ລມຕ ຕ່າງປະເທດລາວ-ຈີນ ປະຊຸມພົບປະທາງໄກ

 ວັນທີ 3 ກຸມພາ 2021, ສະຫາຍ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ຈັດກອງປະຊຸມພົບປະທາງໄກກັບສະຫາຍ ຫວັງອີ້ ທີ່ປຶກສາແຫ່ງລັດລັດຖະມົນຕີກະຊວງການຕ່າງປະເທດແຫ່ງ ສປ ຈີນ ເພື່ອສືບຕໍ່ຈັດຕັ້ງຜັນຂະຫຍາຍຜົນການສົນທະນາໂທລະສັບທາງໄກລະຫວ່າງສອງເລຂາທິການໃຫຍ່ຄະນະບໍລິ ຫານງານສູນກາງພັກຂອງ ສປປ ລາວ ແລະ ສປ ຈີນ ໃນຄັ້ງວັນທີ 21 ມັງກອນ ຜ່ານມານີ້ການສົນທະນາດັ່ງກ່າວແມ່ນໄດ້ຈັດຂຶ້ນໃນທ່າມກາງທີ່ທົ່ວພັກ,ທົ່ວລັດ ແລະທົ່ວປວງຊົນລາວທັງຊາດມີຄວາມປິຕິຍິນດີເປັນຢ່າງຍິ່ງຕໍ່ຜົນສໍາເລັດການດໍາເນີນກອງປະຊຸມໃຫຍ່ ຄັ້ງທີ XI ຂອງພັກ.

ໂອກາດນີ້, ສະຫາຍ ຫວັງອີ້ ໄດ້ສະແດງຄວາມຊົມເຊີຍຕໍ່ຜົນສໍາເລັດກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ແລະຊົມເຊີຍລັດຖະມົນຕີກະຊວງການຕ່າງປະເທດລາວທີ່ໄດ້ຮັບເລືອກຕັ້ງເປັນກໍາມະການກົມການເມືອງສູນກາງພັກໃນກອງປະຊຸມໃຫຍ່ດັ່ງກ່າວຊຶ່ງສະຫາຍລັດຖະມົນຕີກະຊວງການຕ່າງປະເທດລາວກໍໄດ້ສະແດງຄວາມຂອບໃຈຕໍ່ການນຳພັກ-ລັດ ແຫ່ງ ສປ ຈີນ ທີ່ໄດ້ສົ່ງໂທລະເລກຊົມເຊີຍຕໍ່ຜົນສຳເລັດຂອງກອງປະຊຸມໃຫຍ່ດັ່ງກ່າວກໍຄືການຊົມເຊີຍສະຫາຍເອງທີ່ໄດ້ຮັບເລືອກຕັ້ງໃນກອງປະຊຸມຄັ້ງນີ້.

  ນອກຈາກນີ້, ສະຫາຍ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈຕໍ່ສະຫາຍຈີນທີ່ໄດ້ໃຫ້ການຊ່ວຍເຫຼືອຖານມິດສະຫາຍເປັນຕົ້ນແມ່ນການຊ່ວຍເຫຼືອທາງດ້ານອຸປະກອນການແພດ, ຢາປິ່ນປົວພະຍາດ ແລະວັກຊີນປ້ອງກັນພະຍາດໂຄວິດ-19 ໃຫ້ແກ່ ສປປ ລາວ ຊຶ່ງໄດ້ປະກອບສ່ວນເຮັດໃຫ້ລັດຖະບານລາວມີຜົນສໍາເລັດສູງໃນການປ້ອງກັນ ແລະສະກັດກັ້ນການແຜ່ລະບາດຂອງພະຍາດດັ່ງກ່າວໃນປະຈຸບັນ.

  ສອງຝ່າຍຍັງໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອລະຫວ່າງລາວ ແລະຈີນ, ກໍຄືການເປັນຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານຕາມທິດ 4 ດີ ແລະການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເພີ່ມພູນຄູນສ້າງໃຫ້ຈະເລີນງອກງາມ ແລະແຕກດອກອອກຜົນຍິ່ງໆຂຶ້ນຊຶ່ງສະແດງອອກໃນການພົບປະ ແລະແລກປ່ຽນການຢ້ຽມຢາມລະຫວ່າງການນຳຂັ້ນສູງຂອງສອງປະເທດຢ່າງເປັນປົກກະຕິລວມທັງການຈັດຕັ້ງປະຕິບັດບັນດາໂຄງການຮ່ວມມືລະຫວ່າງສອງລັດຖະບານທີ່ມີຜົນສໍາເລັດສູງໃນໄລຍະຜ່ານມາ.

ນອກນີ້,ສອງຝ່າຍຍັງໄດ້ປຶກສາຫາລືກ່ຽວກັບຄວາມຄືບໜ້າໃນການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວກໍຄືການຮ່ວມມືຕ່າງໆໃນຂອບສອງຝ່າຍອື່ນໆ, ພິເສດສອງຝ່າຍຍັງເຫັນດີເປັນເອກະພາບກັນໃນການຈັດຕັ້ງບັນດາກິດຈະກຳຕ່າງໆເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 60 ປີ (25 ເມສາ1961-25 ເມສາ 2021) ແລະ ປີມິດຕະພາບລາວ-ຈີນ ຊຶ່ງການນໍາສູງສຸດຂອງສອງພັກໄດ້ປະກາດຢ່າງເປັນທາງການໃນໂອກາດສົນທະນາທາງໂທລະສັບໃນວັນທີ 21 ມັງກອນ 2021 ທີ່ຜ່ານມາ.

 ສອງຝ່າຍຍັງໄດ້ປຶກສາຫາລືກ່ຽວກັບບັນຫາພາກພື້ນ ແລະສາກົນຈຳນວນໜຶ່ງທີ່ສອງຝ່າຍມີຄວາມສົນໃຈລວມທັງການຮັດແໜ້ນການຮ່ວມມືໃນຂອບພາກພື້ນ ແລະສາກົນເປັນຕົ້ນແມ່ນໃນຂອບອາຊຽນ, ແມ່ນໍ້າຂອງ-ແມ່ນໍ້າລ້ານຊ້າງ ແລະອື່ນໆ.

  ການປະຊຸມແບບທາງໄກໃນຄັ້ງນີ້ໄດ້ດຳເນີນໄປດ້ວຍບັນຍາກາດອັນດີ ແລະ ສະໜິດສະໜົມ, ສ່ອງແສງໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດທີ່ນັບມື້ໄດ້ຮັບການເພີ່ມພູນຄູນສ້າງໃຫ້ຂະຫຍາຍຕົວຢ່າງບໍ່ຢຸດຢັ້ງ.

ຂ່າວ: ກະຊວງການຕ່າງປະເທດ

แชร์