ຟາມໝູບ້ານບໍ່ ສູ້ຊົນຜະລິດ ຊີ້ນ-ປາ ປ້ອນຕະຫຼາດ

ໃນປະຈຸບັນ, ສັງຄົມກຳລັງດຳລົງຊີວິດປົກກະຕິແບບໃໝ່ຕາມແນວທາງຂອງພັກໂດຍລັດຖະບານເຮົາໄດ້ຖືສຳຄັນເພີ່ມການຜະລິດພາຍໃນໃຫ້ຫຼາຍໂດຍສະເພາະວຽກງານ 4ລ້ຽງ-4ປູກ ແນໃສ່ຄໍ້າປະກັນສະບຽງອາຫານຢູ່ພາຍໃນປະເທດ; ຫຼຸດຜ່ອນການນຳເຂົ້າກ້າວເຖິງການສົ່ງອອກເພື່ອນຳເອົາເງິນຕາຕ່າງປະເທດເຂົ້າມາບ້ານເຮົາ; ສຳ ລັບ, ຟາມໝູຂອງ ທ່ານ ນາງ ບຸນມີ ຈະເລີນໄຊ ຢູ່ບ້ານບໍ່ ເມືອງໄຊ ແຂວງອຸດົມໄຊ ກໍ່ເປັນໜຶ່ງໃນແຫຼ່ງຜະລິດລູກໝູ-ຊີ້ນໝູ ແລະປາປ້ອນຕະຫຼາດ ເມືອງໄຊ ແລະລູກ ຄ້າເພື່ອນຳໄປລ້ຽງ ຫຼືຈຳໜ່າຍໄດ້ດີສົມຄວນ.

  ທ່ານ ນາງ ບຸນມີ ຈະເລີນໄຊ ໄດ້ແຈ້ງໃຫ້ຮູ້ວ່າ: ໃນປີ 2014 ໄດ້ລ້ຽງໝູພັນຊີ້ນ 1.200 ໂຕ; ໃນປີ 2017 ໄດ້ຫັນມາຜະລິດໝູແມ່ພັນ 230 ໂຕ, ພໍ່ພັນ 5 ໂຕ ແລະຜະລິດລູກໝູນ້ອຍຂາຍ; ສະເພາະລາຍຮັບຈາກການຂາຍໝູນ້ອຍປີໜຶ່ງ 4.600 ໂຕ ສາມາດສ້າງລາຍຮັບໄດ້ປະມານ 3.700 ລ້ານກີບ ແລະລາຍຮັບຈາກການຂາຍປາໄດ້ຈຳນວນໜຶ່ງຊຶ່ງແຫຼ່ງທຶນໃນການຜະລິດຕົ້ນຕໍແມ່ນຂອງຕົນເອງ, ພ້ອມນັ້ນກໍ່ໄດ້ກູ້ຢືມເງິນຈາກທະນາຄານສົ່ງເສີມກະສິກຳອຸດົມໄຊຈຳນວນໜຶ່ງສົມທົບ ແລະ ປະກອບສ່ວນເຂົ້າໃນໂຄງການດັ່ງກ່າວ; ແຕ່ຕົກມາໃນປີ 2019 ຟາມຂອງພວກເຮົາໄດ້ຮັບຜົນກະທົບຈາກພະຍາດອະຫິວາອາຟຣິກກາຢ່າງໜັກໜ່ວງ ແລະໄດ້ທຳລາຍໂຕໝູຖິ້ມໃນນັ້ນມີໝູແມ່ພັນ 230 ໂຕ, ພໍ່ພັນ 5 ໂຕ ແລະໝູນ້ອຍ 800 ໂຕ; ຈາກນັ້ນ, ກໍ່ໄດ້ກູ້ຢືມຈາກທະນາຄານສົ່ງເສີມກະສິກຳອຸດົມໄຊອີກຈຳນວນໜຶ່ງເພື່ອນຳໃຊ້ເຂົ້າໃນການຜະລິດຕື່ມອີກ.

  ທ່ານ ນາງ ບຸນມີ ຈະເລີນໄຊ ຍັງໄດ້ແຈ້ງແຜນໃນຕໍ່ໜ້າວ່າ: ຈະສືບຕໍ່ປັບປຸງ,ກວດກາ ແລະເຄັ່ງຄັດໃນການເຂົ້າ-ອອກ, ພ້ອມທັງນຳຊ່ຽວຊານສະເພາະດ້ານຈາກຕ່າງປະເທດເຂົ້າມາຮັກສາສຸຂະພາບສັດ; ໂດຍຈະເອົາໃຈໃສ່ລ້ຽງໝູແມ່ພັນ 300 ໂຕ, ພໍ່ພັນ 6 ໂຕ ແລະລູກໝູນ້ອຍ 6.000 ໂຕ, ລ້ຽງໝູຊີ້ນ 6.000 ໂຕ ແລະລ້ຽງປາຕື່ມອີກ. ໃນໂອກາດນີ້; ເຈົ້າຂອງຟາມໝູຍັງກ່າວສະແດງຄວາມຂອບໃຈຢ່າງລົ້ນເຫຼືອມາຍັງການນຳຂອງແຂວງ, ຂອງເມືອງໄຊ ແລະລູກຄ້າກໍ່ຄືຜູ້ປະກອບການທີ່ໄດ້ໃຫ້ການຊີ້ນຳ, ຊ່ວຍເຫຼືອ ແລະຮ່ວມມືໃນຜ່ານມາ, ພິເສດຂໍສະແດງຂອບໃຈຢ່າງຈິງໃຈຕໍ່ການນຳ ແລະພະນັກງານທະນາຄານສົ່ງເສີມກະສິກຳອຸດົມໄຊທີ່ໄດ້ໃຫ້ແຫຼ່ງທຶນໃນກ່ອນ ແລະຫຼັງການແຜ່ລະບາດຂອງພະຍາດອະຫິວາອາຟຼິກກາ ແລະຫວັງວ່າ: ທຸກພາກສ່ວນຄົງກະລຸນາໃຫ້ການນຳພາ, ຊ່ວຍເຫຼືອ ແລະ ຮ່ວມມືກັບພວກເຮົາຕື່ມໃນອະນາຄົດ, ທັງນີ້ກໍ່ເພື່ອຜະລິດສະບຽງອາຫານໃຫ້ສັງຄົມບໍລິໂພກຕາມແຜນງານຂອງລັດຖະບານ ກໍ່ຄືຂອງແຂວງ, ຂອງເມືອງພວກເຮົາ.

-------------

ຂ່າວ: ຣັດສະໝີ ດວງສັດຈະ 

ຮູບພາບ: ໜັງສືພິມເສດຖະກິດ-ສັງຄົມ

แชร์