ສະພາບໍລິຫານ ທຫລ ຕີລາຄາວຽກປີ 2020

ກອງປະຊຸມສະພາບໍລິຫານທະນາຄານແຫ່ງ ສປປ ລາວ (ທຫລ) ຄັ້ງທີ II ປະຈຳປີ 2020 ໄດ້ສຳເລັດລົງດ້ວຍໝາກຜົນຈົບງາມໃນວັນທີ 9 ກຸມພາ 2021 ທີ່ຫ້ອງປະຊຸມ ທຫລ ໂດຍການໃຫ້ກຽດເປັນປະທານຂອງທ່ານ ສອນໄຊ ສິດພະໄຊ ກຳມະການສູນກາງພັກ, ຜູ້ວ່າການ ທຫລ, ປະທານສະພາບໍລິຫານ ທຫລ; ພ້ອມນີ້, ກໍ່ມີບັນດາ ຮອງປະທານ-ກໍາມະການສະພາບໍລິຫານ ທຫລ, ຮອງຜູ້ວ່າການ ທຫລ ແລະ ບັນດາກົມທີ່ກ່ຽວຂ້ອງໂດຍກອງປະຊຸມໄດ້ຕີລາຄາ ແລະ ທົບທວນຄືນການຈັດຕັ້ງປະຕິບັດວຽກງານໄລຍະ 1 ປີ ແລະກໍານົດທິດທາງແຜນການສຳລັບປີ 2021.

 ກອງປະຊຸມໄດ້ຄົ້ນຄວ້າພິຈາລະນາຕໍ່ບົດສະຫຼຸບລາຍງານການເຄື່ອນໄຫວວຽກງານທະນາຄານປີ 2020, ທິດທາງແຜນການປີ 2021 ໂດຍປະກອບດ້ວຍການເຄື່ອນ ໄຫວວຽກງານຂອງ ທຫລ 3 ເດືອນທ້າຍປະຈໍາປີ 2020 ແລະທິດທາງແຜນການປີ 2021; ການ ຈັດຕັ້ງປະຕິບັດແຜນເງິນຕາຮອດທ້າຍ ປີ 2020 ແລະທິດທາງແຜນການປີ 2021; ການຈັດຕັ້ງປະຕິບັດແຜນງົບປະມານປະຈໍາປີ 2020 ແລະທິດທາງແຜນການປີ 2021;ພ້ອມນີ້,ກໍມີບາງບັນຫາປີ່ນອ້ອມອື່ນໆຕິດພັນກັບການຈັດຕັ້ງປະຕິບັດມະຕິກອງປະຊຸມຄັ້ງຜ່ານມາ.

  ຄືດັ່ງທີ່ຮູ້ແລ້ວວ່າປີ 2020 ຜ່ານມາ, ສະພາບການຂອງສາກົນ ແລະພາກພື້ນສືບຕໍ່ຜັນແປຢ່າງໄວວາ, ຂາດຄວາມມີສະເຖຍລະພາບ, ໄພທໍາມະຊາດ ແລະການແຜ່ລະບາດຂອງພະຍາດໂຄວິດ-19 ທີ່ຍັງບໍ່ທັນຜ່ອນຄາຍລົງ, ຄ່ຽງຄູ່ກັນນັ້ນ, ພາຍໃນປະເທດບັນຫາສະພາບເສດຖະກິດ,ການເງິນ-ເງິນຕາທີ່ບອບບາງ,ມີໜີ້ສິນສູງ ແລະສະພາບແຫຼ່ງເງິນຕາຕ່າງປະເທດທີ່ຈະມາດຸ່ນດ່ຽງໃຫ້ສັງຄົມ ແລະຊຳລະໜີ້ຕ່າງປະເທດຍັງມີຈຳກັດຊຶ່ງສົ່ງຜົນກະທົບທັງທາງກົງ ແລະທາງອ້ອມຕໍ່ການຮັກສາສະເຖຍລະພາບທາງດ້ານການຄຸ້ມຄອງເສດຖະກິດມະຫາພາກຢ່າງຫຼີກລ່ຽງບໍ່ໄດ້, ເຖິງຢ່າງໃດກໍຕາມ, ພາຍໃຕ້ການຊີ້ນຳຕົວຈິງຢ່າງໃກ້ສິດຂອງພັກ ແລະລັດຖະບານ,ການສະ ໜັບສະໜູນຈາກກຳມະການສະພາບໍລິຫານ ແລະຄວາມເປັນເຈົ້າການຂອງຄະນະພັກ-ຄະນະນໍາ ທຫລ ທີ່ໄດ້ປະຕິບັດໜ້າທີ່ການເມືອງຂອງຕົນຊຶ່ງເຫັນວ່າ: ສະພາບເສດຖະກິດ, ການເງິນ-ເງິນຕາຍັງມີຄວາມສະຫງົບໂດຍພື້ນຖານ ແລະສະພາບຄ່ອງຂອງລະບົບທະນາຄານ-ສະຖາບັນການເງິນຍັງສືບຕໍ່ເຄື່ອນໄຫວປົກກະຕິແຕ່ກໍ່ຍັງ ມີສິ່ງທ້າທ້າຍຫຼາຍດ້ານທີ່ຍັງຈະຕ້ອງປະເຊີນຕໍ່ໜ້າເພື່ອສືບຕໍ່ແກ້ໄຂໃຫ້ດີຂຶ້ນ.

  ທ່ານຜູ້ວ່າການ ທຫລ, ປະທານສະພາບໍລິຫານ ທຫລ ໄດ້ຕີລາຄາສູງຕໍ່ການຊີ້ນຳ-ນຳພາຂອງສູນກາງພັກ ແລະ ລັດຖະບານຜ່ານມາໂດຍສະເພາະການມີສ່ວນຮ່ວມ ແລະຄວາມພະຍາຍາມຂອງທຸກຝ່າຍໃນສັງຄົມທີ່ໄດ້ມີການປະກອບສ່ວນເຂົ້າໃນຂະແໜງການເງິນຕາໃນນີ້ກໍ່ມີບັນດາຂະແໜງການ-ທ້ອງຖິ່ນ, ສະພາບໍລິຫານ ທຫລ, ບັນດາກົມທີ່ກ່ຽວຂ້ອງຂອງ ທຫລ ຈຶ່ງສາມາດຍາດໄດ້ຜົນສຳເລັດໃນຫຼາຍດ້ານປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ແລະຍັງເນັ້ນຕື່ມວ່າ: ປີ 2021 ເປັນປີທໍາອິດແຫ່ງການຈັດຕັ້ງຜັນຂະຫຍາຍເນື້ອໃນຈິດໃຈມະຕິ XI ຂອງພັກ ແລະແຜນພັດທະນາເສດຖະກິດ-ສັງຄົມ 5 ປີແຫ່ງຊາດຄັ້ງທີ IX (2021-2025) ຂອງລັດເຂົ້າສູ່ການຈັດຕັ້ງປະຕິບັດຕົວຈິງເພື່ອຈັດຕັ້ງບັນດາຄາດໝາຍທີ່ກຳນົດໄວ້ ແລະຈົ່ງສືບຕໍ່ເອົາໃຈໃສຈັດຕັ້ງປະຕິບັດແຜນເງິນຕາໂດຍສະເພາະການຮັກ ສາສະເຖຍລະພາບທາງດ້ານເງິນຕາແຫ່ງຊາດ, ປັບປຸງລະບົບທະນາຄານໃຫ້ມີຄວາມໜັກແໜ້ນເຂັ້ມແຂງ,ຈັດຕັ້ງແຜນງົບປະມານ ທຫລ ຕາມມະຕິກອງປະຊຸມສະພາບໍລິຫານ ທຫລ ຮອງຮັບດ້ວຍຄວາມເປັນເຈົ້າການ ແລະມີຜົນໄດ້ຮັບເປັນຢ່າງດີ.

ຂ່າວ: ຣັດສະໝີ ດວງສັດຈະ

แชร์