ເອໄອເອັຟ ຈະລົງທຶນຫຼາຍຂະແໜງການຢູ່ຈຳປາສັກ

  ກຸ່ມບໍລິສັດ ເອໄອເອັຟ (AIF) ຈະເຂົ້າມາລົງທຶນ ແລະຊ່ວຍເຫຼືອໃນການພັດທະນາເສດຖະກິດ-ສັງຄົມຂອງ ແຂວງຈໍາປາສັກ ໃນຫຼາຍຂະແໜງການທີ່ລ້ວນແຕ່ເປັນໂຄງການຍຸດທະສາດທີ່ສໍາຄັນໂດຍສະເພາະແມ່ນດ້ານສາທາລະນະສຸກ, ດ້ານສະບຽງອາຫານ ແລະ ສິນຄ້າກະສີກໍາແບບອຸດສາຫະກໍາ ແລະ ການສະໜອງທຶນໃຫ້ແກ່ທຸລະກິດຂະໜາດນ້ອຍ ແລະຂະໜາດກາງລວມໄປທັງການພັດທະນາການສຶກສາຫັນໄປສູ່ຄວາມທັນສະໄໝ.

  ສໍາລັບບົດບັນທຶກການຮ່ວມມືເພື່ອພັດທະນາເສດຖະກິດ-ສັງຄົມລະຫວ່າງ ອໍານາດການປົກຄອງແຂວງຈໍາປາສັກ ແລະກຸ່ມບໍລິສັດ ເອໄອເອັຟ AIF ທີ່ໄດ້ເຊັນສັນຍາຮ່ວມກັນປະກອບມີ 6 ສະບັບ ຄື: 1, ແມ່ນບົດບັນທຶກການຮ້ວມມືວ່າດ້ວຍການຊ່ວຍເຫຼືອຈາກກຸ່ມບໍລິສັດ ເອໄອເອັຟແລະບັນດາຄູ່ຮ່ວມທຸລະກິດເພື່ອສ້າງຕຶກນອນຄົນເຈັບໃຫ້ແກ່ໂຮງໝໍແຂວງຈໍາປາສັກ; 2, ແມ່ນບົດບັນທຶກການຮ່ວມມືໂຄງການສຶກສາ, ການລົງທຶນຜະລິດສະບຽງ ແລະສິນຄ້າກະສີກໍາແບບອຸດສາຫະກໍາໃນຮູບແບບ 4P ແລະBOT ຢູ່ເມືອງໂພນທອງ, ປະທຸມພອນແລະເມືອງຊະນະສົມບູນ; 3, ແມ່ນບົດບັນທຶກການຮ່ວມມືໂຄງການສຶກສາເພື່ອປັບປຸງ ແລະຍົກລະດັບການບໍລິຫານການຂົນສົ່ງ, ການປ່ຽນຖ່າຍສິນຄ້າກະສີກໍາ, ອຸດສາຫະກໍາເພື່ອໃຫ້ແຂວງຈໍາປາສັກ ເປັນສູນກາງ ແລະໂລຈິດສະຕິກເຂດສາມຫຼຽມມໍລະກົດ; 4, ແມ່ນບົດບົນທຶກການຮ່ວມມືວ່າດ້ວຍການສະໜອງທຶນເພື່ອສະໜັບສະໜູນການຜະລິດຂອງທຸລະກິດ IME ຢູ່ ແຂວງຈໍາປາສັກ ໃນວົງເງິນ 100 ຕື້ກີບ.

  ສໍາລັບບົດບັນທຶກສະບັບທີ 5, ແມ່ນການຮ່ວມມືວ່າດ້ວຍການສຶກສາການຫັນເປັນທັນສະໄໝລະບົບ E-LOCAL GOVERNMENT ແລະປັບປຸງການສື່ສານພາກລັດຂອງແຂວງຈໍາປາສັກ ແລະ 6, ແມ່ນບົດບັນທຶກການຮ່ວມມືວ່າດ້ວຍການສຶກສາການຫັນເປັນທັນສະໄໝການບໍລິຫານລະບົບນໍ້າປະປາ ແລະ ການບໍລິການສໍາລະຄ່ານໍ້າປະປາຜ່ານລະບົບອິນເຕີເນັດ.

 ພິທີເຊັນບົດບັນທຶກດັ່ງກ່າວຈັດຂຶ້ນໃນວັນທີ 8 ຕຸລາ 2021 ຜ່ານມາ ທີ່ໂຮງແຮມຈໍາປາສັກ ແກຣນນະຄອນປາກເຊ ແຂວງຈໍາປາສັກ, ໂດຍການໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີທ່ານ ປອ. ວິໄລວົງ ບຸດດາຄໍາ ເຈົ້າແຂວງງໆຈໍາປາສັກ, ມີບັນດາທ່ານລັດຖະມົນຕີຈາກກະຊວງຕ່າງໆ ແລະພະແນກການຕ່າງໆທີ່ກ່ຽວຂ້ອງຂອງແຂວງ ແລະປະທານກຸ່ມບໍລິສັດ ເອໄອເອັຟ ແລະນັກວິຊາການເຂົ້າຮ່ວມ.

ໂດຍ: ໂພທິຣາຊ

แชร์