ຟາມພັນເພັດພັດທະນາຢ່າງບໍ່ຢຸດຢັ້ງຈະລ້ຽງເປັດໄຂ່ໃຫ້ໄດ້ແສນກວ່າໂຕນ

ພັນເພັດ ຜູ້ປະຍົກການຜະລິດກະສິກຳຈາກປະຖົມປະຖານກ້າວສູ່ການນຳໃຊ້ເຄື່ອງກົນຈັກທີ່ທັນສະໄໝທີ່ສຸດເຂົ້າຊ່ວຍໃນການຜະລິດຈົນປະສົບຜົນສຳເລັດໃນຫຼາຍດ້ານ, ສາມາດສ້າງຍີ່ຫໍ້ສິນຄ້າເປັນຂອງຕົນເອງຄືຜະລິດຕະພັນເຂົ້າກາຊາວນາລາວ, ພ້ອມນັ້ນຍັງສາມາດສ້າງວຽກເຮັດງານທຳໃຫ້ກັບປະຊາຊົນ, ມີລາຍຮັບທີ່ດີ, ຊຶ່ງນອກຈາກການຜະລິດເຂົ້າ, ປາ,ພືດຜັກອື່ນໆແລ້ວປະຈຸບັນທາງຟາມຍັງມີການລ້ຽງເປັດໄຂ່ໂດຍໄດ້ຕັ້ງເປົ້າໝາຍໄວ້ທີ່ແສນກວ່າໂຕເພື່ອສະໜອງໄຂ່ໃຫ້ກັບຕະຫຼາດພາຍໃນຫຼີກເວັ້ນການນຳເຂົ້າຈາກຕ່າງປະເທດ.


  ທ່ານ ທອງສະຫວັນ ມີບຸນ ປະທານບໍລິສັດພັນເພັດພັດທະນາກະສິກຳ ໃຫ້ສຳພາດວ່າ: ກ່ອນໜ້ານັ້ນຕົນເອງໄດ້ດຳເນີນທຸລະກິດກ່ຽວກັບກະສິກຳເລີ່ມແຕ່ປີ 1987 ຊຶ່ງວ່າເປັນພໍ່ຄ້າເຂົ້າທັງຮຽນທັງຂາຍເຂົ້ານຳຫຼັງຈາກນັ້ນໄດ້ແນມເຫັນຄວາມສຳຄັນໃນການຜະລິດເຂົ້າຈຶ່ງໄດ້ສ້າງຕັ້ງບໍລິສັດພັນເພັດພັດທະນາກະສິກຳຂຶ້ນໃນປີ 2008 ໂດຍໄດ້ເລີ່ມຕົ້ນຈາກລົດໄຖນາ 1 ຄັນ ເພື່ອທຳການຜະລິດຈາກນັ້ນໄດ້ຫັນມາເປັນອຸດສາຫະກຳທີ່ທັນສະໄໝ, ທາງບໍລິສັດແມ່ນໄດ້ມີການສົ່ງເສີມປະຊາຊົນເຂົ້າຮ່ວມປູກເຂົ້າກັບບໍລິສັດໂດຍນະໂຍບາຍຫຼັກຂອງບໍລິສັດສົ່ງເສີມການປູກເຂົ້າໃນຮູບແບບ 2+3, ຮອງລົງມາແມ່ນການລ້ຽງສັດ, ປູກຝັງແລະພືດອື່ນໆທີ່ກ່ຽວພັນກັບການຜະລິດ.


  ຫຼັງຈາກນັ້ນຂະບວນການນຳໃຊ້ກົນຈັກຖືວ່າເປັນຂະບວນການທີ່ຟົດຟື້ນຫຼາຍສົມຄວນຊຶ່ງໃນປີ 2012 ໄດ້ນຳເຄື່ອງຈັກທີ່ທັນສະໄໝຫຼາຍຢ່າງເປັນຕົ້ນແມ່ນລົດດຳນາ, ລົດໄຖ, ລົດກ່ຽວຈົນກ້າວໄປເຖິງມີໂຮງອົບປະຈຸບັນຖືວ່າບໍລິສັດມີຄົບວົງຈອນ, ຍ້ອນວ່າຄວາມສຳຄັນຂອງການຜະລິດແມ່ນສາມາດຊຸກຍູ້ສົ່ງເສີມປະຊາຊົນໄດ້ມີທ່າກ້າວຂຶ້ນມາຫຼອດເວລາ, ມາຮອດປະຈຸບັນບໍລິສັດພວກເຮົາມີກິດຈະການເພີ່ມຂຶ້ນຄືຜະລິດຕະພັນທີ່ຍີ່ຫໍ້ຂອງບໍລິສັດເຊັ່ນ: ເຂົ້າກາຊາວນາລາວມີທັງເຂົ້າຈ້າວ ແລະເຂົ້າໜຽວ, ຊຶ່ງປະຈຸບັນພວກເຮົາໄດ້ຊຸກຍູ້ປະຊາຊົນໄດ້ດີສົມຄວນໃນປີໜຶ່ງປະມານພັນກວ່າຄອບຄົວ, ເນື້ອທີ່ການຜະລິດກໍ່ເພີ່ມຂຶ້ນ, ໂດຍລະບົບການຜະລິດຂອງພວກເຮົາແມ່ນສາມາດຮັບປະກັນໄດ້ຕໍ່ການຜະລິດ.


 ທ່ານ ທອງສະຫວັນ ມີບຸນ ກ່າວຕື່ມວ່າ: ນອກຈາກການຜະລິດເຂົ້າແລ້ວທາງບໍລິສັດຍັງໄດ້ຊຸກຍູ້ການຜະລິດເອົາເອງຢູ່ໃນຟາມເພື່ອຕອບສະໜອງສະບຽງອາຫານບໍ່ວ່າຈະເປັນເຂົ້າ, ສັດ, ພືດຜັກອື່ນໆ, ປະຈຸບັນທາງຟາມກໍຍັງມີການລ້ຽງເປັດເພື່ອຕອບສະໜອງໄຂ່ທົ່ວນະຄອນຫຼວງວຽງຈັນ ແລະບັນດາແຂວງທົ່ວປະເທດ ແລະສາມາດຫຼຸດການນຳເຂົ້າໄດ້ດີສົມຄວນເພາະແຜນຂອງພວກເຮົາແມ່ນຈະລ້ຽງເປັດໃຫ້ໄດ້ແສນໂຕໂດຍດຽວນີ້ແມ່ນລ້ຽງແລ້ວ 12 ພັນກວ່າໂຕ ນອກນັ້ນແຜນອະນາຄົດພວກເຮົາແມ່ນຈະພັດທະນາກະສິກຳໃຫ້ໄດ້ຫຼາຍທີ່ສຸດຫຼີກລ່ຽງບໍ່ໃຫ້ມີການນຳເຂົ້າເປັນຕົ້ນແມ່ນພືດຜັກ, ໄກ່, ເປັດ, ຊີ້ນຕ່າງໆ.

  ເນື່ອງໃນໂອກາດການເລືອກຕັ້ງ ສສຊ ຊຸດທີ IX ແລະສສຂ ຊຸດທີII ໃນວັນທີ 21 ກຸມພາ 2021 ໃນນາມນັກທຸລະກິດແລະປະຊາຊົນຜູ້ໜຶ່ງທ່ານ ທອງສະຫວັນ ມີບຸນ ໄດ້ກ່າວເຊີນຊວນພໍ່ແມ່ປະຊາຊົນທຸກຊັ້ນຄົນທີ່ມີສິດເລືອກຕັ້ງມາປ່ອນບັດເລືອກເອົາຜູ້ແທນຢ່າງເປັນຂະບວນຟົດຟື້ນແລະສຳເລັດຕາມລະດັບຄາດໝາຍ.

แชร์