ເຊັນສັນຍາຮ່ວມຂຸດຄົ້ນຄຳ

  ວັນທີ 5 ກຸມພາ 2021 ທີ່ກົມເສດຖະກິດກະຊວງປ້ອງກັນປະເທດໄດ້ມີພິທີເຊັນສັນຍາຮ່ວມທຸລະກິດເພີ່ມເຕີມການປ່ຽນແທນຜູ້ຖືຮຸ້ນໃນໂຄງການຊອກຄົ້ນສໍາຫຼວດຂຸດຄົ້ນປຸງແຕ່ງແຮ່ຄໍາ ແລະແຮ່ຕິດພັນຢູ່ເຂດເມືອງທ່າໂທມ ແລະເມືອງອະນຸວົງ ແຂວງໄຊສົມບູນລະຫວ່າງກົມເສດຖະກິດກະຊວງປ້ອງກັນປະເທດ ແລະບໍລິສັດລາວກະ ລັງເດໂປ ຈໍາກັດ ໂດຍການລົງນາມຂອງທ່ານ ພົນຈັດຕະວາ ຄໍາມີ ຫຼ້າບຸນທັນ ຫົວໜ້າກົມເສດຖະກິດກະຊວງປ້ອງກັນປະເທດ ແລະ ທ່ານ ຊານວາ ຊາລາອູລີ ອໍານວຍການບໍລິສັດ ລາວກະລັງເດໂປ ຈໍາກັດ, ມີທ່ານ ພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດຜູ້ຊີ້ນໍາຂົງເຂດເສດຖະກິດກອງທັບ.

ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ, ການເຊັນສັນຍາຮ່ວມທຸລະກິດຄັ້ງນີ້ແມ່ນອີງຕາມຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການອະນຸມັດໃຫ້ກົມເສດຖະກິດປ່ຽນແທນກຸ່ມບໍລິສັດລັດພັດທະນາຊົນນະບົດໃໝ່ໃນການເຈລະຈາ ແລະເຊັນສັນຍາກັບລັດຖະບານແຫ່ງ ສປປ ລາວ ໃນໂຄງການຊອກຂຸດຄົ້ນສໍາຫຼວດປຸງແຕ່ງແຮ່ຄໍາ ແລະແຮ່ຕິດພັນຢູ່ເຂດບ້ານ ເມືອງອ້ອມ ເມືອງອະນຸວົງ ແຂວງໄຊສົມບູນ ສະບັບເລກທີ 3266/ກປທ ລົງວັນທີ 3 ສິງຫາ 2020 ປະ ຕິບັດຕາມຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການປັບປຸງກຸ່ມບໍລິສັດພັດທະນາຊົນນະບົດໃໝ່ ແລະລັດວິສາຫະກິດຂຸດຄົ້ນຜະລິດຫີນສະບັບເລກທີ 1257/ກປທ ລົງວັນທີ 26 ກຸມພາ 2020 ອີງຕາມສັນຍາຮ່ວມທຸລະກິດໃນໂຄງການຊອກຂຸດຄົ້ນສໍາຫຼວດ ແລະ ປຸງແຕ່ງແຮ່ຄໍາລະແຮ່ຕິດພັນຕ່າງໆຢູ່ຂອບເຂດບ້ານອ້ອມ ເມືອງອະນຸວົງ ແຂວງໄຊສົມບູນ ລະຫວ່າງກຸ່ມບໍລິສັດລັດພັດທະນາຊົນນະບົດໃໝ່ ແລະບໍລິສັດກະລັງເດໂປຈໍາກັດ ສະບັບເລກທີ 00644 ລົງວັນທີ 9 ເມສາ 2015 ຊຶ່ງການຮ່ວມມືຂອງສອງຝ່າຍໃນໂຄງການນີ້ເບື້ອງຕົ້ນເປັນການຮ່ວມທຶນລະຫວ່າງກຸ່ມບໍລິສັດພັດທະນາຊົນນະບົດໃໝ່ ແລະ ບໍລິສັດ ລາວກະລັງເດໂປ ຈໍາກັດ ມີພື້ນທີ່ ນອນຢູ່ສອງເມືອງຄື: ເມືອງທ່າໂທມ ແລະເມືອງອະນຸວົງ ແຂວງໄຊສົມບູນໃນເນື້ອທີ່ເບື້ອງຕົ້ນທັງໝົດ 299,88 ກິໂລຕາແມັດ ພາຍຫຼັງທີ່ໄດ້ມີການລົງກວດກາພື້ນທີ່ຫຼາຍຄັ້ງ ແລະຄັ້ງຫຼ້າສຸດໃນເດືອນພະຈິກ 2020 ໄດ້ມີການຕັດພື້ນທີ່ອ່າງໂຕ່ງຈໍານວນ 2 ແຫ່ງອອກລວມທັງພື້ນທີ່ອື່ນໆທີ່ບໍ່ຈໍາເປັນ ແລະ ທັບຊ້ອນກັບພາກສ່ວນອື່ນປະຈຸບັນພື້ນທີ່ຕົວຈິງມີຢູ່ 177,68 ກິໂລຕາແມັດ ມີອາຍຸການສໍາປະທານ 20 ປີ ແລະສາມາດຕໍ່ໄດ້ຄັ້ງລະ 10 ປີ.

ຂ່າວ: ບຸນຊ້ອຍ

แชร์