ເສີມຄວາມປອດໄພໃຫ້ໂຮງງານຕັດຫຍິບ

 ໃນລະຫວ່າງວັນທີ 9-11 ກຸມພາ 2021 ສະພາການຄ້າ ແລະອຸດສາຫະກໍາແຫ່ງຊາດຮ່ວມກັບກະຊວງແຮງງານ ແລະສະຫວັດດີການສັງຄົມ, ສະມາຄົມອຸດສາຫະກໍາຕັດຫຍິບໄດ້ຈັດຊຸດຝຶກອົບຮົມວຽກງານຄວາມປອດໄພ ແລະສຸຂະພາບແຮງງານໃຫ້ໂຮງງານຕັດຫຍິບຊຸດທີ 4 ໂດຍສະໜັບສະໜູນຈາກໂຄງການ VISIN ZERO FUND ໂດຍການເປັນປະທານຂອງທ່ານ ພັດ ສັນຕິ ບຸດສິວົງສັກ ຄະນະບໍລິຫານງານ ສຄອຊ ຮອງປະທານສະມາຄົມອຸດສາຫະກໍາຕັດຫຍິບລາວ,ທ່ານ ພົງໄຊສັກ ອິນ ຖາລາດ ຫົວໜ້າຄຸ້ມຄອງແຮງງານກະຊວງ ຮສສ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ການຝຶກອົບຮົມຄັ້ງນີ້ເພື່ອໃຫ້ບັນດາໂຮງງານຕັດຫຍິບຕົວແບບຂັ້ນພື້ນຖານໃນຫົວໜ່ວຍແຮງງານລະບົບບໍລິຫານຄວາມປອດໄພ ແລະສຸຂະພາບແຮງງານໃນໂຮງງານ ພ້ອມທັງຊ່ວຍໃຫ້ຫົວໜ່ວຍທຸລະກິດໃນການພັດທະນາທຸລະກິດເພີ່ມຜົນຜະລິດເພີ່ມຂຶ້ນ, ເພື່ອເຮັດໃຫ້ຊິວິດການເປັນຢູ່ຂອງຜູ້ອອກແຮງງານດີຂຶ້ນ ແລະເພື່ອເປັນການສ້າງສາຍພົວພັນແຮງງານທີ່ດີລະຫວ່າງຜູ້ອອກແຮງງານ ແລະຜູ້ໃຊ້ແຮງງານແລະວຽກງານການປ້ອງກັນພະຍາດໂຄວິດ-19.

  ການຝຶກອົບຮົມດັ່ງກ່າວຜູ້ເຂົ້າຮ່ວມຈະໄດ້ແລກປ່ຽນບົດຮຽນ, ເຂົ້າໃຈບົດບາດ ແລະໜ້າທີ່ຂອງຄະນະຮັບຜິດຊອບຄວາມປອດໄພ ແລະສຸຂະພາບແຮງງານຕາມດໍາລັດວ່າດ້ວຍຄວາມປອດໄພ ແລະສຸຂະພາບແຮງງານ, ເພື່ອຜັນຂະຫຍາຍສູ້ວຽກງານຂອງຕົນ, ເຂົ້າໃຈອັນຕະລາຍ ແລະຄວາມສ່ຽງໃນຫົວໜ່ວຍແຮງງານພ້ອມດຽວກັນນີ້ ເພື່ອປັບປຸງວຽກງານຄວາມປອດໄພ ແລະ ສຸຂະພາບແຮງງານໃຫ້ດີຂຶ້ນເປັນຕົ້ນ: ຄວາມປອດໄພຂອງເຄື່ອງຈັກ, ສະພາບແວດລ້ອມ, ຄວາມປອດໄພດ້ານສານເຄມີ ແລະອື່ນໆ.

แชร์