ສາລະວັນເນັ້ນໂຮງງານສີກາເຟເລົ່າງາມ ແກ້ດ່ວນປະຊາຊົນກະທົບກິ່ນເໜັນໜັກ

 ເນື່ອງຈາກປະຊາຊົນ ເມືອງເລົ່າງາມ ແຂວງສາລະວັນ ຫຼາຍຄອບຄົວໄດ້ຮັບຜົນກະທົບຈາກສະພາບແວດລ້ອມ, ນໍ້າເນົ່າເປື່ອຍໄດ້ກໍ່ໃຫ້ເກີດກິ່ນເໝັນເນົ່າທີ່ສົ່ງຜົນບໍ່ດີຕໍ່ສຸ ຂະພາບຢ່າງແຮງມາໃນວັນທີ 3 ກຸມພາ 2021 ນີ້ທ່ານ ໂພໄຊ ໄຊຍະສອນ ເຈົ້າແຂວງສາລະວັນພ້ອມດ້ວຍພາກສ່ວນທີ່ກ່ຽວຂ້ອງກໍໄດ້ລົງຕິດຕາມສະພາບຕົວຈິງຂອງ ໂຮງງານສີໝາກກາເຟເຄິ່ງສໍາເລັດຮູບບໍລິສັດກາດລາວສາລະວັນອັນໄດ້ສົ່ງຜົນກະທົບຕໍ່ປະຊາຊົນໃນເຂດນັ້ນ.

  ຕໍ່ກັບບັນຫາດັ່ງກ່າວທ່ານເຈົ້າແຂວງສາລະວັນກໍໄດ້ຮັບຟັງການລາຍງານຕົວຈິງຈາກອົງການປົກ ຄອງເມືອງ, ບໍລິສັດ ແລະພາກສ່ວນທີ່ກ່ຽວຂ້ອງຕໍ່ກັບບັນຫາສະພາບ ເເວດລ້ອມທີ່ເກີດຈາກການດໍາເນີນກິດຈະການຂອງໂຮງງານສີໝາກ ກາເຟເຄິ່ງສໍາເລັດຮູບເຊັ່ນ: ຂະບວນການຊັກຟອກລ້າງເມັດກາເຟ,ມີລະບົບອ່າງເກັບສິ່ງເສດເຫຼືອ, ການອອກແບບລະບົບບໍາບັດສິ່ງເສດເຫຼືອບໍ່ໄດ້ມາດຖານ, ການບໍລິຫານຈັດການສິ່ງເສດເຫຼືອສະສົມໄວ້ປະລິມານຫຼາຍ, ຫຼາຍປີ ແລະກໍ່ໃຫ້ເກີດມີການໝັກບົ່ມ, ເຮັດໃຫ້ມີກິ່ນເໝັນກະຈາຍໃນວົງກ້ວາງອ້ອມຂ້າງໂຄງການອັນໄດ້ສົ່ງຜົນກະທົບຕໍ່ສັງຄົມ ແລະ ສິ່ງແວດລ້ອມ ແລະ ເກີດມີຜົນກະທົບເສຍຫາຍໃຫ້ແກ່ສັດນໍ້າໃຫຍ່ນ້ອຍທີ່ອາໄສຕາມລໍາຫ້ວຍຕ່າງໆ ແລະຕາມວັງສະຫງວນ, ນໍ້າຫ້ວຍມີກິ່ນເໝັນກະທົບເຖິງການລ້ຽງປາຂອງປະຊາຊົນໃນຂອບເຂດບໍລິເວນດັ່ງກ່າວ.

  ຜ່ານມາພາກສ່ວນຕ່າງໆທີ່ກ່ຽວຂ້ອງກໍໄດ້ມີການແນະນໍາປຶກສາ-ຫາລື ແລະ ໃຫ້ທາງບໍລິສັດແກ້ໄຂ ແລະ ຊົດເຊີຍຕໍ່ຜົນເສຍຫາຍໃຫ້ປະຊາຊົນທີ່ໄດ້ຮັບຜົນກະທົບຈາກສະພາບແວດລ້ອມອັນເຮັດໃຫ້ປາທີ່ປະຊາຊົນລ້ຽງຕາຍເປັນຈໍານວນຫຼາຍ, ໃນປະຈຸບັນທາງຄະນະກໍາມະການໄດ້ໂຈະການດໍາເນີນກິດຈະການເປັນຕົ້ນແມ່ນການສີໝາກກາເຟ, ສ່ວນກິດຈະກໍາອື່ນແມ່ນສືບຕໍ່ປົກກະຕິ, ເພື່ອປັບປຸງແຜນຄຸ້ມຄອງສິ່ງແວດລ້ອມ ແລະມາດຕະການອື່ນໆໃຫ້ໄດ້ຕາມມາດຕະການ ແລະຮັບປະກັນດ້ານສະພາບ ແວດລ້ອມ.

  ຈາກນັ້ນທ່ານເຈົ້າແຂວງສາລະວັນກໍໄດ້ເນັ້ນໃຫ້ບໍລິສັດແກ້ໄຂຢ່າງຮີບດ່ວນ, ພາກສ່ວນທີ່ກ່ຽວຂ້ອງຕ້ອງຕິດຕາມ,ກວດກາ,ບໍລິສັດກໍຕ້ອງປະຕິບັດຕາມກົດລະບຽບ, ສັນ ຍາ ແລະບົດບັນທຶກຢ່າງເຄັ່ງຄັດເພື່ອຮັບປະກັນບໍ່ໃຫ້ບັນຫາດັ່ງກ່າວເກີດຂຶ້ນອີກ, ບໍລິສັດ ແລະພາກສ່ວນທີ່ກ່ຽວຂ້ອງຕ້ອງໄດ້ປະສານສົມທົບກັນ, ຕໍ່ບັນຫາຂໍ້ຫຍຸ້ງຍາກເພື່ອແກ້ໄຂ ແລະ ຊ່ວຍເຫຼືອກັນ, ການດໍາເນີນກິດຈະການຕ່າງໆຂອງໂຮງຈັກໂຮງງານກໍຕ້ອງໄດ້ດໍາເນີນຕາມລະບຽບກົດໝາຍຕ້ອງຮັບປະກັນດ້ານຄວາມປອດໄພຕໍ່ສິ່ງ ແວດລ້ອມ ແລະສັງຄົມ.

ໂດຍ: ກິນດາວັນ ອ້ວນນາຄູ 

• 08/02/2021