ປີຜ່ານມາ ເສດຖະກິດ ແຂວງເຊກອງຂະຫຍາຍຕົວ 4,3%

  ຕາມການລາຍງານຂອງທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງໃຫ້ຮູ້ເມື່ອບໍ່ດົນນີ້ວ່າ: ປີ 2020 ຜ່ານມາການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ ຂອງແຂວງເຊກອງແມ່ນປະສົບກັບບັນຫາການລະບາດຂອງພະຍາດໂຄວິດ-19, ໄພພິບັດທາງທໍາມະຊາດ (ນໍ້າຖ້ວມ- ແຫ້ງແລ້ງ), ເງິນບາດ-ເງິນໂດລາແຂງຄ່າ, ລາຄາສິນຄ້າມີການເໜັງຕີງ ແລະບັນຫາອື່ນໆຊຶ່ງສົ່ງຜົນກະທົບໂດຍກົງຕໍ່ພື້ນຖານໂຄງລ່າງ ແລະ ພື້ນຖານການຜະລິດ ຂອງປະຊາຊົນອັນໄດ້ເຮັດໃຫ້ເສດຖະກິດຂອງແຂວງຂະຫຍາຍຕົວໄດ້ພຽງແຕ່ 4,3% ຈາກເມື່ອກ່ອນໄດ້ວາງຄາດໝາຍການຂະຫຍາຍຕົວຂອງເສດຖະກິດໄວ້ຢູ່ທີ່ 8% ສະເລ່ຍລາຍຮັບຕໍ່ຫົວຄົນໄດ້ 13,99 ລ້ານກີບ ຫຼືເທົ່າກັບ 1.728 ໂດລາສະຫະລັດ.

ທ່ານເຈົ້າແຂວງໆເຊກອງຍັງໄດ້ກ່າວຕື່ມວ່າ: ເຖິງວ່າເສດຖະກິດຂອງແຂວງຈະໄດ້ຮັບຜົນກະທົບໃນຫຼາຍໆດ້ານກໍຕາມແຕ່ດ້ວຍຄວາມຮັບຜິດຊອບສູງຂອງບັນດາສະຫາຍຄະນະພັກ-ອົງການປົກຄອງແຂວງໃນການນໍາພາ-ຊີ້ນໍາບວກກັບຄວາມຕື່ນຕົວຂອງສະມາຊິກພັກ, ພະນັກງານ ແລະປະຊາຊົນປະກອບສ່ວນເຂົ້າໃນການສ້າງສາ ແລະພັດທະນາແຂວງເຊກອງ, ໄດ້ພ້ອມກັນເອົາໃຈໃສ່ບຸກບືນຜ່ານຜ່າອຸປະສັກຄວາມຫຍຸ້ງຍາກ, ທ້າທາຍຕ່າງໆນາໆເຮັດໃຫ້ການຂະຫຍາຍຕົວຂອງເສດຖະກິດໃນຂະແໜງການສໍາຄັນຂະຫຍາຍຕົວໄດ້ດີສົມຄວນເປັນຕົ້ນ: ຂະແໜງກະສິກໍາ-ປ່າໄມ້ ຂະຫຍາຍຕົວເພີ່ມຂຶ້ນໃນລະດັບ 6,65%, ຂະແໜງອຸດສາຫະກໍາ 4% ແລະ ຂະແໜງ ບໍລິການ 1,92%,ຂະນະດ້ານການລົງທຶນມີມູນຄ່າທັງໝົດ 1.542 ຕື້ກີບ ໃນນັ້ນມູນຄ່າການລົງທຶນລວມປະຕິບັດໄດ້ 924,08 ຕື້ກີບ ເທົ່າກັບ 65%(ແຜນການ 1.432 ຕື້ກີບ).

  ສຳລັບການສົ່ງອອກປະຕິບັດໄດ້ 120,98 ລ້ານໂດລາສະຫະລັດ, ລື່ນແຜນດັດແກ້ 12%, ປະເພດສິນຄ້າສົ່ງອອກຕົ້ນຕໍມີກະແສໄຟຟ້າ 63,38 ລ້ານໂດລາ, ນໍ້າ ຕານຊາຍ 17,18 ລ້ານໂດລາ ໂດຍສະເພາະນໍ້າຕານອໍແກນິກໄດ້ສົ່ງໄປຈໍາໜ່າຍຢູ່ຕະຫຼາດສະຫະພາບເອີຣົບຫຼາຍກວ່າ 10 ປະເທດ, ຢາງພາລາແຫ້ງ 7,18 ລ້ານໂດລາ ແລະສິນຄ້າກະສິກໍາສົ່ງອອກໄດ້ 30,55 ລ້ານໂດລາ ຊຶ່ງມີປະເພດ: ໝາກກ້ວຍ, ໝາກມັງກອນ, ມັນຕົ້ນແຫ້ງ, ຄວາຍ, ງົວ, ໝູ ແລະເຄື່ອງປ່າຂອງດົງ.

ໂດຍ: ສັນຍາ

แชร์