ຄຶກຄັກ ບຸນກາເຟພູພຽງບໍລິເວນ ກວ່າ 50 ພາກສ່ວນຮ່ວມວາງສະແດງ

  ບັນຍາກາດຄຶກຄັກເປັນໄປຕາມຄາດໝາຍທີ່ກໍານົດໄວ້ສໍາລັບງານວາງສະແດງຂາຍສິນຄ້າໃນບຸນກາເຟພູພຽງບໍລະເວນປະຈໍາປີ 2021 ທີ່ໄດ້ເປີດຂຶ້ນຢູ່ນະຄອນປາກເຊ ແຂວງຈໍາປາສັກ ຊຶ່ງມີບັນດາຜູ້ປະກອບການ ແລະຫົວໜ່ວຍທຸລະກິດເຂົ້າຮ່ວມວາງສະແດງຂາຍສິນຄ້າຫຼາຍກວ່າ 50 ຫົວໜ່ວຍລວມມູນຄ່າ 3,5 ຕື້ກີບ.

 ບຸນດັ່ງກ່າວເລີ່ມຂຶ້ນແຕ່ວັນທີ 8 ກຸມພາ ຜ່ານມາທີ່ສູນການຄ້າແຟຣນຊິບມໍໂດຍການເປັນປະທານເປີດງານຂອງທ່ານ ວິໄລວົງ ບຸດດາຄໍາເຈົ້າແຂວງໆ ຈໍາປາສັກ,ມີທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາແລະການ,ທ່ານ ເພັດ ພົມພິທັກ ລັດຖະມົນຕີກະຊວງກະສີກໍາ ແລະປ່າໄມ້ພ້ອມດຽວກັນນີ້ກໍ່ມີບັນດາທ່ານການນໍາຈາກສູນກາງ, ການນໍ້າຈາກບັນດາ 4 ແຂວງພາກໃຕ້ ແລະບັນດານັກປະກອບການເຂົ້າຮ່ວມຢ່າງພ້ອມພຽງ.

  ໃນພິທີທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກໄດ້ລາຍງານກ່ຽວກັບການຈັດງານໃຫ້ຮູ້ວ່າ: ເພື່ອຮັບປະກັນໃຫ້ແກ່ການເປີດງານບຸນກາເຟພູພຽງບໍລະເວນໃຫ້ສາມາດດໍາເນີນໄປຕາມຈຸດປະສົງ ແລະຄາດໝາຍຮັບປະກັນການປ້ອງກັນການແຜ່ລະບາດຂອງເຊື້ອພະຍາດໂຄວິດ-19, ໄດ້ກໍານົດຈຸດທາງເຂົ້າ-ອອກ ແລະວາງແຜນການກວດກາສຸຂະພາບຂອງປະຊາຊົນທີ່ເຂົ້າມາທ່ຽວຊົມ ແລະເລືອກຊື້ສິນຄ້າພາຍໃນງານ ແລະໃນສູນການຄ້າ 1 ຈຸດກວດ, ຊຶ່ງນອກຈາກກວດກາອຸນຫະພູມແລ້ວຍັງໄດ້ແຈ້ງໃຫ້ທຸກຄົນສວບຜ້າອັດປາກ-ດັງກ່ອນເຂົ້າຮ່ວມໃນງານຕະຫຼອດ 3 ວັນທີ່ມີແພດໝໍປະຈໍາປົກກະຕິ,ຊຶ່ງພາຍໃນງານຄັ້ງນີ້ແມ່ນໄດ້ໄດ້ມີຫົວໜ່ວຍທຸລະກິດເຂົ້າຮ່ວມຈໍາໜ່າຍສິນຄ້າທັງໝົດ 56 ຫົວໜ່ວຍ,ຜະລິດຕະພັນສິນຄ້າທີ່ນໍາມາຂາຍມີມູນຄ່າ 3,5 ຕື້ກີບ,ໃນນັ້ນປະກອບມີຫົວໜ່ວຍກຸ່ມຜູ້ຜະລິດ-ສະຫະກອນຈໍານວນ 4 ຫົວໜ່ວຍ, ບໍລິສັດເກັບຊື້ ແລະສົ່ງອອກຈໍານວນ 17 ຫົວໜ່ວຍ, ໂຮງງານອຸດສາຫະກໍາປຸງແຕ່ງ 5 ຫົວໜ່ວຍ, ກຸ່ມຜະລິດສິນຄ້າໂອດອບ ແລະຫັດຖະກໍາຈໍານວນ 15 ຫົວໜ່ວຍ ແລະມາຈາກຕ່າງແຂວງອີກຈໍານວນໜຶ່ງຊຶ່ງເຮັດໃຫ້ບັນຍາກາດໃນມື້ເປີດງານ ແລະການຊື້-ຂາຍໃນມື້ຕໍ່ມາມີບັນຍາ ກາດຄຶກຄື້ນພໍສົມຄວນ.

 ທ່ານ ບຸນຍະເດດ ທອງສະຫວັນ ໃຫ້ຮູ້ຕື່ມວ່າ: ພາຍໃນງານຍັງໄດ້ມີການຈັດກອງປະຊຸມສໍາມະນາ 7 ຫົວຂໍ້ທີ່ສໍາຄັນຈາກພາກສ່ວນທີ່ກ່ຽວຂ້ອງທັງສູນກາງ ແລະທ້ອງ ຖິ່ນເປັນຕົ້ນ: ຫົວຂໍ້ສໍາມານາກ່ຽວກັບສະພາບການຜະລິດກາເຟ,ຫົວຂໍ້ການຄ້າຂາຍກາເຟລາວ,ທ່າອ່ຽງຂອງຕະຫຼາດກາເຟໂລກ ແລະສະພາບການສົ່ງອອກກາເຟ, ຫົວ ຂໍ້ການເຂົ້າເຖິງແຫຼ່ງທຶນເພື່ອຜະລິດກາເຟ (SME); ຫົວຂໍ້ການພັດທະນາວຽກງານຖິ່ນກໍາເນີດສິນຄ້າຢູ່ ສປປ ລາວ, ຫົວຂໍ້ການໂຄສະນາກາເຟລາວຄຸນນະພາບເຂົ້າ ເຖິງຕະຫຼາດກາເຟ ແລະຫົວຂໍ້ອື່ນໆທີ່ລ່ວນແຕ່ມີຄວາມໝາຍ ແລະຄວາມສໍາຄັນໃຫ້ແກ່ຜູ້ປະກອບການດ້ານກາເຟໃນລາວ.

ໂດຍ: ໂພທິລາດ

แชร์