ທົ່ວປະເທດປັກດຳນາແຊງໄດ້ເກືອບ 60%

   ການຜະລິດເຂົ້ານາແຊງຂອງຊາວນາບັນດາແຂວງຕ່າງໆ ໂດຍສະເພາະໃນລະດູແລ້ງນີ້ເຫັນວ່າເປັນຂະບວນຟົດຟື້ນດີ ສົກປີ 2020-2021 ສາມາດປັກດໍາໄດ້ແລ້ວ 52.749 ເຮັກຕາ ເທົ່າກັບ 58%.

 ອີງຕາມບົດລາຍງານຂອງກະຊວງກະສິກໍາ ແລະປ່າໄມ້ໃຫ້ຮູ້ວ່າມາຮອດປະຈຸບັນປະຊາຊົນສາມາດຕົກກ້າໄດ້ 6.265 ເຮັກຕາ ເທົ່າກັບ86%, ກຽມດິນໄດ້ 62.572 ເຮັກຕາ ເທົ່າກັບ 68% ແລະປັກດໍາໄດ້ 52.749 ເຮັກຕາ ເທົ່າກັບ 58% ຂອງເນື້ອທີ່ແຜນການ 91.500 ເຮັກຕາແລະຈະໃຫ້ໄດ້ຜົນຜະລິດປະມານ 417 ແສນໂຕນ, ດ້ວຍສະມັດຕະພາບ 4,57 ໂຕນຕໍ່ເຮັກຕາ.

ສໍາລັບວຽກງານລ້ຽງສັດສາມາດຜະລິດຢາປ້ອງກັນພະຍາດສັດແຕ່ລະຊະນິດຄື: ອະຫິວາໝູ 3 ແສນເຂັມ, ຈໍາໜ່າຍຢາ ແລະອຸປະກອນສັດຕະວະແພດຈໍານວນ 80,7 ພັນເຂັມ, ໄດ້ລົງຊຸກຍູ້ຕິດຕາມການຜະລິດອາຫານສັດຢູ່ໂຮງງານຜະລິດອາຫານສັດ ແລະປາໃນຂອບເຂດທົ່ວປະເທດສາມາດຜະລິດອາຫາສັດໄດ້ທັງໝົດ 16,04 ພັນໂຕນ (ອາຫານໝູ 5.837 ໂຕນ, ອາຫານສັດປີກ 5.135 ໂຕນ ແລະອາຫານປາ 5.071 ໂຕນ); ໄດ້ລົງກວດກາຄຸນນະພາບອາຫານສັດນໍາເຂົ້າຂອງບັນດາບໍລິສັດນໍາເຂົ້າ,ຟາມ ແລະຮ້ານຈໍາໜ່າຍອາຫານສັດ ແລະອາຫານປາໄດ້ນໍາເຂົ້າອາຫານສັດທັງໝົດ 23,4 ພັນໂຕນ (ອາຫານໝູ 2,1 ພັນໂຕນ,ອາຫານສັດປີກ 3,5 ພັນໂຕນ ແລະ ອາຫານປາ 17,7 ພັນໂຕນ); ໄດ້ລົງຕິດຕາມກວດກາການນໍາເຂົ້າແນວພັນສັດ ແລະ ປາຢູ່ບັນດາດ່ານຊາຍແດນໄທ ແລະ ສປ ຈີນ ໄດ້ນໍາເຂົ້າແນວພັນສັດ ທັງໝົດ 1,8 ແສນໂຕ (ໝູພໍ່-ແມ່ພັນ 695 ໂຕ, ໄກ່ສາມສາຍເລືອດ 80,4 ພັນໂຕ, ໄກ່ນ້ອຍພັນໄຂ່ 94,1 ພັນໂຕ, ໄກ່ແມ່ສາວ ພັນໄຂ່ 4 ພັນໂຕ, ໄກ່ນ້ອຍພັນຊີ້ນ 1,4 ພັນໂຕ ແລະລູກປານ້ອຍ 3 ແສນໂຕ); ຕິດຕາມກວດກາຜະລິດຕະພັນສິນຄ້າກ່ຽວກັບສັດ, ສັດນໍ້າ ແລະ ອາຫານທະເລທີ່ນຳເຂົ້າມາຈາກປະເທດໄທ, ສສຫວຽດນາມ ແລະກຳປູເຈຍຢູ່ບັນດາດ່ານຕ່າງໆໜຶ່ງເດືອນຜ່ານມາໄດ້ນຳເຂົ້າ ປາ, ຊີ້ນຈຳນວນ 24,5 ພັນກິໂລກຣາມ, ໄຂ່ຈຳນວນ 12 ພັນ ໜ່ວຍ, ຜະລິດຕະພັນສັດຈຳນວນ 1,8 ແສນກິໂລກຣາມ ແລະອາຫານທະເລຈຳນວນ1,08 ແສນກິໂລກຣາມ; ລົງເກັບກຳຂໍ້ມູນສະຖິຕິສັດລ້ຽງ ແລະສັກຢາກັນພະຍາດປາກເປື່ອຍລົງເລັບ, ຂຶ້ນທະບຽນພິມສັດໃນເຂດກັນຊົນ 22 ບ້ານ ຂອງເມືອງສິງ, ແຂວງຫຼວງນໍ້າທາ ຈຳນວນ 1,4 ພັນໂຕ;

   ສ່ວນວຽກງານການປູກພືດຜັກມາຮອດປະຈຸບັນຊາວກະສິກອນໄດ້ປູກພືດຜັກຊະນິດຕ່າງໆໄດ້ແລ້ວ 69,02 ພັນເຮັກຕາ ເທົ່າກັບ 45% ຂອງແຜນການ 1,52 ແສນເຮັກຕາ, ພືດທີ່ປູກຫຼາຍກວ່າໝູ່ແມ່ນໝາກໄມ້ 28,6 ພັນເຮັກຕາ, ພືດຜັກ 20,8 ພັນເຮັກຕາ, ມັນຕົ້ນ 5,3 ພັນເຮັກຕາ,ອ້ອຍ 2,5 ພັນເຮັກຕາ, ສາລີແຂງ 2,1 ພັນເຮັກຕາ ແລະສາລີຫວານ 1,2 ພັນ ໃນນັ້ນ, ແຂວງທີ່ປູກພືດຫຼາຍກວ່າໝູ່ແມ່ນພາກໃຕ້ປະຕິບັດໄດ້ 16,8 ພັນເຮັກຕາ,ພາກກາງ 10,3 ພັນເຮັກຕາ ແລະພາກເໜືອ 1,4 ພັນເຮັກຕາ,ສໍາລັບພືດຜັກແມ່ນເກັບກູ້ໄດ້ຫຼາຍຮອບແລ້ວເປັນຕົ້ນ: ໝາກຖົ່ວ, ຜັກສະລັດ, ຜັກຫອມ, ຜັກບົ່ວ, ຜັກກາດ, ຫອມລາບ.

ຂ່າວ: ຟ້າ - ເສດຖະກິດສັງຄົມ

แชร์