທີ່ຈະມາເປັນ ສສຊ ແລະສສຂ ຕ້ອງເປັນຄົນທີ່ຍອມເສຍສະລະເພື່ອປະເທດຊາດ ແລະປະ ຊາຊົນສ່ວນລວມ,ມີທັດສະນະແນວຄິດທີ່ຖືກຕ້ອງເຊື່ອໝັ້ນຕໍ່ແນວທາງຂອງພັກປະຊາຊົນປະຕິວັດລາວ ແລະຕ້ອງເປັນຄົນທີ່ມີຄວາມຮູ້ຄວາມສາມາດ ແລະມີປະສົບການ ໃນການເຮັດວຽກໃນດ້ານໃດໜຶ່ງ ຫຼື ຫຼາຍໆດ້ານກໍ່ດີ, ແຕ່ອີກສິ່ງໜຶ່ງທີ່ຂ້າພະເຈົ້າຄິດວ່າຈໍາເປັນຍິ່ງກວ່ານີ້ຄື ສສຊ ແລະ ສສຂ ຈະຕ້ອງເປັນຄົນທີ່ເຮັດແທ້ທຳຈິງລົງພື້ນ ຕົວຈິງຮັບຟັງສຽງຂອງປະຊາຊົນ ແລະນຳໄປສະເໜີຕໍ່ໃນສະພາເພື່ອຜັນຂະຫຍາຍໃຫ້ເກີດຜົນປະໂຫຍດສູງສຸດໃນການພັດທະນາປະເທດຊາດ.

  ທ່ານ ພັນລະຄອນ ສີບຸນເຮືອງ ປະທານບໍລິສັດສຸກປີດາກໍ່ສ້າງ ແລະຂົວທາງມີທັດສະນະວ່າການເລືອກຕັ້ງ ສສຊ ແລະ ສສຂ ຄັ້ງນີ້ຂ້າພະເຈົ້າໃນນາມປະຊາຊົນລາວຄົນໜຶ່ງກໍ່ມີຄວາມຄາດຫວັງຕໍ່ການຄັດເລືອກຕົວແທນເພື່ອໄປເປັນກະບອກສຽງໃຫ້ແກ່ປະຊາຊົນເພື່ອລາຍງານບັນຫາຂັ້ນພື້ນຖານ, ຂັ້ນທ້ອງຖິ່ນໃຫ້ຂັ້ນເທິງຮັບຮູ້ບັນຫາທີ່ແທ້ຈິງ,ສຳລັບຄຸນສົມບັດ ແລະລັກສະນະຂອງຜູ້ສະໝັກຕ້ອງເປັນຄົນທີ່ມີວິໄສທັດເບິ່ງກວ້າງເຫັນໄກເຂົ້າໃຈປັນຫາຂອງປະຊາຊົນແທ້ພ້ອມທີ່ຈະເຂົ້າໄປແກ້ໄຂຢ່າງຈິງຈັງບໍ່ແມ່ນພຽງແຕ່ສະໝັກເປັນ ສສຊ ຫຼືສສຂ ເພື່ອເອົາໄປຕໍ່ຍອດໃນໜ້າທີ່ຕຳແໜ່ງຕົວເອງຊື່ໆດັ່ງນັ້ນຂ້າພະເຈົ້າຂໍເຊີນຊວນພໍ່ແມ່ພີ່ນ້ອງປະຊາຊົນລາວທຸກທົ່ວໜ້າ,ຈົ່ງອອກມາໃຊ້ສິດເລືອກເອົາ ສສຊ ແລະສສຂ ທີ່ມີຄວາມສາມາດ ແລະມີຄວາມຍຸຕິທຳເຂົ້າໄປເຮັດໜ້າທີ່ເປັນກະບອກສຽງແທນປະຊາຊົນລາວ.

  ທ່ານ ນາງ ພານິວັນ ລັດຕະນະໂກສິນ ປະທານບໍລິສັດຊັບມະຫາໄຊອະສັງຫາລິມະຊັບກໍ່ສະແດງທັດສະນະວ່າ: ໃນນາມເປັນຄົນລາວຜູ້ໜຶ່ງແນ່ນອນການເລືອກຜູ້ນຳປະເທດທຸກຄົນກໍ່ຢາກໄດ້ຜູ້ທີ່ມີວິໄສທັດທັກສະນະກວ້າງໄກຍອມເສຍສະຫຼະຕົນເອງມີຄວາມຈິງໃຈຕໍ່ປະເທດຊາດສາມາດສ້າງສາພັດທະນາປະເທດໃຫ້ຈະເລີນກ້າວໜ້າທີ່ສຳຄັນຕ້ອງມີນໍ້າໄຈຮັກຊາດຊື່ສັດຕໍ່ພັກລັດ ແລະປະຊາຊົນ.

 ທ່ານ ນາງ ວຽງສັກດາ ແສງສຸລິນ ເຈົ້າຂອງຄລິຟວີວຣີ ເວີໄຊ ລີສອດ ແລະຮ້ານອາຫານສະແດງຄວາມຮູ້ສຶກວ່າ: ສຳລັບຄວາມຮູ້ສຶກຕົນເອງກໍຄືທຸກຄົນແມ່ນລ້ວນຢາກ ໄດ້ຜູ້ນຳມີຄວາມຮູ້ຄວາມສາມາດມີປະສົບການຍອມເສຍສະຫຼະເພື່ອສ່ວນລວມສະເໝີ ແລະທີ່ສຳຄັນຕ້ອງມີນໍ້າໃຈຮັກຊາດຊື່ສັດຕໍ່ພັກ, ລັດ ແລະປະຊາຊົນ, ສະນັ້ນເນື່ອງ ໃນໂອກາດເລືອກຕັ້ງໃນນາມເປັນປະຊາຊົນຄົນລາວຜູ້ໜຶ່ງຂໍເຊີນຊວນ ແລະຮຽກຮ້ອງໃຫ້ພວກເຮົາຄົນລາວທຸກຄົນທີ່ມີສິດເລືອກຕັ້ງອອກມາໃຊ້ສິດຂອງຕົນເອງເພື່ອເລືອກເອົາຜູ້ທີ່ມີຄຸນລັກສະນະທີ່ຄວາມເໝາະສົມເຂົ້າໄປເປັນກະບອກສຽງຂອງທຸກຄົນຢູ່ໃນສະພາເພາະສິ່ງນີ້ມັນໄດ້ສະແດງອອກໃຫ້ເຫັນວ່າທ່ານເປັນຄົນທີ່ມີຄວາມຮັກປະເທດ ຊາດຮັກບ້ານເກີດເມືອງນອນສະນັ້ນຂ້າພະເຈົ້າຂໍຝາກຄຳເວົ້ານີ້ວ່າ “ຮັກຊາດຕ້ອງອອກໄປໃຊ້ສິດເລືອກຕັ້ງ” ເພາະຊາຕາກໍາຂອງປະເທດຊາດຂຶ້ນຢູ່ໃນກໍາມືຂອງພວກເຮົາທຸກຄົນ.

ຂ່າວ: ບຸນນິກ

แชร์