ແຂວງວຽງຈັນ ເຂັ້ມງວດປະຕິບັດຄຳສັ່ງ 15/ນຍ ປີແລ້ວພົບກະທຳຜິດ 16 ກໍລະນີ

 ກອງປະຊຸມຄະນະສະເພາະກິດໄມ້ ແຂວງວຽງຈັນ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດ ຄຳສັ່ງ 15/ນຍ ປະຈຳປີ 2020 ຂຶ້ນໃນວັນທີ 28 ມັງກອນ 2021 ທີ່ຫ້ອງວ່າການປົກຄອງແຂວງວຽງຈັນໂດຍການເປັນປະທານຂອງທ່ານ ພົນ ຈ ວ ບຸນມາ ວົງດາລາແສນ ຫົວໜ້າກອງບັນຊາການທະຫານແຂວງວຽງຈັນເຂົ້າ ຮ່ວມມີບັນດາເຈົ້າເມືອງ, ຮອງເຈົ້າເມືອງ, ບັນດາຄະນະສະເພາະກິດໄມ້ແຂວງວຽງຈັນເຂົ້າຮ່ວມ.

  ທ່ານ ຄຳສະເຫວີຍ ພົມມະຈັນ ຮອງປະທານອົງການກວດກາລັດແຂວງຫົວໜ້າກອງເລຂາຄະນະສະເພາະກິດແຂວງວຽງຈັນໄດ້ຜ່ານບົດສະຫຼຸບໃນໄລຍະຜ່ານມາການເຄື່ອນໄຫວຕິດຕາມ, ກວດກາການຈັດຕັ້ງປະຕິບັດຄໍາສັ່ງ 15/ນຍ ໃນໄລຍະ 1 ປີ ຜ່ານມານີ້ສາມາດກວດກາພົບເຫັນບັນຫາການລັກລອບຕັດໄມ້, ຊື້-ຂາຍໄມ້ ແລະ ເຄື່ອນຍ້າຍໄມ້ບໍ່ຖືກຕ້ອງຈໍານວນ 16 ກໍລະນີ ໂດຍສືບຕໍ່ຈາກຄະນະສະເພາະກິດຊຸດເກົ່າ ແລະ 1 ກໍລະນີທີ່ຄະນະສະເພາະກິດຊຸດປະຈຸບັນກວດຢຶດໄວ້ເມືອງຫີນເຫີບມີຈໍານວນໄມ້ທັງໝົດຈໍານວນ 194,7 ແມັດກ້ອນ ມີຜູ້ກະທໍາຜິດ 11 ຄົນ, 2 ບໍລິສັດ ໃນນີ້ໄດ້ແກ້ໄຂໄປແລ້ວ 15 ກໍລະນີ ຈໍານວນ 185 ກວ່າແມັດ ກ້ອນລວມທັງເງິນປັບໃໝ ແລະ ປະມູນຂາຍໄມ້ເປັນເງິນທັງໝົດ 305,3 ລ້ານກີບ ແລະ ຍັງຄ້າງ 2 ກໍລະນີ ມີໄມ້ຈໍານວນ 8,58 ແມັດກ້ອນ ຊຶ່ງຈະໄດ້ຮີບຮ້ອນຈັດຕັ້ງແກ້ໄຂເພື່ອມອບເງິນເຂົ້າງົບປະມານຕາມລະບຽບກົດໝາຍ.

  ທັງໝົດນີ້ກໍເພື່ອຈັດຕັ້ງປະຕິບັດຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 15/ນຍ ແລະບັນດາກົດໝາຍອື່ນໆທີ່ກ່ຽວຂ້ອງເປັນຕົ້ນແມ່ນ: ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍອຸດສາຫະກໍາ-ການຄ້າ,ກົດໝາຍວ່າດ້ວຍງົບປະມານ ແລະລະບຽບການອື່ນໆທີ່ກ່ຽວຂ້ອງໄດ້ຮັບການຈັດຕັ້ງປະຕິບັດຢ່າງເຂັ້ມງວດ ແລະປາກົດຜົນເປັນຈິງເພື່ອເປັນການເກັບກູ້ຄືນຊັບພະຍາກອນທໍາມະຊາດຂອງລັດຈາກການລັກລອບ, ການດໍາເນີນກິດຈະການກ່ຽວກັບໄມ້ທີ່ບໍ່ຖືກຕ້ອງພ້ອມທັງປັບໃໝມອບເງິນເຂົ້າງົບປະມານຂອງລັດຕາມລະບຽບການ ແລະເຮັດໃຫ້ວຽກງານຄຸ້ມຄອງປ່າໄມ້, ທຸລະກິດໄມ້ແລະເຄື່ອນຍ້າຍໄມ້ຢູ່ພາຍໃນແຂວງວຽງຈັນໄດ້ດຳເນີນການເຄື່ອນໄຫວຖືກ ຕ້ອງ-ສອດຄ່ອງຕາມກົດໝາຍ ແລະ ລະບຽບການຕ່າງໆທີ່ລັດຖະບານໄດ້ວາງອອກໃນແຕ່ລະໄລຍະການລົງຊຸກຍູ້, ເຜີຍແຜ່ຄໍາສັ່ງ 15/ນຍ ແລະ ນິຕິກໍາກົດໝາຍທີ່ກ່ຽວຂ້ອງໃຫ້ບັນດາເມືອງ 11 ເມືອງໂດຍມີເປົ້າໝາຍເຂົ້າຮ່ວມແມ່ນບັນດາຄະນະພັກຄະນະນໍາແຕ່ລະຂັ້ນຕະຫຼອດຮອດກຸ່ມບ້ານ, ນາຍບ້ານ ແລະຜູ້ປະກອບການເຂົ້າຮ່ວມເຊື່ອມຊຶມຢ່າງທົ່ວເຖິງໃນແຕ່ລະຄັ້ງ.

  ເພື່ອເປັນການສະກັດກັ້ນປັນຫາດັ່ງກ່າວແຕ່ຫົວທີພ້ອມທັງມີການເຄື່ອນໄຫວກວດກາລາດຕະເວນສະກັດກັ້ນການລັກລອບຂຸດຄົ້ນໄມ້, ຊື້-ຂາຍໄມ້ ແລະເຄື່ອນຍ້າຍໄມ້ຕາມເສັ້ນທາງ ແລະບັນດາໂຮງງານປຸງແຕ່ງໄມ້ກໍ່ຄືຈຸດຕ່າງໆ ທີ່ມີຂໍ້ມູນຫາງສຽງຂອງທຸກຄົນ ແລະສັງຄົມ.

แชร์