ທພລ.ອຊ ສະໜອງສິນເຊື່ອແກ່ການບໍລິການ

  ທະນາຄານພັດທະນາລາວສາຂາ ອຸດົມໄຊ (ທພລ.ອຊ) ເປັນທະນາຄານທຸລະກິດລັດດໍາເນີນທຸລະກໍາການເງິນຄວບຄູ່ກັບການປະຕິບັດນະໂຍບາຍສິນເຊື່ອຕາມນະໂຍ ບາຍຂອງລັດຖະບານກໍ່ຄືແຜນພັດທະນາເສດຖະກິດ-ສັງຄົມຂອງທ້ອງຖິ່ນ. ໃນຫວ່າງບໍ່ດົນມານີ້, ທ່ານ ສົມແພງ ລັດຕະນະວົງ ຫົວໜ້າ ທພລ ສາຂາອຸດົມໄຊໄດ້ໃຫ້ຮູ້ວ່າ: ໃນປີ 2020 ຜ່ານມາ; ທພລ.ອຊ ມີຍອດຊັບສິນທັງໝົດ 259,1 ຕື້ກີບ ທຽບໃສ່ແຜນການເກີນແຜນ 11%; ລະດົມແຫຼ່ງທຶນເງິນຝາກສາມາດລະດົມໄດ້ 249,6 ຕື້ກີບ ທຽບໃສ່ແຜນການປີປະຕິບັດໄດ້ເກີນແຜນ 7,1%, ທຽບໃສ່ປີ 2019 ເພີ່ມຂຶ້ນ 8,2 % ຊຶ່ງໃນນີ້ເງິນຝາກປະຈໍາກວມເອົາ 53,4% ຂອງເງິນຝາກທັງໝົດ. ມີຍອດສິນເຊື່ອ 164,6 ຕື້ກີບ, ທຽບໃສ່ແຜນປະຕິບັດໄດ້ 81,6% ທຽບໃສ່ ປີ 2019 ຫຼຸດລົງ 9,2 %. ຕໍ່ກັບການສະໜອງທຶນຂອງໂຄງການຊຸກຍູ້ການຜະລິດເພື່ອແກ້ໄຂຜົນກະທົບຈາກການລະບາດຂອງພະຍາດໂຄວິດ-19; ທພລ.ອຊ ຍັງບໍ່ທັນໄດ້ປ່ອຍສິນເຊື່ອເທື່ອເຊິ່ງໃນປະຈຸບັນໄດ້ມີການຄົ້ນຄວ້າ,ສົ່ງເອກະສານໄປຜ່ານສະພາບໍລິຫານສິນເຊື່ອສຳນັກງານໃຫຍ່ແລ້ວ 1 ລາຍໃນວົງເງິນ 4,5 ຕື້ກີບ ເປົ້າໝາຍສ້າງຕັ້ງໂຮງແຮມ; ຄົ້ນຄວ້າເອກະສານລູກຄ້າສະເໜີຂໍສິນເຊື່ອ 7 ລາຍ ໃນວົງເງິນລວມທີ່ລູກຄ້າສະເໜີ 54,6 ຕື້ກີບ ຄາດວ່າໃນເດືອນ 2/2021 ຈະໄດ້ສົ່ງໄປຜ່ານສະພາບໍລິຫານສິນເຊື່ອ ທພລ ສຳນັກງານໃຫຍ່.

   ໃນໄລຍະດຽວ, ກໍ່ມີເງິນຝາກປະຢັດ-ຝາກກະແສລາຍວັນ 15.098 ບັນຊີ, ມີບັດ ATM 4.653 ບັດ, mobile trust 1.453 ລາຍ trust pay QR code 386 ລາຍ, alipay 9 ລາຍldbwallet ມີ 15 ຕົວແທນຝາກ-ຖອນ ແລະ1 ຕົວແທນຮ້ານຄ້າຮັບຊໍາລະ,ທຽບໃສ່ແຜນສູ້ຊົນປະຕິບັດໄດ້ປະມານ 44 %; ສໍາລັບການເບີກຈ່າຍເງິນເດືອນພະນັກງານລັດບໍລິຫານທີ່ອັບໂລດເງິນເດືອນຜ່ານ ທພລ ປະກອບມີເມືອງແບງ ແລະເມືອງຮຸນປະກອບມີ 47 ຫ້ອງການ, ຈໍານວນເງິນ 58,8 ຕື້ກວ່າກີບຕໍ່ປີ;ພິເສດໃນກາງເດືອນ 9 ຜ່ານມານີ້2 ເມືອງດັ່ງກ່າວຍັງສືບຕໍ່ເຊັນສັນຍາຕື່ມອີກ ແລະຍັງມີແຜນຂະຫຍາຍເບີກເງິນເດືອນລັດບໍລິຫານໃຫ້ເຂດອື່ນໆຕື່ມ.

 ທ່ານ ສົມແພງ ລັດຕະນະວົງ ຫົວໜ້າ ທພລ ສາຂາອຸດົມໄຊທິດທາງແຜນການປີ 2021 ນີ້ ແມ່ນເອົາໃຈໃສ່ຂອດການບໍລິການຕ່າງໆຂອງທພລໃຫ້ຢູ່ໃນເກນທີ່ດີ; ສືບຕໍ່ເດີນຕະຫຼາດປຸກລະດົມໂຄສະນາຜະລິດຕະພັນໃໝ່ຂອງ ທພລ ໃຫ້ກວ້າງຂວາງ; ສູ້ຊົນລະດົມເງິນຝາກໃຫ້ໃດ້ຕາມແຜນການປີ 2020 ໃຫ້ເພີ່ມຂຶ້ນຈາກປີ 2019 ເທົ່າກັບ 6%; ສູ້ຊົນນໍາເອົາລູກຄ້າທີ່ມີເງື່ອນໄຂຄວາມພ້ອມເຂົ້າເຖິງແຫຼ່ງທຶນ SME, ເອົາໃຈໃສ່ຄຸ້ມຄອງແລະບໍລິຫານສິນເຊື່ອທີ່ປ່ອຍໃໝ່ໃຫ້ເປັນສິນເຊື່ອທີ່ມີຄຸນນະ ພາບ; ຂະຫຍາຍສິນເຊື່ອບົນພື້ນຖານການກັ່ນຕອງລູກໜີ້; ຄວບຄຸມ, ກວດກາຕິດຕາມດ້ານລະບຽບແລະນະໂຍບາຍສິນເຊື່ອເພື່ອຕີຖອຍປາກົດການຈະກໍ່ໃຫ້ເກີດເປັນໜີ້ເສຍໃນອານາຄົດ, ສູ້ຊົນປ່ອຍກູ້ໃຫ້ໄດ້ປະມານ 201,7 ຕື້ກີບ ຂື້ນໄປ; ສູ້ຊົນການເຄື່ອນໄຫວດໍາເນີນທຸລະກິດໃຫ້ມີຜົນກໍາໄລຫຼາຍກວ່າເກົ່າໃນຕໍ່ໜ້າ. 

------------

ຂ່າວ: ຣັດສະໝີ ດວງສັດຈະ 

ຮູບພາບ: ໜັງສືພິມເສດຖະກິດ-ສັງຄົມ

แชร์