120 ຮ້ານຈະເຂົ້າຮ່ວມເທດສະການອາຫານລາວ

  ສະມາຄົມນັກທຸລະກິດແມ່ຍິງລາວຮ່ວມກັບສູນກາງສະຫະພັນແມ່ຍິງລາວຈັດພິທີຖະແຫຼງຂ່າວເທສະການອາຫານລາວ ປະຈໍາປີ 2021 ຂຶ້ນໃນວັນທີ 5 ກຸມພາຜ່ານມາທີ່ຮ້ານອາຫານເລີປາແດກນະຄອນຫຼວງວຽງຈັນພາຍໃຕ້ການເປັນປະທານຂອງທ່ານ ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ,ປະທານຄະນະກໍາມະການກ່ຽວກັບການຈັດງານເທສະການອາຫານລາວ 2021 ທ່ານນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ນາງ ຈັນທະຈອນ ວົງໄຊ ກ່າວວ່າ: ເທສະການອາຫານລາວຈັດຂຶ້ນທຸກໆ ປີໂດຍເລີ່ມແຕ່ປີ 2006 ເປັນຕົ້ນມາ ແລະປີນີ້ຈະຈັດ 5 ມື້, ແຕ່ວັນທີ 23-27 ກຸມ ພາ 2021 ໂດຍຈຸດປະສົງ 1) ເພື່ອສ້າງໃຫ້ຮູ້ເຖິງແນວຄວາມຄິດ ແລະບັນຍາກາດອັນໃໝ່ໃນການອະນຸລັກອາຫານ, ການກິນຢູ່, ດໍາລົງຊີວິດໃຫ້ເປັນແບບວັດທະນະທໍາ, ຮີດຄອງປະເພນີດັ້ງເດີມ ແລະປັບໃຫ້ເຂົ້າກັບຍຸກສະໄໝຂອງຄົນລາວ, ເພື່ອເສີມສ້າງໃຫ້ເປັນບັນຍາກາດແບບສັງຄົມພື້ນເມືອງລາວທີ່ເຄີຍມີມາ; 2) ສືບຕໍ່ຊຸກຍູ້,

ສົ່ງເສີມແມ່ຍິງຜູ້ຜະລິດ, ຜູ້ປູກຝັງ, ລ້ຽງສັດທີປຸງແຕ່ງໃນຮ້ານອາຫານ, ໂຮງແຮມ, ຮ້ານຂາຍຍ່ອຍຈາກທ້ອງຖິ່ນຕ່າງໆ ແລະຈາກນະຄອນຫຼວງວຽງຈັນໄດ້ມາວາງສະແດງ ແລະ ຄ້າຂາຍແລກປ່ຽນນໍາກັນ; 3) ເພື່ອປຸກລະດົມເຊີນຊວນຜູ້ປະກອບການແມ່ຍິງໃນການຜະລິດເປັນສິນຄ້າໃຫ້ສາມາດສ້າງເຄືອຂ່າຍການຄ້າຢ່າງກວ້າງ ຂວາງໃນຂອບເຂດທົ່ວປະເທດ ແລະພາກພື້ນ, ເພື່ອສົ່ງເສີມນະໂຍບາຍລາວທ່ຽວລາວ ແລະເພື່ອສາມາດຕອບສະໜອງສິນຄ້າຢ່າງພຽງພໍໃຫ້ແກ່ຜູ້ມາທ່ຽວຊົມໄດ້ຈັບຈ່າຍຊື້ຂາຍຢ່າງສະດວກສະບາຍ; 4) ເພື່ອໂຄສະນາເຜີຍແຜ່ການຫຼຸດຜ່ອນພາວະໃຊ້ຖົງຢາງພາສະຕິກ, ຫັນມານິຍົມຊົມໃຊ້ວັດຖຸທໍາມະຊາດ, ບໍລິໂພກອາຫານພື້ນເມືອງລາວຈາກຜະລິດຕະພັນປອດສານພິດທີ່ດີຕໍ່ສຸຂະພາບ.

ທ່ານ ນາງ ຈັນທະຈອນ ວົງໄຊ ກ່າວຕື່ມວ່າ: ປີນີ້ມີຮ້ານວາງສະແດງ ແລະຂາຍອາຫານ, ເຄື່ອງດື່ມ, ຢາພື້ນເມືອງ, ເຄື່ອງຫັດຖະກຳຈາກພາຍໃນ ແລະ ຕ່າງປະເທດຈໍານວນ 120 ຮ້ານ ໃນນີ້ຮ້ານວາງສະແດງ ແລະຂາຍອາຫານມີ 104 ຮ້ານ, ຮ້ານວາງສະແດງ ແລະຂາຍປະເພດເຄື່ອງຫັດຖະກໍາ, ກະສິກຳ 16 ຮ້ານ; ນອກຈາກນີ້ພາຍໃນງານຈະມີຈັດຕັ້ງໃຫ້ມີການປະກວດການຕົບແຕ່ງຮ້ານ,ການຈັດວາງພາຊະນະໃສ່ອາຫານ,ການວາງສະແດງເຄື່ອງຂາຍແບບລາວໆໂດຍຄາດຄະເນຈະມີຄົນເຂົ້າ ຮ່ວມປະມານ 40.000 ເທື່ອຄົນ ແລະຄາດຄະເນວ່າຈະມີເງິນໝູນວຽນພາຍໃນງານ 5 ວັນ ປະມານ 2 ຕື້ກວ່າກີບ.

ຂ່າວ: ແປ

แชร์