ເມືອງມໍລະດົກໂລກດຶງດູດນັກທ່ອງທ່ຽວ 3 ລ້ານກວ່າຄົນ ໃນຊຸມປີຜ່ານມາ

   ເມືອງມໍລະດົກໂລກແຂວງຫຼວງພະບາງຍັງເປັນໜຶ່ງເປົ້າໝາຍຂອງສາຍຕານັກທ່ອງທ່ຽວຈາກທົ່ວທຸກມູມໂລກຢາກມາຢ້ຽມຊົມຊຶ່ງທາງແຂວງຫຼວງພະບາງໄດ້ກໍານົດເອົາວຽກງານທ່ອງທ່ຽວເປັນບູລິມະສິດອັນດັບໜຶ່ງໂດຍຫັນໄປສູ່ການປັບປຸງຂອດບໍລິການທາງດ້ານປະລິມານ ແລະ ຄຸນນະພາບຕາມມາດຕະຖານອາຊຽນເຮັດໃຫ້ນັກທ່ອງທ່ຽວທີ່ເຂົ້າມາທ່ຽວຊົມມີຄວາມປະທັບໃຈຊຶ່ງໃນຊຸມປີຜ່ານມາໄດ້ດຶງດູດນັກທ່ອງທ່ຽວ 3 ລ້ານກວ່າຄົນ ແລະຍັງໄດ້ຮັບຫຼາຍໆລາງວັນທີ່ກາລັງຕີ້ຄວາມປະທັບໃຈໜ້າສໍາພັດວິຖີຂອງຊາວເມືອງມໍລະດົກໂລກແຫ່ງນີ້.

ຈາກບົດສະຫຼຸບຮ່າງບົດລາຍງານກ່ຽວກັບໝາກຜົນແຫ່ງການປະຕິບັດແຜນພັດທະນາເສດຖະກິດ-ສັງຄົມ 5ປີ ຄັ້ງທີ VIII (20 16-2020) ໃຫ້ຮູ້ວ່າ: ນັກທ່ອງ ທ່ຽວທີ່ເດີນທາງມາທ່ຽວຫຼວງພະບາງທັງໝົດໃນຊຸມປີຜ່ານມາ 3.521.409 ເທື່ອຄົນ, ທຽບໃສ່ແຜນການລື່ນແຜນການ 1% ໃນ ນັ້ນນັກທ່ອງທ່ຽວສາກົນ 2,6 ລ້ານຄົນ, ສ່ວນໃຫຍ່ແມ່ນມາຈາກທະວີບເອີຣົບ, ສະເລ່ຍຄ່າໃຊ້ຈ່າຍຂອງນັກທ່ອງທ່ຽວທັງໝົດ 1.110 ລ້ານໂດລາສະຫະລັດ, ສາມາດສ້າງວຽກເຮັດງານທໍາ 70 ພັນກວ່າຕໍາແໜ່ງງານ,ທົ່ວແຂວງມີໂຮງແຮມ-ຣີສອດ 97 ແຫ່ງ, ທຽບໃສ່ 5 ປີ ຜ່ານມາເພີ່ມຂຶ້ນ 25 ແຫ່ງ, ເຮືອນພັກ 400 ຫຼັງ ເພີ່ມຂຶ້ນ 75 ຫຼັງ, ຮ້ານອາ ຫານ 311 ຮ້ານ ເພີ່ມ ຂຶ້ນ 28 ຮ້ານ ແລະບໍລິສັດທ່ອງທ່ຽວ 97 ບໍລິສັດ ເພີ່ມຂຶ້ນ 23ບໍລິສັດ, ຮ້ານບັນເທີງ 19 ຮ້ານ,ຮ້ານນວດ-ສະປາ 36 ຮ້ານ ແລະໄດ້ຍົກສູງປັບປຸງຂອດບໍລິການທາງດ້ານປະລິມານ ແລະຄຸນນະພາບຕາມມາດຕະຖານອາຊຽນເຮັດໃຫ້ນັກທ່ອງທ່ຽວທີ່ເຂົ້າມາທ່ຽວຊົມມີຄວາມປະທັບໃຈ ແລະ ໄດ້ຮັບຫຼາຍໆວັນຕາມ 7 ມາດຕະຖານການທ່ອງທ່ຽວອາຊຽນຄື: ເມືອງທ່ອງທ່ຽວສະອາດອາຊຽນ 1 ລາງວັນ,ລາງວັນຫ້ອງປະຊຸມມາດຕະຖານອາຊຽນ 2 ລາງວັນ, ຫ້ອງນໍ້າສາທາ ລະນະສະອາດອາຊຽນ 2 ລາງວັນ, ມາດ ຕະຖານນວດແຜນບູຮານອາຊຽນ 2 ລາງວັນ, ມາດຕະຖານໂຮງແຮມສີຂຽວອາຊຽນ 7 ລາງວັນ ແລະລາງວັນນາມມະຍົດສິ່ງແວດລ້ອມທີ່ຍືນຍົງເປັນເມືອງປອດຄວັນຢາສູບຂອງອາຊຽນ,ນອກຈາກນີ້ຍັງໄດ້ຮັບລາງວັນການທ່ອງທ່ຽວດີເດັ່ນ ແລະຍືນຍົງຂອງ ສປປ ລາວ ມີ 7 ລາງວັນຄືລາງ ວັນການທ່ອງທ່ຽວທີ່ດີເດັ່ນ ແລະຍືນຍົງ 4 ແຫ່ງ, ລາງວັນໂຮງແຮມທີ່ດີເດັ່ນ 5 ແຫ່ງ, ເຮືອນພັກທີ່ດີເດັ່ນ 3 ແຫ່ງ, ລາງວັນພະນັກງານນໍາທ່ຽວທີ່ດີເດັ່ນ 6 ທ່ານ, ລາງວັນຮ້ານອາຫານທີ່ດີເດັ່ນ 5 ຮ້ານ, ລາງວັນບໍລິສັດທ່ອງທ່ຽວທີ່ດີເດັ່ນ 4 ບໍລິສັດ ແລະລາງວັນການທ່ອງທ່ຽວແບບປະຊາຊົນມີສ່ວນຮ່ວມ 1 ລາງວັນ.

  ທົ່ວແຂວງມີແຫຼ່ງທ່ອງທ່ຽວທັງໝົດ 228 ແຫ່ງ, ໃນນັ້ນແຫຼ່ງທ່ອງທ່ຽວທໍາມະຊາດມີ 111 ແຫ່ງ, ວັດທະນະທໍາ 78 ແຫ່ງ ແລະປະຫວັດສາດ 39 ແຫ່ງ ແລະສໍາລັບ ແຫຼ່ງທ່ອງທ່ຽວແຫ່ງຕ່າງໆທີ່ໄດ້ເປີດໃຫ້ບໍລິການແມ່ນໄດ້ຍົກລະດັບດ້ານໂຄງລ່າງພື້ນຖານເຂົ້າເຖິງ ແລະສ້າງສິ່ງອໍານວຍຄວາມ ສະດວກເປັນຕົ້ນແມ່ນໄດ້ສໍາເລັດການປູຢາງແຕ່ 3 ແຍກບ້ານຊ່າງໄຫຫາບ້ານປາກອູ 10 ກິໂລແມັດ, ທາງຢ່າງຈາກບ້ານຊຽງແມນຫາແມັດ, ທ່າບັກຂຶ້ນບ້ານຊຽງແມນ, ສູນຂໍ້ມູນການທ່ອງທ່ຽວ 6 ແຫ່ງສູນວາງສະແດງ, ສູນຫັດຖະກໍາເຄື່ອງປັ້ນດິນເຜົາບ້ານຈ່ານເໜືອ, ຂັ້ນໄດລົງທ່າເຮືອສໍາລັບນັກທ່ອງທ່ຽວ,ທ່າທຽບເຮືອ, ຕິດຕັ້ງໄຟຟ້າເຂົ້າຖໍ້າຕິ່ງ, ພູສີ, ໄຟເຍືອງທາງຕາມທາງຍ່າງຈາກບ້ານຊຽງແມນຫາວັດຫາດສ້ຽວແຕ່ທ່າເຮືອບ້ານຈ່ານຫາສູນປັ້ນໝໍ້ຫຼໍ່ໄຫບ້ານຈ່ານ, ປັບປຸງຂົວເຫຼັກທາງໄປນໍ້າຕົກຕາດກວາງຊີ 5 ແຫ່ງ.

   ທັງໝົດແມ່ນເພື່ອແນໃສ່ສ້າງສິ່ງອໍານວຍຄວາມສະດວກໃຫ້ແກ່ນັກທ່ອງທ່ຽວທີ່ເຂົ້າມາທ່ຽວຊົມແຂວງຫຼວງພະບາງໂດຍສະເພາະແມ່ນນະຄອນຫຼວງພະບາງຕິດພັນກັບການອະນຸລັກຮັກສິ່ງແວດລ້ອມໃຫ້ຍືນຍົງໄປຄຽງຄູ່ກັບການປົກປັກຮັກສາວັດທະນະທໍາ,ສ້າງກິດຈະກໍາໃຫ້ປະຊາຊົນມີສ່ວນຮ່ວມ ແລະຈັດສັນແຫຼ່ງທ່ອງທ່ຽວໃຫ້ມີສີສັນ ແລະໜ້າທ່ຽວຊົມເພື່ອເປັນການດຶງດູດນັກທ່ອງທ່ຽວຈາກທັງພາຍໃນ ແລະຕ່າງປະເທດເຂົ້າມາທ່ຽວຊົມໃຫ້ນັບມື້ນັບເພີ່ມຂຶ້ນ.

  ສໍາລັບໃນປີ 2020 ບັນຍາກາດການທ່ອງທ່ຽວຢູ່ແຂວງຫຼວງພະບາງຈາກທີ່ເຄີຍຄຶກຄື້ນມ່ວນຊື່ນກໍໄດ້ຢຸດສະງັດລົງລວມເຖິງບັນດາຫົວໜ່ວຍຜູ້ປະກອບການທຸລະກິດດ້ານການບໍລິການໂຮງແຮມເຮືອນພັກ ແລະຮ້ານອາຫານໃຫຍ່ແຫ່ງຕ່າງໆຕ້ອງປິດການບໍລິການຍ້ອນບໍ່ມີແຂກນັກທ່ອງທ່ຽວເຮັດໃຫ້ເກີດມີຄົນຕົກງານເປັນຈໍານວນຫຼວງຫຼາຍຍ້ອນການແຜ່ລະບາດຂອງເຊື້ອພະຍາດໂຄວິດ-19 ເຮັດ ໃຫ້ຫຼາຍປະເທດຕ້ອງປິດດ່ານການເຂົ້າ-ອອກ ເພື່ອປ້ອງກັນບໍ່ໃຫ້ເກີດການລະບາດອອກເປັນວົງກວ້າງຢູ່ພາຍໃນປະເທດໃຜລາວ ແລະຫຼັງຈາກທີ່ເຊື້ອພະຍາດໂຄ ວິດ-19 ນີ້ຫາຍໄປຈາກໂລກນີ້ບັນຍາກາດການທ່ອງທ່ຽວຂອງ ສປປ ລາວ ໂດຍສະເພາະແມ່ນແຂວງ ຫຼວງພະບາງຈະກັບມາຄຶກຄື້ນອີກຕື່ມຄັ້ງໃໝ່.

ຂ່າວ: ສີສຸວັນ

แชร์