ທົ່ວປະເທດມີຜູ້ລະເມີດ ຄຳສັ່ງເລກທີ 15/ນຍ 1.119 ຄົນ

 ໃນບົດສະຫຼຸບທີ່ທ່ານ ສີໃນ ມຽງລາວັນ ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດຖະບານສະເໜີຕໍ່ກອງປະຊຸມວຽກງານກວດກາທົ່ວປະເທດປະຈຳປີ 2020 ແລະ5 ປີ (2016-2020) ຈັດຂຶ້ນຢູ່ນະຄອນຫຼວງວຽງຈັນ ເມື່ອບໍ່ດົນມານີ້ໄດ້ຍົກໃຫ້ເຫັນກ່ຽວກັບການຕິດຕາມ-ກວດກາການບໍລິຫານລັດໂດຍສະເພາະການຕິດຕາມ-ກວດກາການຈັດຕັ້ງປະຕິບັດຄໍາສັ່ງ ເລກທີ 15/ນຍ ພົບເຫັນການລະເມີດ ແລະ ຜູ້ມີສ່ວນຮ່ວມ 1.119 ຄົນ ໃນນີ້ມີພະນັກງານລັດ 127 ຄົນ, ຜູ້ປະກອບການ 246 ຄົນ ແລະປະຊາຊົນ 746 ຄົນ, ຢຶດໄມ້ໄດ້ 11.351,75 ແມັດກ້ອນ ແລະ 33,17 ໂຕນ, ປັບໄຫມ 22,28 ຕື້ກີບ, ພົບເຫັນການຄ້າງພັນທະ ແລະຄ້າງຊໍາລະຄ່າໄມ້ໃຫ້ລັດ 121.120,86 ແມັດກ້ອນ, ມູນຄ່າ 66,57 ຕື້ກີບ ແລະ 4,87 ລ້ານໂດລາສະຫະລັດ.

 ທ່ານ ສີໃນ ມຽງລາວັນ ໃຫ້ຮູ້ຕື່ມວ່າ: ສະເພາະການກວດກາການປະຕິບັດຄໍາສັ່ງເລກທີ 15/ນຍ ໃນປີ 2020 ຜ່ານມາຢຶດໄມ້ໄດ້ທັງຫມົດ 2.605 ແມັດກ້ອນ ແລະ 290,96 ໂຕນ, ຂາຍແລ້ວ 2.073 ແມັດກ້ອນ ແລະ 0,59 ໂຕນ ລວມມູນຄ່າ 5,8 ຕື້ກີບ, ມອບເຂົ້າງົບປະມານແລ້ວ 2,9 ຕື້ກີບ, ຄ້າງມອບ 2,99 ຕື້ກີບ, ມີຜູ້ກະທໍາຜິດ 25 ຄົນ. ນອກຈາກນີ້ກວດພົບໂຮງງານປຸງແຕ່ງໄມ້ທີ່ສ້າງຕັ້ງຂຶ້ນບໍ່ຖືກຕ້ອງ 2.788 ແຫ່ງ,ໃນນີ້ຍຸບເລີກແລ້ວ 1.636 ແຫ່ງ, ຍັງເຫລືອ 1.152 ແຫ່ງ ແລະອື່ນໆ.

ຂ່າວ: ມົດແດງນ້ອຍ 

แชร์