ເປີດໃຊ້ທາງແຕ່ທາປາງທອງຫາຕຸ້ມລານ

 ພິທີມອບ-ຮັບ ແລະເປີດນຳໃຊ້ເສັ້ນທາງເລກທີ 6.6313 ແຕ່ເຊບັ້ງນວນເມືອງສອງຄອນຫາເມືອງທ່າປາງທອງ ແຂວງສະຫວັນະເຂດ ຫາ ເມືອງຕຸ້ມລານ ແຂວງສາ ລະວັນ ໄດ້ຈັດຂຶ້ນໃນຕອນເຊົ້າວັນທີ 5 ກຸມພາ 2021 ທີ່ຫ້ອງວ່າການເມືອງທ່າປາງທອງ ແຂວງສະຫວັນະເຂດ, ໂດຍການເຂົ້າຮ່ວມຂອງ ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ສັນຕິພາບ ພົມວິຫານ ເຈົ້າແຂວງ ສະຫວັນະເຂດ,ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ທ່ານ ມ່າ ຢູຫົງ ຫົວໜ້າຜູ້ປະສານງານບໍລິສັດ ນໍລິນໂກສາທາລະນະລັດປະຊາຊົນຈີນ, ມີບັນດາຜູ້ຕາງໜ້າຈາກກະຊວງທີ່ກ່ຽວຂ້ອງ ແລະພະແນກການອ້ອມຂ້າງຂອງແຂວງສະຫວັນະເຂດ ແລະແຂວງສາລະວັນເຂົ້າຮ່ວມນຳ.

  ທ່ານ ວຽງວິໄລ ສຸລິນທອນ ຫົວໜ້າໂຄງການກໍ່ສ້າງເສັ້ນທາງດັ່ງກ່າວລາຍງານວ່າ: ໂຄງການກໍ່ສ້າງເສັ້ນທາງແຕ່ເຊບັ້ງນວນເມືອງສອງຄອນ ຫາ ເມືອງທ່າປາງທອງ ແຂວງສະຫວັນນະເຂດ ຫາ ເມືອງຕຸ້ມລານ ແຂວງສາລະວັນ ຫຼືເສັ້ນທາງ 6.6313 ໄດ້ຮັບການສ້າງຕັ້ງຂຶ້ນພາຍໃຕ້ການຕົກລົງຂອງລັດຖະມົນຕີກະຊວງໂຍທາທິການ ແລະຂົນສົ່ງ, ໂດຍແມ່ນບໍລິສັດ ອາກຄີເນຍອາສໂຊຊີ ເອສ ເປັນທີ່ປຶກສາໂຄງການ, ບໍລິສັດ ນໍລິນໂກ ສປ ຈີນ ເປັນຜູ້ຮັບເໝົາກໍ່ສ້າງ, ຊຶ່ງໜ້າວຽກທີ່ກໍ່ສ້າງປະກອບມີ: ກໍ່ສ້າງເສັ້ນທາງທີ່ມີລວງຍາວທັງໝົດ 88 ກິໂລແມັດ 200 ແມັດ,

  ຄວາມໄວຂອງການອອກແບບ 80 ກິໂລແມັດຕໍ່ຊົ່ວໂມງ, ນໍ້າໜັກຂອງການອອກແບບ 9,1 ໂຕນຕໍ່ເພົາ, ໂດຍທົ່ວໄປໜ້າທາງຢາງມີຄວາມກວ້າງ7 ແມັດ; ສະເພາະທາງໃນເຂດເທສະບານເມືອງທ່າປາງທອງ 3 ກິໂລແມັດ ແມ່ນມີໜ້າທາງປູຢາງກວ້າງ 9 ແມັດ ຊຶ່ງປະກອບດ້ວຍທາງຄົນຍ່າງ ແລະໄຟເຍືອງທາງ; ວຽກກໍ່ສ້າງຂົວເບຕົງ 19 ແຫ່ງ, ມີລວງຍາວ 470 ແມັດ, ວຽກກໍ່ສ້າງທໍ່ລະບາຍນໍ້າລອດທາງ, ວຽກກໍ່ສ້າງພື້ນຖານໂຄງລ່າງເມືອງທ່າປາງທອງ (ສ້າງສູນຝຶກອົບຮົມເຕັກນິກກະສິກຳເຊສາລະລອງ ແລະສະໜອງລົດຂົນສົ່ງຂີ້ເຫຍື່ອ),  ລວມມີມູນຄ່າການກໍ່ສ້າງທັງໝົດ 59,7 ລ້ານໂດລາສະຫະລັດ ທີ່ໄດ້ຮັບການສະໜັບສະໜູນກູ້ຍືມທຶນຈາກບໍລິສັດນໍລິນໂກ ສປ ຈີນ ເປັນເວລາ 14 ປີ ຊຶ່ງໄດ້ເຊັນສັນຍາຮັບເໝົາກໍ່ສ້າງກັນໃນວັນທີ 3 ພຶດສະພາ 2017 ແລະໄດ້ເລີ່ມລົງມືການກໍ່ສ້າງຕົວຈິງໃນວັນທີ 1 ຕຸລາ 2017 ໃຊ້ເວລາການກໍ່ສ້າງ 36 ເດືອນ ແລະສຳເລັດໂດຍພື້ນຖານໃນວັນທີ 1 ຕຸລາ 2020.

   ຫຼັງຈາກນັ້ນກໍໄດ້ມີການກ່າວຄຳເຫັນຈາກຕາງໜ້າບໍລິສັດນໍລິນໂກ ສປ ຈີນ ປະຈຳລາວ, ການກ່າວຮັບ ແລະມອບໃຫ້ທ້ອງຖິ່ນຂອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານເຈົ້າແຂວງສະຫວັນະເຂດກໍໄດ້ມີຄຳເຫັນກ່າວຮັບ ແລະມອບໃຫ້ປະຊາຊົນຊົມໃຊ້ໃຫ້ຍາວນານ,ຊຶ່ງເປັນການສະດວກໃນການຂົນສົ່ງສິນຄ້າ,ການລົງທຶນ ແລະການໄປມາຫາສູ່ເຊິ່ງກັນ ແລະກັນຂອງປະຊາຊົນ.

  ໃນພິທີຍັງໄດ້ມີການຜ່ານລັດຖະດຳລັດຂອງປະທານປະເທດສາທາລະນະລັດປະຊາທິປະໄຕ ປະຊາຊົນລາວວ່າດ້ວຍການປະດັບຫຼຽນໄຊພັດທະນາຊັ້ນ 1, ຫຼຽນໄຊແຮງ ງານຊັ້ນ II ແລະຊັ້ນ III; ດຳລັດຂອງນາຍົກລັດຖະມົນຕີວ່າດ້ວຍການປະດັບຫຼຽນກາແຮງງານ, ໃບຍ້ອງຍໍລັດຖະບານ ແລະຂໍ້ຕົກລົງຂອງທ່ານເຈົ້າແຂວງສະຫວັນະເຂດວ່າດ້ວຍການຍ້ອງຍໍສັນລະເສີນ ແລະຊົມເຊີຍບຸກຄົນ ແລະກົມກອງລວມໝູ່ທີ່ມີຜົນງານດີເດັ່ນປະກອບສ່ວນເຫື່ອແຮງ ແລະສະຕິປັນຍາໃນການກໍ່ສ້າງເສັ້ນທາງແຕ່ເຊບັ້ງນວນເມືອງສອງຄອນຫາເມືອງ ທ່າປາງທອງ ແຂວງສະຫວັນະເຂດ ຫາ ເມືອງຕຸ້ມລານ ແຂວງສາລະວັນ ໄດ້ຮັບຜົນສຳເລັດເປັນຢ່າງດີ.

  ໃນພິທີກໍໄດ້ມີການຮ່ວມຕັດແຖບຜ້າທີ່ເສັ້ນທາງບໍລິເວນຫ້ອງວ່າການເມືອງທ່າປາງທອງ ໂດຍມີທ່ານ ປອ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນະເຂດ, ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ທ່ານ ມ່າຢູຫົງ ຫົວໜ້າຜູ້ປະສານງານບໍລິສັດນໍລິນໂກສາທາລະນະລັດປະຊາຊົນຈີນ ແລະຊ່ອງໜ້າຈາກແຂກທີ່ເຂົ້າຮ່ວມ, ພ້ອມນັ້ນທ່ານ ບຸນຈັນ ສິນທະວົງ  ລັດຖະມົນຕີກະຊວງໂຍທາທິການ ແລະ ຂົນສົ່ງກໍໄດ້ລັ່ນຄ້ອງ 9 ບາດເປີດນຳໃຊ້ເສັ້ນທາງຢ່າງເປັນທາງການ.

ໂດຍ: ຂ່າວສະຫວັນ

แชร์