ສຶກສາເອກະຊົນຕ້ອງປັບປຸງ 4 ຂັ້ນຕອນ ດຶງນັກສຶກສາເຂົ້າຮຽນຫຼາຍຂື້ນ

  ນັກເສດຖະສາດດ້ານການສຶກສາພາກເອກະຊົນລາວວິເຄາະການສຶກສາລາວຕ້ອງພັດທະນາໄປຕາມລະບົບ ແລະ ບຸກບືນປັບປຸງ 4 ຂັ້ນຕອນ ໂດຍເລີ່ມຈາກການສ້າງຄວາມສາມັກຄີກົມກຽວກັນລະຫວ່າງໂຮງຮຽນລັດ ແລະໂຮງຮຽນເອກະຊົນ, ການຍົກລະດັບຄວາມຮູ້ຄວາມສາມາດຜູ້ບໍລິຫານພະນັກງານຄູ-ອາຈານ, ການປັບປຸງໂຄງລ່າງພື້ນຖານການສຶກສາ ແລະ ເອົາວຽກງານອົງການຈັດຕັ້ງມະຫາຊົນເປັນຫຼາວັດແທກສ້າງຄົນໃຫ້ມີຄຸນນະພາບມີຄວາມຮູ້ຄວາມສາມາດມີຄຸນສົມບັດສິນທຳປະຕິວັດ. ຈຶ່ງຈະເຮັດໃຫ້ວຽກງານການສຶກສາພາກເອກະເຂັ້ມແຂງດຶງດູດເອົານັກຮຽນນັກສຶກສາເຂົ້າຮຽນວິຊາຊີບໃນສະຖາບັນການສຶກສາພາກເອກະຊົນໃນລາວໃຫ້ຫຼາຍຂຶ້ນ ແລະຍົກສູງດ້ານຄຸນນະພາບສະໜອງໃຫ້ໄດ້ຕາມຄວາມຕ້ອງການຂອງຕະຫຼາດແຮງງານໃນປະຈຸບັນ.

  ທ່ານ ປອ ຄຳແສນ ສີສະຫວົງ ປະທານສະມາຄົມນັກທຸລະກິດໜຸ່ມແຫ່ງຊາດລາວ, ປະທານສະມາຄົມການສຶກສາພາກເອກະຊົນລາວ, ໄດ້ຊີ້ແຈງວ່າ: ໃນສປປລາວມີສະຖາບັນການສຶກສາພາກເອກະຊົນ 900 ແຫ່ງ, ໃນນີ້ວິທະຍາໄລແລະສູນຝຶກວິຊາຊີບ 60 ກວ່າແຫ່ງ ໄດ້ພາກັນສຸມໃສ່ພັດທະນາຄຸນນະພາບການສຶກສາຕາມຫຼັກສູດແຫ່ງຊາດກ້າວໄປສູ່ມາດຕະຖານພາຍໃນປະເທດ ແລະ ທຽບທັນກັບສາກົນເພື່ອແບ່ງເບົາພາລະຂອງພາກລັດເຂົ້າໃນການພັດທະນາເສດຖະກິດ-ສັງຄົມ ແຫ່ງຊາດໃນໄລ ຍະຜ່ານມາ.

  ແນວໃດກໍຕາມເບິ່ງໃນຄວາມເປັນຈິງຍັງມີນັກສຶກລາວຈຳນວນໜຶ່ງຍັງໄປສຶກສາຕໍ່ທີ່ຕ່າງປະເທດ, ກາຍເປັນປະເດັນເຮັດໃຫ້ສະຖາບັນການສຶກສາພາກເອກະຊົນໃນລາວ ຕ້ອງໄດ້ເລັ່ງຄົ້ນຫາສາເຫດເພື່ອຫາທາງແກ້ໄຂເພື່ອໃຫ້ນັກສຶກສາລາວສົນໃຈຮຽນຢູ່ໃນປະເທດຖ້າບໍ່ແກ້ໄຂຈຸດນີ້ກໍ່ຈະຕະເຮັດໃຫ້ນັກສຶກສາໃນໂຮງຮຽນເອກະຊົນໃນລາວໜ້ອຍລົງ. ແຕ່ເພື່ອທາງອອກທີ່ດີສະນັ້ນບັນດາໂຮງຮຽນວິທະຍາໄລ, ສູນວິຊາຊີບຕ້ອງໄດ້ຮ້ອນໃຈປັບປຸງແກ້ໄຂສະຖາບັນການສຶກສາຂອງຕົນເອງໃຫ້ມີຄວາມເຂັ້ມແຂງຮອບດ້ານ.

  ທ່ານປະທານສະມາຄົມການສຶກສາພາກເອກະຊົນລາວຢໍ້າຕື່ມອີກວ່າ: ການສ້າງຄວາມເຂັ້ມແຂງນັ້ນບໍ່ແມ່ນເລື່ອງງ່າຍໆ ຕ້ອງເອົາໃຈໃສ່ແທ້ໆເພາະຕິດພັນຫຼາຍດ້ານທີ່ສຳຄັນຕ້ອງແກ້ໄຂ 4 ຂັ້ນຕອນຄື: 1. ຕ້ອງມີຄວາມສາມັກຄືກັນກັບໂຮງຮຽນລັດ, ອົງການຈັດຕັ້ງລັດເພື່ອຖອດຖອນບົດຮຽນຕ່າງຂອງວຽກງານການສຶກສາຢ່າງຮອບດ້ານ. 2. ຕ້ອງຍົກລະດັບຄວາມຮູ້ຄວາມສາມາດຂອງຄະນະອຳນວຍການ, ພະນັກງານຄຸ້ມຄອງລວມທັງຄູ-ອາຈານຜູ້ສິດສອນຕົວຈິງຕ້ອງໄດ້ຍົກລະດັບວິທີ່ການຮຽນການສອນ ແບບໃໝ່ນຳໃຊ້ເຕັກໂນໂລຊີທັນສະໄໝເຂົ້າໃນການສິດສອນ, ຊຶ່ງໃນສະພາບປະສົບບັນຫາພະຍາດໂຄວິດ-19 ການຮຽນ-ການ ສອນຍິ່ງພົບບັນຫາຍິ່ງຕ້ອງໄດ້ນໍາໃຊ້ເທັກໂນໂລຊີສອນແບບອອນລາຍຫຼາຍຂື້ນ. ຖ້າບໍ່ຍົກລະດັບດ້ານນີ້ກໍ່ຈະເຮັດໃຫ້ການຮຽນການສອນບໍ່ຄົບຫຼັກສູດ. 3. ໂຮງຮຽນເອກະຊົນຕ້ອງສືບຕໍ່ພັດທະນາໂຄງລ່າງພື້ນຖານການສຶກສາຕົ້ນຕໍແມ່ນອາຄານຮຽນ,ເສັ້ນທາງ,ຄວາມສະອາດ,ຮັກສາສິ່ງແວດລ້ອມສ້າງໃຫ້ເປັນໂຮງຮຽນສີຂຽວຮັບປະກັນຄວາມປອດໄພໃນການຮຽນ-ການສອນເພື່ອດຶງນັກສຶກສາເຂົ້າມາຮຽນຫຼາຍຂຶ້ນ.4 ຕ້ອງເອົາວຽກງານອົງການຈັດຕັ້ງມະຫາຊົນຊາວໜຸ່ມ-ແມ່ຍິງເປັນໄມ້ຫຼາວັດແທກສຶກສາອົບຮົມການເມືອງ-ແນວຄິດ, ສິນທຳປະຕິວັດໃຫ້ຄູ-ອາຈານ ອົງການຈັດຕັ້ງປະຕິບັດລະບຽບເພື່ອເປັນແບບຢ່າງທີ່ດີໃຫ້ແກ່ນັກຮຽນນັກສຶກສາໄປຄຽງຄູ່ກັນນັ້ນຕ້ອງໄດ້ພັດທະນາຫຼັກສູດໃໝ່ໆກະ ທັດຮັດສິດສອນນັກຮຽນເຂົ້າໃຈໄວຊ່ວຍໃຫ້ເຂົາເຈົ້າເປັນນັກຮຽນເກັ່ງພັດທະນາຕົນເອງກ້າວສູ່ຕະຫຼາດແຮງງານທີ່ມີຄຸນນະພາບໄດ້.

ສິ່ງເຫຼົ່ານີ້ເປັນທາງອອກທີ່ດີໃນການແກ້ປັນຫາຂອງນັກສຶກສາເຂົ້າມາຮຽນໜ້ອຍໃນໂຮງຮຽນເອກະຊົນລາວຖ້າເຮັດໄດ້ເປັນຈຸດດຶງດູດເອົານັກຮຽນມາຮຽນຫຼາຍຂຶ້ນເພາະໄລຍະປັດຈຸບັນນັກຮຽນເຂົ້າມາຮຽນມີຄວາມເບົາບາງຫຼາຍສະນັ້ນທຸກສະຖາບັນຕ້ອງໄດ້ເລັ່ງປັບປຸງປັບຕົວໃຫ້ທັນກັບຄວາມຕ້ອງການຂອງຜູ້ທີ່ຈະຮຽນ ແລະທຽບທັນກັບໂຮງຮຽນສາກົນໃນຕ່າງປະເທດ.

แชร์